ଭୁବନେଶ୍ୱର,୨୨/୦୬: ରାଜ୍ୟ ସରକାର ସରକାରୀ ଚାକିରି ପାଇଁ ଆବେଦନର ବୟସ ସୀମାକୁ ୪୨ ବର୍ଷ ବୟସକୁ ବୃଦ୍ଧି କରିଛନ୍ତି । ସର୍ବୋଚ୍ଚ ବୟସ ସୀମା ୪୨ ବର୍ଷ ଥାଇ ମଧ୍ୟ ନିଯୁକ୍ତି ପାଇଁ ପ୍ରଥମ ବିଜ୍ଞପ୍ତି ଓଡ଼ିଶା ଲୋକସେବା ଅୟୋଗ(ଓପିଏସସି) ପ୍ରକାଶ କରିଛି ।
ରାଜ୍ୟରେ ଦୀର୍ଘ ଦିନ ହେବ ଖାଲି ପଡ଼ିଥିବା ୫୦୬ଟି ସହକାରୀ ପ୍ରାଣୀ ଚିକିତ୍ସକ(ଭେଟେରିନାରୀ ଆସିଷ୍ଟାଣ୍ଟ ସର୍ଜନ/ଅତିରିକ୍ତ ଭେଟେରିନାରୀ ଆସିଷ୍ଟାଣ୍ଟ ସର୍ଜନ) ପଦବି ପୂରଣ ପାଇଁ ଏହି ବିଜ୍ଞପ୍ତିରେ ଉଲ୍ଲେଖ କରାଯାଇଛି । ଯାହାକୁ ଆଶାୟୀ ଛାତ୍ରମାନଙ୍କ ମଧ୍ୟରୁ ବହୁ ଛାତ୍ରନେତା ସ୍ୱାଗତ କରିଛନ୍ତି । ତେବେ ଏହି ପଦବିଗୁଡ଼ିକରୁ ୧୬୭ଟି ମହିଳାଙ୍କ ପାଇଁ ସଂରକ୍ଷିତ ଥିବା ବେଳେ ୩୭ଟି ଅଣସଂରକ୍ଷିତ ରହିଛି। ସାମାଜିକ ଓ ଆର୍ଥିକ ପଛୁଆ ବର୍ଗ ପାଇଁ ୭୯, ୧୪୯ଟି ଅନୁସୂଚିତ ଜାତି ଓ ୨୪୧ଟି ଅନୂସୂଚିତ ଜନଜାତି ବର୍ଗ ପାଇଁ ସଂରକ୍ଷିତ ରହିଛି । ଦିବ୍ୟାଙ୍ଗଙ୍କ ପାଇଁ ୪୯ଟି ଥିବା ବେଳେ ୧୩ଟି କ୍ରୀଡ଼ାବିତଙ୍କ ପାଇଁ ସଂରକ୍ଷିତ ରହିଛି । ପ୍ରାଣୀ ବିଜ୍ଞାନ ଓ ପଶୁଚିକିତ୍ସାରେ ସ୍ନାତକ ଡିଗ୍ରୀ(ବ୍ୟାଚଲର୍ ଡିଗ୍ରୀ ଇନ ଭେଟେରିନାରୀ ସାଇନ୍ସ ଆଣ୍ଡ ଆନିମାଲ୍ ହଜ୍ବେଣ୍ଡାରୀ) ହାସଲ କରିଥିବା ଛାତ୍ରଛାତ୍ରୀ ଏ ନେଇ ଆବେଦନ କରିପାରିବେ ବୋଲି ବିଜ୍ଞପ୍ତିରେ ଉଲ୍ଲେଖ କରାଯାଇଛି ।
