ଭୁବେନେଶ୍ବର,୧୬/୦୬: ଦିନବେଳେ ଗୁଳୁଗୁଳି, ସଂଧ୍ୟା ହେଲେ ଛେଚୁଚି। ଅସ୍ବାଭାବିକ ବର୍ଷା ଯୋଗୁ ଜଳବାୟୁରେ ଅସନ୍ତୁଳନ ଦେଖିବାକୁ ମିଳିଛି। ଯଦିଓ ମୌସୁମୀ ବାୟୁ ଓଡ଼ିଶା ଛୁଇଁ ସାରିଛି ତଥାପି, ଆବଶ୍ୟକ ମୁତାବକ ବର୍ଷା ଦେଖିବାକୁ ମିଳୁନାହିଁ। ଏପରି ଜଳବାୟୁ ଅସନ୍ତୁଳନ ପଛର କାରଣ କହିଛନ୍ତି ପାଣିପାଣ ବିଶେଷଜ୍ଞ ଡକ୍ଟର ଶରତ ଚନ୍ଦ୍ର ସାହୁ। ମୌସୁମୀ ବର୍ଷା ଏବଂ ବଙ୍ଗୋପସାଗରରେ ଲଘୁଚାପ ସୃଷ୍ଟି ହେବା ପାଇଁ ଆରବ ସାଗରରୁ ଆସୁଥିବା ଦକ୍ଷିଣ-ପଶ୍ଚିମ ମୌସୁମୀ ପ୍ରବାହ ମୁଖ୍ୟ ଉତ୍ସ ଅଟେ ଏବଂ ଏଥିରେ ପ୍ରଚୁର ଜଳୀୟ ବାଷ୍ପ ଥାଏ। କିନ୍ତୁ ବର୍ତ୍ତମାନ ଏହି ଦକ୍ଷିଣ-ପଶ୍ଚିମ ସ୍ଟ୍ରଙ୍ଗ ୱିଣ୍ଡ ବା ସକ୍ରିୟ ପ୍ରବାହ ଦେଖାଯାଉ ନାହିଁ।
ବର୍ତ୍ତମାନ ସ୍ଥଳଭାଗରେ ଯେଉଁ ଦକ୍ଷିଣ-ପଶ୍ଚିମ ବାୟୁ ବହୁଛି, ତାହା ଦକ୍ଷିଣ ଭାରତର କେନ୍ଦ୍ରୀୟ ଅଞ୍ଚଳରୁ ଆସୁଛି। ଏହା ସ୍ଥଳଭାଗ ଦେଇ ଆସୁଥିବାରୁ ଏଥିରେ ଯଥେଷ୍ଟ ଜଳୀୟ ବାଷ୍ପ ନାହିଁ। କେବଳ ସୂର୍ଯ୍ୟ କିରଣ ଯୋଗୁଁ ସ୍ଥଳଭାଗ ପ୍ରତିକ୍ରିୟାଶୀଳ ହେଉଛି ଏବଂ ସମୁଦ୍ର ପବନ ମାଧ୍ୟମରେ ଆସୁଥିବା ସୀମିତ ଜଳୀୟ ବାଷ୍ପ ପ୍ରଭାବରେ କାଁ ଭାଁ ଘଡ଼ଘଡ଼ି ସହ ବର୍ଷା ହେଉଛି। ଏହି ବର୍ଷା ନିୟମିତ ନୁହେଁ ଏବଂ ଏହା ବିଶେଷ କରି ସନ୍ଧ୍ୟା ସମୟରେ ଉପକୂଳ ଓ ତାହାର ଆଖପାଖ ଜିଲ୍ଲାଗୁଡ଼ିକରେ ଦେଖାଯାଉଛି।
ଅଧିକ ପଢ଼ନ୍ତୁ: Chandrika Case : ଭୀମସେନ ବାନ୍ଧବୀଙ୍କ ସଂପୃକ୍ତି ନେଇ ପଚରାଉଚରା, ମିଳିଥିବା ତଥ୍ୟରୁ ଖିଅ ଯୋଡ଼ୁଛି ପୁଲିସ
ବର୍ତ୍ତମାନ ହେଉଥିବା ଏହି ଅନିୟମିତ ବର୍ଷା ଦ୍ବାରା ଚାଷୀମାନେ କେବଳ ଧାନ ତଳି ପକାଇ ପାରିବେ, କିନ୍ତୁ ଏହା ଚାଷ ପାଇଁ ସ୍ଥାୟୀ ସମାଧାନ ନୁହେଁ। ଏହାଦ୍ବାରା ଆଭ୍ୟନ୍ତରୀଣ ଓଡ଼ିଶାରେ ଚାଷ କାର୍ଯ୍ୟ ସାମାନ୍ୟ ପ୍ରଭାବିତ ହୋଇପାରେ, ଯଦିଓ ଅନ୍ୟ ବର୍ଷ ମାନଙ୍କରେ ମଧ୍ୟ ସେଠାରେ ବିଳମ୍ବରେ ଚାଷ କାର୍ଯ୍ୟ ହୋଇଛି। ଏଲ୍ନିନୋ ଏକ ବିଶ୍ବସ୍ତରୀୟ ପ୍ରକ୍ରିୟା ହୋଇଥିବାରୁ ଏହାର ସିଧାସଳଖ ସ୍ଥାନୀୟ ପ୍ରଭାବ ଏତେ ଅଧିକ ରହିବ ନାହିଁ ।
ପଶ୍ଚିମ ଓଡ଼ିଶାରେ ଗ୍ରୀଷ୍ମ ପ୍ରବାହ ବା ଅଧିକ ତାପମାତ୍ରା ଜୁନ୍ ୧୮ ତାରିଖ ପର୍ଯ୍ୟନ୍ତ ରହିବ। ୧୯ ତାରିଖରୁ ତାତି ଧୀରେ ଧୀରେ କମିବ ଏବଂ ଏହାପରେ ତାପମାତ୍ରା ଅଧିକ ବଢ଼ିବାର ସମ୍ଭାବନା ନାହିଁ। ରାଜଧାନୀ ଭୁବନେଶ୍ୱର ସମେତ ଅନ୍ୟାନ୍ୟ ସ୍ଥାନରେ ୧୮ ତାରିଖ ଯାଏଁ ତାତି ଓ ଗୁଳୁଗୁଳି ରହିବ। ଜୁନ୍ ୧୭, ୧୮ ଓ ୧୯ ତାରିଖ ବେଳକୁ ଆରବ ସାଗରର ପ୍ରବାହ ଧୀରେ ଧୀରେ ସକ୍ରିୟ ହେବାକୁ ଲାଗିବ। ୧୯-୨୦ ତାରିଖ ଆଡ଼କୁ ପାଣିପାଗର ଏହି ଶୈଳୀରେ ବଡ଼ ପରିବର୍ତ୍ତନ ଆସିବ। ବର୍ତ୍ତମାନ ବଙ୍ଗୋପସାଗରରେ ବାଦଲ ସୃଷ୍ଟି ହେଉଛି ଏବଂ ସେଠାରେ ବାୟୁର ମିଳନ ଘଟୁଛି, ଯାହା ଫଳରେ ସ୍ଥଳଭାଗରୁ ପବନ ସମୁଦ୍ର ଆଡ଼କୁ ଗତି କରୁଛି। କିନ୍ତୁ ୧୯-୨୦ ତାରିଖ ବେଳକୁ ସ୍ଥଳଭାଗରେ ଜଳୀୟ ବାଷ୍ପ ବଢ଼ିବା ଯୋଗୁଁ ଏଠାରେ ମଧ୍ୟ କନଭର୍ଜେନ୍ସି ଡେଭଲପ୍ କରିବ। ଏହାଦ୍ବାରା ବଙ୍ଗୋପସାଗର ଏବଂ ଆରବ ସାଗର- ଉଭୟ ପଟରୁ ପବନ ସ୍ଥଳଭାଗ ଆଡ଼କୁ ବହିବ ଏବଂ ବଙ୍ଗୋପସାଗରରେ ଲଘୁଚାପ ସୃଷ୍ଟି ହେବ।
ମୌସୁମୀ ସ୍ରୋତ ସମ୍ପୂର୍ଣ୍ଣ ସକ୍ରିୟ ହେବା ପରେ ଆକାଶ ମେଘାଚ୍ଛନ୍ନ ରହିବ, ଯାହାଫଳରେ ଘଡ଼ଘଡ଼ି ଓ ବିଜୁଳିର ସମ୍ଭାବନା କମିଯିବ ଏବଂ କେବଳ ଲଗାତାର ବର୍ଷା ହେବ। ଜୁନ୍ ୨୦ ତାରିଖରୁ ବର୍ଷାର ପରିମାଣ ଧୀରେ ଧୀରେ ବୃଦ୍ଧି ପାଇବ। ଜୁନ୍ ୨୦ରୁ ୨୨-୨୩ ତାରିଖ ମଧ୍ୟରେ ଉତ୍ତର ଓଡ଼ିଶା ଅପେକ୍ଷା ଦକ୍ଷିଣ ଓଡ଼ିଶାର ଜିଲ୍ଲାଗୁଡ଼ିକରେ ଅଧିକ ବର୍ଷା ହେବାର ସମ୍ଭାବନା ରହିଛି। ବିଶେଷ କରି ମାଲକାନଗିରି, କୋରାପୁଟ, ରାୟଗଡ଼ା, ଗଞ୍ଜାମ, ନବରଙ୍ଗପୁର, କନ୍ଧମାଳ, କଳାହାଣ୍ଡି ଏବଂ ନୟାଗଡ଼ ଆଦି ଜିଲ୍ଲାରେ ପ୍ରବଳ ବର୍ଷା ହୋଇପାରେ। ପଶ୍ଚିମ ଓଡ଼ିଶାରେ ମଧ୍ୟ ବର୍ଷା ହେବ, କିନ୍ତୁ ଏହା ଧୀରେ ଧୀରେ ବଢ଼ିବ। ୧୯ ତାରିଖ ପରେ ଉପକୂଳ ସହିତ ଆଭ୍ୟନ୍ତରୀଣ ଓଡ଼ିଶାରେ ମଧ୍ୟ ବର୍ଷାର ପ୍ରଭାବ ଦେଖିବାକୁ ମିଳିବ। ଜୁନ୍ ୨୦ରୁ ସାରା ଓଡ଼ିଶାରେ ବର୍ଷାର ପରିବେଶ ସୃଷ୍ଟି ହେବ ଏବଂ ପରବର୍ତ୍ତୀ ସମୟରେ ଜୁଲାଇ ମାସ ସୁଦ୍ଧା ସମଗ୍ର ଓଡ଼ିଶାରେ ଭଲ ବର୍ଷା ହେବାର ସମ୍ଭାବନା ରହିଛି।
ପ୍ରମେୟ ପୃଷ୍ଠାର ପ୍ରମୁଖ ଖବର: Highway accidents : ଜାତୀୟ ଓ ରାଜ୍ୟ ରାଜପଥରେ ଗୋରୁ ମାଳ ମାଳ, ଚିହ୍ନଟ ହୋଇପାରିଲାନି ହଟସ୍ପଟ୍, ଦୁର୍ଘଟଣାରେ ଯାଉଛି ଜୀବନ
