ନୂଆଦିଲ୍ଲୀ,୨୦/୦୮: ଅନ୍ଲାଇନ୍ ଗେମ୍ ଉପରେ ଲାଗିଲା ଅଙ୍କୁଶ । ଅନଲାଇନ୍ ଗେମିଂ ଓ ଜୁଆ ଉପରେ ଲାଗିବ ବ୍ରେକ । ସଂସଦରେ କେନ୍ଦ୍ର ସରକାର ଆଗତ କରିଛନ୍ତି ଅନଲାଇନ ଗେମିଂ ବିଲ୍ ୨୦୨୫ । ଗତକାଲି ଏହି ବିଲକୁ କେନ୍ଦ୍ର କ୍ୟାବିନେଟ ମଞ୍ଜୁରୀ ଦେଇଛି । ଅନଲାଇନ ଜୁଆ ଉପରେ କଟକଣା ଲଗାଇବା ପାଇଁ ଆସିବ ଏହି ବିଲ୍ । ଇଲେକ୍ଟ୍ରୋନିକ୍ସ ଓ ଇନଫର୍ମେସନ ମିନିଷ୍ଟ୍ରି ପକ୍ଷରୁ ଏହି ବିଲ ଆଗତ କରାଯାଇଛି । କେନ୍ଦ୍ର ସୂଚନା ଓ ପ୍ରଯୁକ୍ତିବିଦ୍ୟା ମନ୍ତ୍ରୀ ଅଶ୍ବିନୀ ବୈଷ୍ଣବ ଏହି ବିଲ୍ ଉପସ୍ଥାପିତ କରିଛନ୍ତି । ବେଟିଂ ସହ ଜଡିତ ଅନଲାଇନ୍ ଟଙ୍କା ଖେଳକୁ ନିଷିଦ୍ଧ କରିବା ବିଲ୍ର ଲକ୍ଷ୍ୟ ରହିଛି ।
ମୁଖ୍ୟତଃ ଅନଲାଇନ ଜୁଆକୁ ରୋକିବା ଦିଗରେ ଏହି ବିଲ୍ରେ ପ୍ରାବଧାନ ଥିବା କୁହାଯାଉଛି । ରିଅଲ ମନି ଗେମିଂ ଆପ୍ ଉପରେ ଏହି ବିଲ୍ ଅଙ୍କୁଶ ଲଗାଇବ । କେବଳ ସେତିକି ନୁହେଁ ଏହାର ପ୍ରଚାର ପ୍ରସାର ଉପରେ ବି ରୋକ ଲଗାଇବା ପାଇଁ ବିଲ୍ ଆଣୁଛନ୍ତି କେନ୍ଦ୍ର ସରକାର । ଆଜି ସଂସଦରେ ପ୍ରମୋସନ ଆଣ୍ଡ ରେଗୁଲେସନ ଅଫ ଅନଲାଇନ ଗେମିଂ ବିଲ୍ ୨୦୨୫ ଉପସ୍ଥାପନ ହୋଇପାରେ । ଏହି ବିଲ୍ ସମସ୍ତ ଟଙ୍କା-ଭିତ୍ତିକ ଅନଲାଇନ୍ ଗେମକୁ ବେଆଇନ ଘୋଷଣା କରିବ ।
ଏପରି ପ୍ଲାଟଫର୍ମକୁ ପ୍ରୋତ୍ସାହିତ କରୁଥିବା ବିଜ୍ଞାପନଗୁଡ଼ିକୁ ନିଷିଦ୍ଧ କରିବ । ନିୟମ ନମାନିଲେ ୩ ବର୍ଷ ପର୍ଯ୍ୟନ୍ତ ଜେଲ୍ ଏବଂ ଜରିମାନା ହୋଇପାରେ । ସେପଟେ ଲୋକସଭାରେ ଉପସ୍ଥିତ ରହିବାକୁ ହ୍ବିପ୍ ଜାରି କରିଛି ବିଜେପି । ସମସ୍ତ ଦଳୀୟ ସାଂସଦଙ୍କୁ ଉପସ୍ଥିତ ରହିବାକୁ ଜାରି କଲା ହ୍ବିପ୍ । ଗୁରୁତ୍ବପୂର୍ଣ୍ଣ ସଂସଦୀୟ କାର୍ଯ୍ୟ ଥିବାରୁ ବିଜେପି ହ୍ବିପ୍ ଜାରି କରିଛି ।
ବିଲ୍ରେ କ’ଣ ଅଛି ?
ଡ୍ରାଫ୍ଟ ବିଲ୍ ଅନୁଯାୟୀ, ଆଇନ ଉଲ୍ଲଂଘନ କରି ଅନଲାଇନ୍ ମନି ଗେମ୍ ସେବା ପ୍ରଦାନ କରୁଥିବା ଯେକୌଣସି ବ୍ୟକ୍ତିଙ୍କୁ ତିନି ବର୍ଷ ପର୍ଯ୍ୟନ୍ତ ଜେଲ୍ କିମ୍ବା ୧ କୋଟି ଟଙ୍କା ପର୍ଯ୍ୟନ୍ତ ଜରିମାନା ହୋଇପାରେ । ଏପରି ସେବା ବିଜ୍ଞାପନ କରୁଥିବା ବ୍ୟକ୍ତିମାନଙ୍କୁ ୨ ବର୍ଷ ପର୍ଯ୍ୟନ୍ତ ଜେଲ୍ କିମ୍ବା ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ହୋଇପାରେ। ମନି ଗେମ୍ ପାଇଁ କାରବାର ସୁବିଧା ପ୍ରଦାନ କରୁଥିବା ବ୍ୟାଙ୍କ ଏବଂ ଆର୍ଥିକ ପ୍ରତିଷ୍ଠାନଗୁଡ଼ିକ ମଧ୍ୟ ତିନି ବର୍ଷ ପର୍ଯ୍ୟନ୍ତ ଜେଲ କିମ୍ବା ୧ କୋଟି ଟଙ୍କା ଜରିମାନା ସହିତ ଦଣ୍ଡ ପାଇଁ ଦାୟୀ ରହିବେ ।
