ନୂଆଦିଲ୍ଲୀ,୦୨/୦୫: କଳା ଜଗତର ସବୁଠାରୁ ପ୍ରତିଷ୍ଠିତ ପୁରସ୍କାର ମଧ୍ୟରୁ ଗୋଟିଏ, ଓସ୍କାର ସମ୍ବନ୍ଧରେ ଏକ ନୂଆ ଅପଡେଟ୍ ଆସିଛି। ଚଳିତ ବର୍ଷର ଓସ୍କାରରେ "ୱାନ୍ ବ୍ୟାଟେଲ୍ ଆଫ୍ଟର ଆନାଦର୍" ଏବଂ "ସିନର୍ସ" ଭଳି ଚଳଚ୍ଚିତ୍ରଗୁଡ଼ିକ ଧମାଲ ଦେଖିବାକୁ ମିଳିଥିଲା ଏବଂ ଏହି ଦୁଇଔି ସିନେମାକୁ ସବୁଠାରୁ ଅଧିକ କାଟାଗୋରୀରେ ସର୍ବାଧିକ ପୁରସ୍କାର ମିଳିଥିଲା। ତଥାପି, ୨୦୨୭ ମସିହାରୁ ଓସ୍କାରର ନିୟମ ପରିବର୍ତ୍ତନ ହେଉଛି। ଏହି ପ୍ରତିଷ୍ଠିତ ପୁରସ୍କାର ଆରମ୍ଭ ହେବା ପରଠାରୁ ପ୍ରାୟ ଗୋଟିଏ ଶତାବ୍ଦୀ ବିତିଗଲାଣି, ଏବଂ ବର୍ତ୍ତମାନ ଆୟୋଜକମାନେ ସମାରୋହରେ କିଛି ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଘୋଷଣା କରିଛନ୍ତି।
ଓସ୍କାର କିଛି ବର୍ଗରେ ପରିବର୍ତ୍ତନ କରିଛି ଏବଂ କିଛି ନିୟମକୁ ଶିଥିଳ କରିଛି। ଏହି ପରିବର୍ତ୍ତନଗୁଡ଼ିକ ଯୋଗୁ କଳାକାର ଯେଉଁ ପ୍ରାପ୍ୟ ପାଇବାକୁ ଯୋଗ୍ୟ, ସେମାନଙ୍କୁ ତାହା ହିଁ ମିଳିବ ଏବଂ କଠୋର ନିୟମ ଯୋଗୁଁ ସେମାନେ ଏଥିରୁ ବଞ୍ଚିତ ହେବେ ନାହିଁ। ଆସନ୍ତୁ ଓସ୍କାରରେ ଏହି ତିନୋଟି ପ୍ରମୁଖ ପରିବର୍ତ୍ତନ ଏବଂ ଏହା ଭାରତକୁ କିପରି ଲାଭ ଦେବ ତାହା ବୁଝିବା...
ନିୟମ ୧: ଅଭିନୟ ବର୍ଗ ବା ଆକ୍ଟିଂ କାଟାଗୋରୀରେ ପରିବର୍ତ୍ତନ:
ଓସ୍କାର ନିୟମରେ ସବୁଠାରୁ ବଡ଼ ପରିବର୍ତ୍ତନ ହେଉଛି ଯେ ଯେକୌଣସି ଅଭିନେତାଙ୍କୁ ଏବେ ଗୋଟିଏ ବର୍ଗରେ ଏକାଧିକ ଥର ମନୋନୀତ କରାଯାଇପାରିବ। ପୂର୍ବରୁ ଓସ୍କାର ଏହି ସୁବିଧା ପ୍ରଦାନ କରୁନଥିଲା। ପୂର୍ବରୁ, ଜଣେ କଳାକାରଙ୍କୁ କେବଳ ଗୋଟିଏ ବର୍ଗରେ ଥରେ ମନୋନୀତ କରାଯାଇପାରୁଥିଲା। କିନ୍ତୁ ଏବେ, ସେମାନଙ୍କୁ ଦୁଇଥର ମନୋନୀତ କରାଯାଇପାରିବ। ଉଦାହରଣ ସ୍ୱରୂପ, ଯଦି ଜଣେ ଅଭିନେତାଙ୍କର ଗୋଟିଏ ବର୍ଷରେ ଦୁଇଟି ଶ୍ରେଷ୍ଠ ପ୍ରଦର୍ଶନ ରହିଛି ଏବଂ ଉଭୟକୁ ପ୍ରବଳ ଭୋଟ୍ ମିଳିଛି, ତେବେ ଦୁଇଟି ଚଳଚ୍ଚିତ୍ରକୁ ସେହି ନିର୍ଦ୍ଦିଷ୍ଟ ବର୍ଗରେ ଅନ୍ତର୍ଭୁକ୍ତ କରାଯାଇପାରିବ।
ଦ୍ୱିତୀୟ ନିୟମ : AI ଉପରେ ଆଧାରିତ କୌଣସି ପୁରସ୍କାର ନାହିଁ:
ଓସ୍କାରର ଦ୍ୱିତୀୟ ନିୟମ ପ୍ରଯୁକ୍ତିବିଦ୍ୟା ଉପରେ ଆଧାରିତ। ଆଜିକାଲି, ଅନେକ ସମୟରେ ଚଳଚ୍ଚିତ୍ରଗୁଡ଼ିକରେ ଏଆଇ ବ୍ୟବହାର କରାଯାଉଛି। ସିନ୍ ଗୁଡ଼ିକ ଉନ୍ନତ ଦେଖାଯିବା ପାଇଁ କିମ୍ବା କୌଣସି ଅଭାବ ପୂରଣ କରିବା ପାଇଁ ଏଆଇର ସାହାଯ୍ୟ ନେଉଛନ୍ତି ନିର୍ମାତା। ପୂର୍ବରୁ, ଏପରି ପ୍ରଦର୍ଶନକୁ ଓସ୍କାରରେ ବିଚାର କରାଯାଉଥିଲା। ତଥାପି, ଏକ ନୂତନ ନିୟମରେ କୁହାଯାଇଛି ଯେ ଏହା ଆଉ ସମ୍ଭବ ନୁହେଁ। ଏଆଇ ଇନ୍ଫ୍ଳୁଏନ୍ସଡ ଆକ୍ଟରଏବଂ ଲେଖକ କିମ୍ବା କୌଣସି ପ୍ରଦର୍ଶନକୁ ଯେତେ ପ୍ରଶଂସା କରାଯାଉ ନା କାହିଁ, ଏପରି ପ୍ରଦର୍ଶନକୁ କୌଣସି ଓସ୍କାର ବର୍ଗରେ ମନୋନୀତ କରାଯାଇପାରିବ ନାହିଁ।
ଆହୁରି ପଢ଼ନ୍ତୁ: 'କିଙ୍ଗ' ସେଟରୁ ଦୀପିକା ପାଦୁକୋନ ଏବଂ ଶାହାରୁଖ ଖାନଙ୍କ ଫଟୋ ଲିକ୍, ସୋସିଆଲ୍ ମିଡିଆରେ ଭାଇରାଲ୍
ନିୟମ ୩: କାଟାଗୋରୀ ଡବଲ୍ ନୋମିନେସନରେ ଭାରତକୁ ଫାଇଦା:
ଓସ୍କାର ଦ୍ୱାରା କରାଯାଇଥିବା ପ୍ରମୁଖ ପରିବର୍ତ୍ତନ ମଧ୍ୟରୁ ଗୋଟିଏ ହେଉଛି ସର୍ବୋତ୍ତମ ଆନ୍ତର୍ଜାତୀୟ ଫିଚର ଫିଲ୍ମ କାଟାଗୋରୀ। ଏହି ପରିବର୍ତ୍ତନର ଅର୍ଥ ହେଉଛି ଯେ ଗୋଟିଏ ଦେଶ ଏବେ ଏହାର ସରକାରୀ ଚୟନ କମିଟି ମାଧ୍ୟମରେ ଓସ୍କାରରେ ଦାଖଲ ପାଇଁ ଗୋଟିଏରୁ ଅଧିକ ଫିଲ୍ମ ଦାଖଲ କରିପାରିବ। ପୂର୍ବରୁ ଏପରି ନଥିଲା। ପୂର୍ବରୁ, ଯେକୌଣସି ଦେଶରୁ ଯେକୌଣସି ବର୍ଗରେ କେବଳ ଗୋଟିଏ ଫିଲ୍ମ ଓସ୍କାର ପାଇଁ ଦାଖଲ କରାଯାଇପାରୁଥିଲା। କିନ୍ତୁ, ବର୍ତ୍ତମାନ ଗୋଟିଏ ବର୍ଗରେ ଦୁଇଟି ଫିଲ୍ମ ନାମାଙ୍କନ ପାଇଁ ଦାଖଲ କରାଯାଇପାରିବ। ଯଦି ଏହା ହୁଏ, ତେବେ ଏହା ଭାରତ ପାଇଁ ଭଲ ଖବରଠାରୁ କମ୍ ହେବ ନାହିଁ।
କେବେ ଆରମ୍ଭ ହେବ ଓସ୍କାର ୨୦୨୭ ?
୨୦୨୭ ଓସ୍କାର ବିଷୟରେ କହିବାକୁ ଗଲେ, ସମାରୋହରେ ଏହି ପରିବର୍ତ୍ତନଗୁଡ଼ିକ ୯୯ତମ ସଂସ୍କରଣରୁ ଆରମ୍ଭ ହେବ। ଆସନ୍ତା ବର୍ଷ ଓସ୍କାର ୧୪ ମାର୍ଚ୍ଚ, ୨୦୨୭ ରେ ଅନୁଷ୍ଠିତ ହେବାର ଯୋଜନା ରହିଛି। ଓସ୍କାରର ଏକ ଲମ୍ବା ଇତିହାସ ଅଛି ଏବଂ ଏହା ଖୁବ୍ ଶୀଘ୍ର ୧୦୦ ବର୍ଷ ପୁର୍ତ୍ତି ପାଳନ କରିବ। କଳାକୁ ଆହୁରି ପ୍ରଶଂସା କରିବା ପାଇଁ ଓସ୍କାର ପୂର୍ବରୁ ସେମାନଙ୍କର ନିୟମ ସଂଶୋଧନ କରିଛି, ଏବଂ ବର୍ତ୍ତମାନ, ପରବର୍ତ୍ତୀ ସଂସ୍କରଣ ପାଇଁ, ଏକାଡେମୀ ପୁରସ୍କାରରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରାଯାଇଛି।
ପ୍ରମେୟ ପୃଷ୍ଠାର ପ୍ରମୁଖ ଖବର: ମାଆ ଭାଙ୍ଗିଦେଲା ଝିଅ ସଂସାର, ଜ୍ବାଇଁ ସହ ଫେରାର ହେଲା ଶାଶୁ
