ନୂଆଦିଲ୍ଲୀ,୧୦/୦୫: ଭାରତର ମୋଷ୍ଟ ୱାଣ୍ଟେଡ ତାଲିକାରେ ଥିବା ଅଣ୍ଡରୱାର୍ଲଡ ଡନ୍ମାନଙ୍କୁ ଛନକା ପଶିଛି । ଗିରଫ ଭୟରେ ସେମାନେ ପାକିସ୍ତାନର ବିଭିନ୍ନ ପ୍ରମୁଖ ସହରରେ ଆତ୍ମଗୋପନ କରିଥିଲେ । ପାକ୍ ସରକାର ସେମାନଙ୍କୁ ଆରାମରେ ରହିବାକୁ ଅନୁମତି ଦେଇଥିଲା । କିନ୍ତୁ ଏବେ ଭାରତର ଅପରେସନ ‘ସିନ୍ଦୂର’ ଯୋଗୁ ପାକିସ୍ତାନ ଥରହର । କରାଚୀଠାରୁ ଲାହୋର ପର୍ଯ୍ୟନ୍ତ ସବୁଠି ଭାରତୀୟ ମିସାଇଲ ଓ ଡ୍ରୋନ୍ ହମଲା ହେଉଛି । ଫଳରେ ଅଣ୍ଡରୱାର୍ଲଡ ଡନ୍ମାନେ ଥଳକୂଳ ନ ପାଇ ଅନ୍ୟ କେଉଁଆଡ଼େ ପଳାୟନ କରୁଛନ୍ତି । ତାଲିକାର ପ୍ରଥମ ସ୍ଥାନରେ ଥିବା ଦାଉଦ ଇବ୍ରାହିମ କରାଚୀର କ୍ଲିଫ୍ଟନ ଅଞ୍ଚଳରେ ରହୁଥିଲା । ଏବେ ସେଠାରେ ସେ ନ ଥିବା ରିପୋର୍ଟ ଆସିଛି ।
ରିପୋର୍ଟ ମୁତାବକ, ପାକିସ୍ତାନର ଗୁଇନ୍ଦା ସଂସ୍ଥା ଆଇଏସ୍ଆଇ ଦାଉଦ ଇବ୍ରାହିମ ଓ ତା’ର ପରିବାରକୁ ଦେଶର ଅନ୍ୟ କୌଣସି ସ୍ଥାନକୁ ନେଇଯାଇଛି । ୨୦୦୧ରୁ ଦାଉଦ କରାଚୀରେ ରହିଆସୁଥିଲା । ଅନ୍ୟ କେତେକ ସୂତ୍ରରୁ ପ୍ରକାଶ, ଭାରତ ଅପରେସନ ସିନ୍ଦୂରରେ ଯେଉଁଭଳି ଭାବେ କରାଚୀ ଉପରେ ବାରମ୍ବାର ଡ୍ରୋନ୍ ଓ ମିସାଇଲ ହମ୍ଲା କଲା, ତାହାଦ୍ୱାରା ଦାଉଦର ଠିକଣା ଧୂଳିସାତ୍ ହୋଇଯାଇଛି । ପ୍ରିସିଜନ୍ ଷ୍ଟ୍ରାଇକ୍ରେ ଦାଉଦ ପ୍ରାଣ ହରାଇ ଥାଇପାରେ ବୋଲି କୁହାଯାଉଛି । ଏହା ପୂର୍ବରୁ ଭାରତୀୟ ଏଜେନ୍ସିମାନେ ତାକୁ ମାରିବା ପାଇଁ ତିନି ଥର ଉଦ୍ୟମ କରି ବିଫଳ ହୋଇଥିଲେ ।
୧୯୮୬ରେ ଦାଉଦ ଭାରତ ଛାଡ଼ି ଦୁବାଇ ପଳାଇଥିଲା । ସେଠାରେ ସେ ‘ହ୍ୱାଇଟ୍ ହାଉସ୍’ ନାମକ ଏକ ବଙ୍ଗଳା କିଣି ନିଜ ଗ୍ୟାଙ୍ଗ୍ ଚଳାଉଥିଲା । ୧୯୯୩ ମୁମ୍ବାଇ ବୋମା ବିସ୍ଫୋରଣ ଘଟଣା ନେଇ ତା’ର ବଙ୍ଗଳାରେ ହିଁ ଷଡ଼ଯନ୍ତ୍ର ହୋଇଥିଲା । ଏହି ସମୟରେ ସେ ଟାଇଗର୍ ମେମନ୍କୁ ଭେଟିଥିଲା । ମୁମ୍ବାଇ ବିସ୍ଫୋରଣ ପରେ ଭାରତ ସରକାର ଦାଉଦକୁ ଆତଙ୍କବାଦୀ ଘୋଷଣା କରିଥିଲେ । ଏହାପରେ ସେ ଦୁବାଇରୁ କରାଚୀ ପଳାଇଥିଲା ।
୨୦୦୧ରେ ଆମେରିକାରେ ୯/୧୧ ହମଲା ପରେ ବିଶ୍ୱବ୍ୟାପୀ ଆତଙ୍କବାଦ ବିରୋଧରେ ଜୋରଦାର କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିଲା। ଆମେରିକା ଓ ଭାରତ ମଧ୍ୟରେ ଏହାକୁ ନେଇ ଘନିଷ୍ଠତା ବଢ଼ିବା ଯୋଗୁ ଦାଉଦ କରାଚୀକୁ ନିଜ ସୁରକ୍ଷିତ ଆଡ୍ଡା ବନାଇଥିଲା । କରାଚୀରେ ଡିଫେନ୍ସ କଲୋନି ନିକଟରେ ତା’ର ରହିବା ପାଇଁ ବନ୍ଦୋବସ୍ତ କରାଯାଇଥିଲା । ଦାଉଦ ସେଠାରେ ପତ୍ନୀ ମହଜାବୀନ୍, ପୁଅ ମୋଇନ, ଭାଇ ଅନିସ, ହୁମାୟୁନ ଏବଂ ନୂର୍ ସହ ରହୁଥିଲା । କିଛି ବର୍ଷ ତଳେ ନୂର୍ର ମୃତ୍ୟୁ ଘଟିଥିଲା । ଦାଉଦର ପରିବାର ବ୍ୟତୀତ ଛୋଟା ସକୀଲ ଭଳି ତା’ର କିଛି ଗ୍ୟାଙ୍ଗ୍ ସଦସ୍ୟ ମଧ୍ୟ ରହୁଥିଲେ ।
କୁହାଯାଉଛି ଯେ ପହଲଗାମ୍ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ବିବାଦ ବଢ଼ିବା ଯୋଗୁ ଦାଉଦ, ତା’ର ପରିବାର ଏବଂ ସହଯୋଗୀମାନେ କରାଚୀରୁ ପଳାୟନ କରିଛନ୍ତି । ଅପରେସନ ସିନ୍ଦୂର ପୂର୍ବରୁ ହିଁ ସେମାନେ ସ୍ଥାନାନ୍ତର ହୋଇଥିଲେ । ଡି-କମ୍ପାନି ଶୁଟର୍ ମୁନ୍ନା ଝିଙ୍ଗଡ଼ା, ଯେ କି ୨୦୦୦ରେ ବ୍ୟାଙ୍କକ୍ରେ ଛୋଟା ରାଜନ ଉପରେ ଆକ୍ରମଣ କରିଥିଲା, ସେ ମଧ୍ୟ ଏକ ଅଜଣା ସ୍ଥାନକୁ ଚାଲିଯାଇଛି।
ପାକିସ୍ତାନ ପାଇଁ ଦାଉଦ ଏକ ବଡ଼ ସମ୍ପତ୍ତି ହୋଇ ଆସିଛି । ତା’ର ଡି-କମ୍ପାନି ଜରିଆରେ ପାକିସ୍ତାନ ଅନେକ ବେଆଇନ କାର୍ଯ୍ୟ କରାଉଛି । ଚୋରା ଅସ୍ତ୍ରଶସ୍ତ୍ର ଚାଲାଣ, ନକଲି ମୁଦ୍ରା କାରବାର, ହାଇପ୍ରୋଫାଇଲ ହତ୍ୟାକାଣ୍ଡ ଭଳି କାର୍ଯ୍ୟରେ ତା’ର ସହାୟତା ନେଉଛି । ତେବେ ଦାଉଦ ବିରୋଧରେ ଭାରତ ଇଣ୍ଟରପୋଲ୍ ଦ୍ୱାରା ରେଡ୍ କର୍ନର ନୋଟିସ ଜାରି କରାଇଥିବାରୁ ସେ ପାକିସ୍ତାନ ଛାଡ଼ି ଅନ୍ୟ କେଉଁଆଡ଼େ ଯାଇପାରିବ ନାହିଁ । ଆମେରିକା ମଧ୍ୟ ତାକୁ ଆତଙ୍କବାଦୀ ଘୋଷଣା କରିସାରିଛି । ଯଦି ସେ ବାହାରକୁ ଚାଲିଯିବାକୁ ଉଦ୍ୟମ କରେ, ତେବେ ଗିରଫ ହେବା ଆଶଙ୍କା ରହିଛି ।
