ବୌଦ୍ଧ,୧୦/୧୧: ରାତିରେ ଶୋଇଥିବା ବେଳେ ଅଘଟଣ । ଚିତି ସାପ କାମୁଡ଼ାରେ ପ୍ରାଣ ହରାଇଲେ ବୃଦ୍ଧା । ମୃତକ ବଗିଚାସାହିର ପଦ୍ମିନୀ ଶତପଥୀ ବୋଲି ଜଣାପଡ଼ିଛି । ବୌଦ୍ଧ ଜିଲ୍ଲା ବଗିଚାସାହି ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବୃଦ୍ଧା ଜଣକ ରାତ୍ରି ଭୋଜନ ସାରି ଘରେ ଶୋଇଥିଲେ । ଶୋଇଥିବା ବେଳେ ବିଳମ୍ୱିତ ରାତିରେ ଏକ ଚିତି ସାପ ବୃଦ୍ଧାଙ୍କୁ କାମୁଡ଼ି ଦେଇଥିଲା । ସେ ଯନ୍ତ୍ରଣାରେ ଚିତ୍କାର କରିଥିଲେ । ଚିତ୍କାର ଶୁଣି ବୃଦ୍ଧାଙ୍କ ପରିବାର ଲୋକେ ଦୌଡ଼ି ଆସିଥିଲେ । ବୃଦ୍ଧା ଜଣକ ଯନ୍ତ୍ରଣାରେ ଛଟପଟ ହେଉଥିବାର ଦେଖି ତୁରନ୍ତ ଏକ ଆମ୍ୱୁଲାନ୍ସକୁ କଲ୍ କରି ଡାକିଥିଲେ । କିଛି ସମୟ ମଧ୍ୟରେ ଆମ୍ୱୁଲାନ୍ସଟି ଆସି ଘଟଣାସ୍ଥଳରେ ପହଞ୍ଚି ଥିଲା । ଉକ୍ତ ଆମ୍ୱୁଲାନ୍ସ ଯୋଗେ ବୃଦ୍ଧାକୁ ତାଙ୍କ ପରିବାର ଲୋକେ ଜିଲ୍ଲା ମୁଖ୍ୟ ଡାକ୍ତରଖାନାକୁ ନେଇଥିଲେ । ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା ।
