ଏବେବି ଦେଶରେ ବୁଲୁଛି ପୁରୁଣା ନୋଟ୍
ବ୍ୟାଙ୍କ ନୋଟ୍ସ ଆଇନ ୨୦୧୭ କ’ଣ କୁହେ ?
ଆଇନଗତ ଭାବରେ ୨୫ ଟି ପୁରୁଣା ନୋଟ ରଖିପାରିବେ…
ନୂଆଦିଲ୍ଲୀ : ବିମୁଦ୍ରୀକରଣର ବର୍ଷ ବର୍ଷ ପରେ ମଧ୍ୟ ଏବେ ବି ଦେଶର କେତେକ ସ୍ଥାନରୁ ପୁଳା ପୁଳା ପୁରୁଣା ୫ ଶହ ଏବଂ ୧ ହଜାର ଟଙ୍କିଆ ନୋଟ ଜବତ ହେଉଥିବା ଦେଖିବାକୁ ମିଳୁଛି । ଏଇ ଯେମିତି ନିକଟରେ ଦିଲ୍ଲୀର ୱାଜିରପୁର ଅଞ୍ଚଳରେ ଚଢାଉ ସମୟରେ କୋଟି କୋଟି ଟଙ୍କାର ୫ ଶହ ଏବଂ ୧ ହଜାର ଟଙ୍କିଆ ନୋଟ୍ ଉଦ୍ଧାର କରାଯାଇଥିଲା। ବିମୁଦ୍ରୀକରଣର ବର୍ଷ ବର୍ଷ ପରେ ମଧ୍ୟ, ଅନେକ ଲୋକ ଆଲମାରୀ, ଲକର କିମ୍ବା ପୁରୁଣା ଫାଇଲରେ ଏହି ଟଙ୍କାକୁ ସାଇତି ରଖିଛନ୍ତି। କିନ୍ତୁ ଆଇନ ପ୍ରକୃତରେ କ'ଣ କୁହେ ? ଆସନ୍ତୁ ଜାଣିବା ଯେ ଗୋଟିଏ ପୁରୁଣା ନୋଟ୍ ରଖିବା ଦ୍ୱାରା ଦଣ୍ଡ ହୋଇପାରେ କି ନାହିଁ…
ପୁରୁଣା ନୋଟ୍ ରଖିବା ସମ୍ପର୍କରେ କ’ଣ କହେ ଆଇନ ?
ପୁରୁଣା ୫ ଶହଏ ବଂ ୧ ହଜାର ଟଙ୍କିଆ ନୋଟ୍ ସହିତ ଜଡିତ ନିୟମ ଗୁଡ଼ିକ ନିର୍ଦ୍ଦିଷ୍ଟ ବ୍ୟାଙ୍କ ନୋଟ୍ସ ଆଇନ ୨୦୧୭ ଦ୍ୱାରା ନିୟନ୍ତ୍ରିତ, ଯାହା ବିମୁଦ୍ରୀକରଣ ପରେ କାର୍ଯ୍ୟକାରୀ ହୋଇଥିଲା। ଏହି ଆଇନ ଅନୁଯାୟୀ, ଅଳ୍ପ ସଂଖ୍ୟକ ବିମୁଦ୍ରୀକରଣ ନୋଟ୍ ରଖିବା ଅପରାଧ ନୁହେଁ। ଏହି ଆଇନ ବ୍ୟକ୍ତିବିଶେଷଙ୍କୁ କୌଣସି ଦଣ୍ଡ ବିନା ସୀମିତ ସଂଖ୍ୟକ ନୋଟ୍ ରଖିବାକୁ ଅନୁମତି ଦିଏ।
କେତେ ପୁରୁଣା ନୋଟ୍ ରଖିହେବ ?
ଆପଣ ଆଇନଗତ ଭାବରେ ମୋଟ ୧୦ଟି ବିମୁଦ୍ରୀକରଣ ନୋଟ୍ ରଖିପାରିବେ। ସେଗୁଡ଼ିକ ୫ଶହ ହେଉ କିମ୍ବା ୧ ହଜାର ନୋଟ ହେଉ । ଯେପର୍ଯ୍ୟନ୍ତ ଆପଣ ଏହି ସୀମା ମଧ୍ୟରେ ରହିଥିବେ, ସେପର୍ଯ୍ୟନ୍ତ କୌଣସି କର୍ତ୍ତୃପକ୍ଷଙ୍କ ନିକଟରେ ଘୋଷଣା କରିବା, କିମ୍ବା ଆତ୍ମସମର୍ପଣ କରିବା କିମ୍ବା ରିପୋର୍ଟ କରିବାର ଆବଶ୍ୟକତା ନାହିଁ।
ସଂଗ୍ରହକ ଏବଂ ଗବେଷକ ହୋଇଥିଲେ…
କିଛି ଲୋକ ଶିକ୍ଷାଗତ କିମ୍ବା ଶୌକ ଉଦ୍ଦେଶ୍ୟରେ ପୁରୁଣା ଟଙ୍କା ରଖିଥାନ୍ତି। ଯଦି କୌଣସି ବ୍ୟକ୍ତି ଜଣେ ମୁଦ୍ରାବିଜ୍ଞ, ଗବେଷକ କିମ୍ବା ମୁଦ୍ରା ସଂଗ୍ରହକାରୀ ହୋଇଥାନ୍ତି ସେ ଆଇନଗତ ଭାବରେ ୨୫ ଟି ପୁରୁଣା ନୋଟ୍ ରଖିବାର ଅନୁମତି ପାଇପାରିବେ । ଏଗୁଡ଼ିକୁ କଠିନ ଭାବରେ ଅଧ୍ୟୟନ, ପ୍ରଦର୍ଶନୀ କିମ୍ବା ସଂଗ୍ରହ ଉଦ୍ଦେଶ୍ୟରେ ରଖାଯାଇପାରିବ, କିନ୍ତୁ କାରବାର କିମ୍ବା ଆର୍ଥିକ ଉଦ୍ଦେଶ୍ୟରେ ବ୍ୟବହାର କରାଯାଇପାରିବ ନାହିଁ।
ସୀମା ଅତିକ୍ରମ କଲେ କ'ଣ ହେବ?
ଯଦି କେହି ଅନୁମତି ପ୍ରାପ୍ତ ଠାରୁ ଅଧିକ ପୁରୁଣା ନୋଟ୍ ରଖିବାରେ ଧରାପଡ଼େ, ତେବେ ଆର୍ଥିକ ଅପରାଧ ସ୍ୱଭାବର ହେବ, ଅପରାଧିକ ନୁହେଁ। ଦଣ୍ଡରେ କେବଳ ଆର୍ଥିକ ଜରିମାନା ଅନ୍ତର୍ଭୁକ୍ତ, କାରାଦଣ୍ଡ ନୁହେଁ। ସର୍ବନିମ୍ନ ଜରିମାନା ୧୦ ହଜାର କିନ୍ତୁ ଏହା ଜବତ ହୋଇଥିବା ଅଧିକ ନୋଟର ମୂଲ୍ୟର ୫ ଗୁଣ ପର୍ଯ୍ୟନ୍ତ ହୋଇପାରେ।
କୌଣସି ଜେଲ ଦଣ୍ଡ ନାହିଁ…
ଗୁରୁତ୍ୱପୂର୍ଣ୍ଣ କଥା ହେଉଛି, ୨୦୧୭ ଆଇନ ଅନୁଯାୟୀ, ବିପୁଳ ପରିମାଣର ବିମୁଦ୍ରୀକରଣ ନୋଟ୍ ରଖିବା ପାଇଁ କୌଣସି ଜେଲ୍ ଦଣ୍ଡ ହେବ ନାହିଁ। ଜେଲ୍ ଦଣ୍ଡ କେବଳ ସେତେବେଳେ ହୁଏ ଯେତେବେଳେ ଅନ୍ୟ ଗୁରୁତର ଅପରାଧ ଜଡିତ ଥାଏ।
ଏହା ସହ ପଢନ୍ତୁ : ୟୁପିରେ ପଙ୍କଜ, ଦେଶରେ ନୀତିନ…ଗୋଟିଏ ଦିନରେ ଦୁଇ ଦୁଇଟି ବଡ ସରପ୍ରାଇଜ୍ ଦେଲା ବିଜେପି,ଏହା ନୁହେଁ ତ ମୋଦୀ-ଶାହଙ୍କ ସରପ୍ରାଇଜ୍ ପଛର ସିକ୍ରେଟ ?
