ନୂଆଦିଲ୍ଲୀ,୬/୦୭: ପୂର୍ବ ଯୋଜନା ତୁଳନାରେ ଓପେକ୍ ପ୍ଲସ ଦେଶ ଗୁଡ଼ିକ ଅଗଷ୍ଟରେ ତେଲ ଉତ୍ପାଦନ ବଢ଼ାଇବେ । ମେ, ଜୁନ ଏବଂ ଜୁଲାଇରେ ଏହି ଦେଶ ଗୁଡ଼ିକ ଦୈନିକ ୪.୧୧ ଲକ୍ଷ ବ୍ୟାରେଲ ଅଶୋଧିତ ତେଲ ଉତ୍ତୋଳନ କରିଥିଲେ । ଏହାକୁ ସେମାନେ ୫.୪୮ ଲକ୍ଷ ବ୍ୟାରେଲକୁ ବଢ଼ାଇବା ନେଇ ବର୍ତ୍ତମାନ ସହମତ ହୋଇଛନ୍ତି । ଉତ୍ପାଦନରେ ଏହି ଧାରା ଆଗକୁ ମଧ୍ୟ ବୃଦ୍ଧି ହୋଇପାରେ । ଏହା ହେଲେ ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ଦର ଆହୁରି କମିବାର ଢ଼େର ସମ୍ଭାବନା ଅଛି । ଏହା ଦ୍ୱାରା ଭାରତ ଲାଭବନା ହୋଇପାରିବ ବୋଲି କୁହାଯାଉଛି ।
ସାଉଦି ଆରବ ନେତୃତ୍ୱାଧୀନ ଓପେକ୍ ଦେଶ ଗୁଡ଼ିକ ସେମାନଙ୍କ ପୂର୍ବ ଆଭିମୁଖ୍ୟ ବଦଳାଇଛନ୍ତି । ଦର ନିୟନ୍ତ୍ରଣ ପରିବର୍ତ୍ତେ ସେମାନେ ଏବେ ବଜାର ଅଂଶ ହାସଲ କରିବାକୁ ପ୍ରାଥମିକତା ଦେଉଛନ୍ତି । ପୂର୍ବରୁ ଏମାନେ ଅପେକ୍ଷାକୃତ କମ୍ ତେଲ ଉତ୍ପାଦନ କରୁଥିଲେ କିମ୍ବା ଉତ୍ପାଦନକୁ ନିୟନ୍ତ୍ରିତ କରୁଥିଲେ । ମାତ୍ର ଏହି ଦେଶ ଗୁଡ଼ିକ ଏବେ ଯୋଗାଣ ତ୍ୱରାନ୍ୱିତ କରୁଛନ୍ତି । ତେଲ ଉତ୍ପାଦନକାରୀ ଦେଶ ଗୁଡ଼ିକର ଆଭିମୁଖ୍ୟରେ ଏହି ପରିବର୍ତ୍ତନ ଏବେ ଟ୍ରେଡରଭ୍କୁ ଆଶ୍ଚର୍ଯ୍ୟ କରିଛି ।
ଦୀର୍ଘ ମିଆଦି ଭିତ୍ତିରେ ଦେଶ ଗୁଡ଼ିକ ଏହି ନୀତି ଆପଣାଇବେ କି ନାହିଁ ତାକୁ ମଧ୍ୟ ନେଇ ଏବେ ଜୋରଦାର ଚର୍ଚ୍ଚା ହେଉଛି । ଚଳିତ ବର୍ଷ ଅଦ୍ୟାବଧି ବ୍ରେଣ୍ଟ ଅଶୋଧିତ ତେଲ ଦର ୮.୫% ହ୍ରାସ ହେଲାଣି । ବଜାରରେ ଅତ୍ୟଧିକ ତେଲ ଉପଲବ୍ଧତା ଏବଂ ଟ୍ରମ୍ପଙ୍କ ପାଲଟା ଟିକସ ଯୋଗୁ ଅର୍ଥନୀତିକୁ ଝଟ୍କା ଲାଗିବା ଆଶଙ୍କା ରହିଛି । ଏଭଳି ପ୍ରମୁଖ କାରଣ ଯୋଗୁ ଅଶୋଧିତ ତେଲ ଦର ହ୍ରାସ ହେଉଛି ।
ତେବେ ସ୍ୱଳ୍ପ ମିଆଦି ଭିତ୍ତିରେ ତେଲ ଚାହିଦା ଦୃଢ଼ ରହିପାରେ ବୋଲି ବିଶେଷଜ୍ଞ ଆକଳନ କରିଛନ୍ତି । ଆମେରିକା ଭିତ୍ତିକ କମ୍ପାନି ଗୁଡ଼ିକର ବିଶୋଧନ କ୍ଷମତା ୨୦୧୯ ପରଠୁ ରେକର୍ଡ ସ୍ତରରେ ରହିଛି । ଆମେରିକାର ତେଲ ବଜାରରେ ଉନ୍ନତ ଅଂଶ ହାସଲ ଓପେକ୍ ଦେଶ ଗୁଡ଼ିକୁ ହଜମ ହେଉନି । ବଜାର ଅଂଶ ପୁଣି ଥରେ ଦୃଢ଼ କରିବାକୁ ଚାହୁଁଛି ସାଉଦି ଆରବ । ଅଗଷ୍ଟର ଉତ୍ପାଦନ ଲକ୍ଷ୍ୟ ଅନୁସାରେ ଓପେକ୍ ପ୍ଲସ ଦେଶ ଗୁଡ଼ିକ ପୁଣି ଥରେ ଦୈନିକ ୨.୨ ନିୟୁତ ବ୍ୟାରେଲ ସ୍ତରକୁ ଫେରିବେ । ତେବେ ତେଲ ଉତ୍ପାଦନରେ ଏହି ବୃଦ୍ଧି ସାମାନ୍ୟ ବୋଲି କୁହାଯାଉଛି ।
ଅଗଷ୍ଟରେ ଦୈନିକ ୪.୧୧ ଲକ୍ଷ ବ୍ୟାରେଲ ଉତ୍ପାଦନ ରହିପାରେ ବୋଲି ଟ୍ରେଡର ମାନେ ମତ ରଖିଥିବା ବ୍ଲୁମବର୍ଗ ସର୍ଭେରୁ ଜଣାପଡ଼ିଛି । ଅତ୍ୟଧିକ ତେଲ ଉତ୍ପାଦନ ଆମେରିକାକୁ ଆଶ୍ୱସ୍ତି ଦେଇପାରେ । ଫେଡେରାଲ ରିଜର୍ଭ ସୁଧହାର କମାଇବାରେ ଏହା ସହାୟକ ହେବ ।
ମାତ୍ର ଉତ୍ପାଦନ ବଢ଼ିଲେ ମାତ୍ରାଧିକ ଯୋଗାଣ ଯୋଗୁ ଦର ପ୍ରଭାବିତ ରହିବ । ତୈଳ କୂପ ଗୁଡ଼ିକରେ ଅତିରିକ୍ତ ୧ ନିୟୁତ ବ୍ୟାରେଲ ତେଲ ଷ୍ଟକ ରହୁଛି । ଆମେରିକା, ଗୁଏନା, କାନାଡା ଏବଂ ବ୍ରାଜିଲରେ ଉତ୍ପାଦନ ବଢ଼ିବାରୁ ଚୀନରେ ଚାହିଦା କମିଛି । ବଜାରରେ ଏବର୍ଷ ବଳକା ତେଲ ରହିବ ବୋଲି ପ୍ୟାରିସ ଭିତ୍ତିକ ଅନ୍ତର୍ଜାତୀୟ ଏନର୍ଜି ଏଜେନ୍ସି କହିଛି ।
୪ର୍ଥ ତ୍ରୈମାସ ବେଳକୁ ଅଶୋଧିତ ତେଲ ବ୍ୟାରେଲ ପିଛା ୬୦ ଡଲାରକୁ ଖସିପାରେ ବୋଲି ଜେପି ମୋର୍ଗାନ ଏବଂ ଗୋଲ୍ଡ ମ୍ୟାନ ସ୍ୟାଚ୍ ପକ୍ଷରୁ ଆକଳନ କରାଯାଇଛି । ଗତ ମାସରେ ଇରାନ ଇସ୍ରାଏଲ ଯୋଗୁ ତେଲ ଦର ଉପର ମୁହାଁ ହୋଇଥିଲା ।
