ମାଲକାନଗିରି ,୩/୧୨ : ବ୍ୟାଙ୍କରେ ନୂଆ ଆକାଉଣ୍ଟ ଖୋଲିବ କହି ଠକେଇ । ଏଭଳି ଏକ ଘଟଣା ମାଲକାନଗିରି ଅଞ୍ଚଳରେ ଦେଖିବାକୁ ମିଳିଛି । ଅଭିଯୁକ୍ତ ହେଲା ବୌଦ୍ଧ ଜିଲ୍ଲା ମନମୁଣ୍ଡା ଥାନାସ୍ଥ ଖଲିଆପାଲି ଗ୍ରାମର ହରେଶ କୁମ୍ଭାର (୩୩) । ସରକାରଙ୍କ ନୂଆ ଯୋଜନା ଆସିଛି କହି ଗ୍ରାମାଞ୍ଚଳ ଲୋକଙ୍କ ନାଁରେ ନୂଆ ବ୍ୟାଙ୍କ ଆକାଉଣ୍ଟ ଖୋଲି ଅଭିନବ ଉପାୟରେ ସାଇବରକ୍ରାଇମରେ ସହଯୋଗ କରୁଥିଲା । ପୁଲିସ ତାକୁ ଗିରଫ କରି ମଙ୍ଗଳବାର କୋର୍ଟ ଚାଲାଣ କରିଛି ।
ସୂଚନା ଅନୁସାରେ, ୨୦୨୪ମସିହାରେ ବୌଦ୍ଧ ଅଞ୍ଚଳରୁ ହରେଶ ମାଲକାନଗିରି ଥାନାସ୍ଥ କୁକୁଡ଼ାଗୁଡା ଗ୍ରାମକୁ ଆସିଥିଲେ। ନିରୀହ ଗ୍ରାମବାସୀମାନଙ୍କୁ ପ୍ରଲୋଭିତ କରି କହିଥିଲା ରାଜ୍ୟ ସରକାରଙ୍କ ଦ୍ୱାରା "ସୁଭଦ୍ରା ଯୋଜନା" ଭଳି ଏକ ନୂତନ ଯୋଜନା ଆରମ୍ଭ କରାଯାଇଛି ଏବଂ ପ୍ରତି ମାସରେ ସେମାନଙ୍କ ଆକାଉଣ୍ଟରେ ଦୁଇ ହଜାର ଟଙ୍କା ନଗଦ ଜମା ହେବ। ତେଣୁ ନୂଆ ଆକାଉଣ୍ଟ ଖୋଲି ନୂଆ ଫୋନ ନମ୍ବର ଦେବାକୁ ପଡ଼ିବ। ସେମାନେ ନିର୍ଦ୍ଦୋଷ ଗ୍ରାମବାସୀଙ୍କୁ ନୂତନ ସିମ୍ କାର୍ଡ ପାଇବା ପାଇଁ, ପ୍ରତି ମାସରେ ନୂତନ ବ୍ୟାଙ୍କ ଆକାଉଣ୍ଟ ଖୋଲିବା ପାଇଁ ପ୍ରଲୋଭିତ କରିଥିଲେ । ପ୍ରତ୍ୟେକ ବ୍ୟକ୍ତିଙ୍କୁ ନୂତନ ଆକାଉଣ୍ଟ ଖୋଲିବା ପାଇଁ ଏବଂ ନୂତନ ସିମ୍ କାର୍ଡ ପାଇବା ପାଇଁ ଏକ ହଜାର ଟଙ୍କା ନଗଦ ଦେଇଥିଲେ ।
ଗ୍ରାମବାସୀମାନେ ନୂତନ ସିମ୍ କାର୍ଡ କିଣିଥିଲେ, ବିଭିନ୍ନ ବ୍ୟାଙ୍କରେ ନୂତନ ବ୍ୟାଙ୍କ ଆକାଉଣ୍ଟ ଖୋଲିଥିଲେ ଏବଂ ସମ୍ପୃକ୍ତ ଆକାଉଣ୍ଟରେ ନୂତନ ମୋବାଇଲ୍ ନମ୍ବର ପଞ୍ଜିକୃତ କରିଥିଲେ । କିଛିଦିନ ପରେ ସେ ବ୍ୟକ୍ତି ଗ୍ରାମବାସୀଙ୍କଠାରୁ ଆକାଉଣ୍ଟ, ଏଟିଏମ, ସିମ କାର୍ଡ ଯାଞ୍ଚ କରାଯିବ କହିଥିଲେ ଓ ଯାଞ୍ଚର ୧୫ଦିନ ପରେ ଫେରସ୍ତ କରିବାର ପ୍ରତିଶ୍ରୁତି ଦେଇ ଗ୍ରାମବାସୀଙ୍କୁ ଯାଞ୍ଚ ପାଇଁ ସମସ୍ତ ବ୍ୟାଙ୍କ ଆକାଉଣ୍ଟ, ଏଟିଏମ କାର୍ଡ ଏବଂ ମୋବାଇଲ୍ ନମ୍ବର ଦେବାକୁ କହିଥିଲେ । ସରକାରଙ୍କଠାରୁ ଟଙ୍କା ପାଇବା ଆଶା ଓ ବିଶ୍ୱାସରେ ଗ୍ରାମବାସୀ ଅଭିଯୁକ୍ତ ହରେଶ କୁମ୍ଭାରଙ୍କୁ ସମସ୍ତ ବ୍ୟାଙ୍କ ଆକାଉଣ୍ଟ, ଏଟିଏମ କାର୍ଡ ଏବଂ ମୋବାଇଲ୍ ନମ୍ବର (ସିମ୍ କାର୍ଡ) ଦେଇଥିଲେ। ଏହାପରେ ହରେଶ ସେହି ଆକାଉଣ୍ଟଗୁଡ଼ିକୁ ବିହାରର ରାହୁଲ କୁମାର, ବିପିନ୍ କୁମାର ଏବଂ ଦିବାକର କୁମାରଙ୍କୁ ହସ୍ତାନ୍ତର କରିଥିଲେ ଏବଂ ପ୍ରତ୍ୟେକ ଆକାଉଣ୍ଟ ପାଇଁ ୧୦ହଜାର ଲେଖା ଟଙ୍କା ନଗଦ ପାଇଥିଲେ । ତା’ପରେ ଉକ୍ତ ଆକାଉଣ୍ଟ, ସିମ, ଏଟିଏମ କାର୍ଡ ଗୁଡ଼ିକୁ ବିଭିନ୍ନ ଠକେଇ କାରବାରରେ ବ୍ୟବହାର କରାଯାଇଥିଲା ।
ତଦନ୍ତ ସମୟରେ ଏହା ମଧ୍ୟ ଜଣାପଡ଼ିଛି ଯେ ଅଭିଯୁକ୍ତ ବ୍ୟକ୍ତି ଆକାଉଣ୍ଟଧାରୀଙ୍କୁ କିଛି ଟଙ୍କା ଦେଇଛନ୍ତି, କିନ୍ତୁ ଆକାଉଣ୍ଟଧାରୀମାନେ ସରକାରଙ୍କଠାରୁ ଟଙ୍କା ପାଇଛନ୍ତି ବୋଲି ବିଶ୍ୱାସ କରିଛନ୍ତି। ସେମାନଙ୍କ ଆକାଉଣ୍ଟ ଦ୍ୱାରା ସାଇବର ଅପରାଧ ହେଉଥିବା ବିଷୟରେ ଜାଣିପାରି ନାହାଁନ୍ତି । ବୌଦ୍ଧ ଜିଲ୍ଲା ମନମୁଣ୍ଡା ଥାନା ସ୍ଥ ଖଲିଆପାଲି ଗ୍ରାମର ହରେଶକୁ ମାଲକାନଗିରି ଆଦର୍ଶ ଥାନାର ସ୍ୱତନ୍ତ୍ର ପୁଲିସ ଟିମ ଯାଇ ୧ତାରିଖରେ ଗିରଫ କରି ମାଲକାନଗିରି ଆଣିଥିଲେ । ସାକ୍ଷୀ ପ୍ରମାଣ ତଦନ୍ତ ପରେ ମଙ୍ଗଳବାର ଅଭିଯୁକ୍ତକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ମାଲକାନଗିରି ଜିଲ୍ଲାର କୁକୁଡ଼ାଗୁଡା, ଜିଲେନିଗୁଡା, ଏରାକୁସମୀ, ଗଡିଆପୁଟ ଗ୍ରାମର ୨୦ଜଣ ପୁରୁଷ ଓ ମହିଳାଙ୍କ ନାମରେ ସାଇବର ଠକମାନେ ଖୋଲିଥିବା ୨୦ଟି ଆକାଉଣ୍ଟକୁ ବ୍ୟାଙ୍କକୁ ସୂଚନା ଦିଆଯାଇ ଲକ କରିଦିଆ ଯାଇଛି । ଏହି ସାଇବର ଅପରାଧରେ ଆଉ କିଏ ସମ୍ପୃକ୍ତି ଥିବାର ସନ୍ଦେହରେ ତଦନ୍ତ ଜାରି ରହିଛି ବୋଲି ମାଲକାନଗିରି ଆଦର୍ଶ ଥାନା ଆଇଆଇସି ରିଗାନ କିଣ୍ଡୋ ସୂଚନା ଦେଇଛନ୍ତି ।
