ରିଆମାଳ, ୨୯/୦୮: ଦେବଗଡ଼ ଜିଲ୍ଲା ରିଆମାଳ ବ୍ଲକ କୁଣ୍ଢେଇଗୋଳା ଥାନା କୋରଡପସି ଗାଁର ସ୍ଵର୍ଗତ କୁଞ୍ଜବିହାରୀ ପ୍ରଧାନଙ୍କ ସ୍ତ୍ରୀ ରଙ୍ଗବତୀ ପ୍ରଧାନ (୭୦ ବର୍ଷ) ପ୍ରାୟ ୪ ଦିନ ହେଲା ନିଖୋଜ ଥିଲେ । ଶୁକ୍ରବାର କୁଣ୍ଢେଇଗୋଳା ସ୍ଥିତ ଟିକିରା ନଦୀକୂଳରୁ ତାଙ୍କ ମୃତଦେହ ଉଦ୍ଧାର କରାଯାଇଛି । ତାଙ୍କ ମୃତ୍ୟୁର କାରଣ ସ୍ପଷ୍ଟ ହୋଇନଥିବା ବେଳେ ଗାଧୋଇବାକୁ ଆସି ପାଣିରେ ବୁଡି ମୃତ୍ୟୁ ଘଟିଥିବା ଅନୁମାନ କରାଯାଉଛି ।
ସୂଚନା ମୁତାବକ, କୋରଡପସି ଗାଁର ସ୍ଵର୍ଗତ କୁଞ୍ଜବିହାରୀ ପ୍ରଧାନଙ୍କ ସ୍ତ୍ରୀ ରଙ୍ଗବତୀ ପ୍ରଧାନ ପ୍ରାୟ ୪ ଦିନ ହେଲା ନିଖୋଜ ଥିଲେ। ଏନେଇ ରଙ୍ଗବତୀଙ୍କ ପୁଅ କୁଣ୍ଢେଇଗୋଳା ଥାନାରେ ନିଖୋଜ ଅଭିଯୋଗ ମଧ୍ଯ କରିଥିଲେ । ତାଙ୍କୁ ବିଭିନ୍ନ ସ୍ଥାନରେ ଖୋଜାଖୋଜି ମଧ୍ୟ କରିଥିଲେ । ସ୍ଥାନୀୟ କିଛି ଲୋକ କୁଣ୍ଢେଇଗୋଳା ସ୍ଥିତ ଟିକିରା ନଦୀକୂଳରେ ଶୁକ୍ରବାର ତାଙ୍କ ମୃତଦେହ ଭାସୁଥିବା ଦେଖିବାକୁ ପାଇଥିଲେ । ଏନେଇ ମୃତକଙ୍କ ପରିବାର ଲୋକଙ୍କୁ ସୂଚନା ଦିଆଯାଇଥିଲା । ପରିବାର ଲୋକ ଘଟଣାସ୍ଥଳକୁ ଆସି ମୃତଦେହ ଚିହ୍ନଟ କରିବା ସହିତ କୁଣ୍ଢେଇଗୋଳା ଥାନା ପୁଲିସକୁ ଖବର ଦେଇଥିଲେ। ଖବର ପାଇ ପୁଲିସ ଘଟଣା ସ୍ଥଳରେ ପହଞ୍ଚି ବୃଦ୍ଧାଙ୍କ ଗଳିତ ମୃତଦେହ ଉଦ୍ଧାର କରିବା ସହ ଶୁକ୍ରବାର ସକାଳ ପ୍ରାୟ ୯ଟାରେ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି । ମୃତ୍ୟୁର କାରଣ ସ୍ପଷ୍ଟ ହୋଇନଥିବା ବେଳେ ଗାଧୋଇବାକୁ ଆସି ପାଣିରେ ବୁଡି ମୃତ୍ୟୁ ଘଟିଥିବା ଅନୁମାନ କରାଯାଉଛି । ଅନ୍ୟପଟେ ଘଟଣାସ୍ଥଳରୁ ମୃତଦେହ ଉଦ୍ଧାର କରି ବ୍ଯବଚ୍ଛେଦ ପାଇଁ ପଠାଇ ଥିବା ବେଳେ ପୁଲିସ ତଦନ୍ତ କରୁଥିବା ଜଣାପଡିଛି ।
