ଭୁବନେଶ୍ୱର ୨୪/୦୭: ମୁଣ୍ଡବିନ୍ଧା, ଅଣ୍ଟାବିନ୍ଧା, ଗଣ୍ଠି କିମ୍ବା ମାଂସପେଶୀ ଯନ୍ତ୍ରଣା ହେଲେ କିଛି ଲୋକ ସଙ୍ଗେସଙ୍ଗେ ପେନ୍କିଲର୍ ଖାଇଦିଅନ୍ତି । କିନ୍ତୁ ସମସ୍ତ ପ୍ରକାର ଯନ୍ତ୍ରଣାରେ ଔଷଧ ହିଁ ପ୍ରଥମ ସମାଧାନ ନୁହେଁ । ବିଭିନ୍ନ ଗବେଷଣାରୁ ଜଣାପଡ଼ିଛି, ଅନେକ ସାଧାରଣ ଯନ୍ତ୍ରଣାକୁ କେତେକ ପ୍ରାକୃତିକ ଉପାୟରେ ମଧ୍ୟ କମାଯାଇପାରେ ।
ଥଣ୍ଡା କିମ୍ବା ଗରମ ସେକ ଦିଅନ୍ତୁ: ନୂଆ ଆଘାତ ଲାଗିଥିଲେ କିମ୍ବା କୌଣସି ଅଙ୍ଗ ଫୁଲିଯାଇଥିଲେ ବରଫ ସେକ ଉପକାରୀ । ଅନ୍ୟପକ୍ଷରେ, ଦୀର୍ଘଦିନର ମାଂସପେଶୀ କିମ୍ବା ଗଣ୍ଠି ଯନ୍ତ୍ରଣାରେ ଉଷୁମ ସେକ ଆରାମ ଦେଇପାରେ ।
ସମ୍ପୂର୍ଣ୍ଣ ବିଶ୍ରାମ ନୁହେଁ, ହାଲୁକା ଚଳପ୍ରଚଳ ଜରୁରୀ: ଦୀର୍ଘ ସମୟ ଶୋଇ ରହିଲେ ମାଂସପେଶୀ ଅଧିକ ଦୁର୍ବଳ ହୋଇପାରେ । ହାଲୁକା ଚାଲିବା କିମ୍ବା ଶରୀରକୁ ସକ୍ରିୟ ରଖିବା ଅନେକ ପ୍ରକାର ଯନ୍ତ୍ରଣା କମାଇବାରେ ସହାୟକ ।
ଷ୍ଟ୍ରେଚିଂ ଓ ବ୍ୟାୟାମ: ଫିଜିଓଥେରାପିଷ୍ଟ କିମ୍ବା ବିଶେଷଜ୍ଞଙ୍କ ପରାମର୍ଶରେ କରାଯାଇଥିବା ଷ୍ଟ୍ରେଚିଂ ଓ ବ୍ୟାୟାମ ଅଣ୍ଟା, ବେକ ଓ ଗଣ୍ଠି ଯନ୍ତ୍ରଣା କମାଇବାରେ ପ୍ରଭାବଶାଳୀ ବୋଲି ଅନେକ ଗବେଷଣାରେ ପ୍ରମାଣିତ ହୋଇଛି ।
ଆହୁରି ପଢ଼ନ୍ତୁ...Importance Of Rest After Workout: ୱାର୍କଆଉଟ୍ ପରେ ବିଶ୍ରାମ କେତେ ଜରୁରୀ, ଆପଣ କରୁ ନାହାଁନ୍ତି ତ ଏପରି ଭୁଲ୍ ?
ପର୍ଯ୍ୟାପ୍ତ ନିଦ ନିଅନ୍ତୁ: ଭଲ ନିଦ ଶରୀରର କ୍ଷତିଗ୍ରସ୍ତ କୋଷ ଓ ମାଂସପେଶୀର ମରାମତିରେ ସହାୟତା କରେ । ନିଦ ଅଭାବରେ ଯନ୍ତ୍ରଣାର ଅନୁଭୂତି ଆହୁରି ବଢ଼ିପାରେ ।
ଓଜନ ନିୟନ୍ତ୍ରଣରେ ରଖନ୍ତୁ: ଅଧିକ ଓଜନ ଆଣ୍ଠୁ, ଅଣ୍ଟା ଓ ଗୋଡ଼ର ଗଣ୍ଠି ଉପରେ ଅତିରିକ୍ତ ଚାପ ପକାଏ । ଓଜନ କମିଲେ ଏହି ଯନ୍ତ୍ରଣା ମଧ୍ୟ କମିପାରେ ।
ହଳଦୀ ଓ ଅଦା: ହଳଦୀରେ ଥିବା କର୍କୁମିନ୍ ଏବଂ ଅଦାର କେତେକ ଉପାଦାନରେ ପ୍ରଦାହ-ନିବାରକ ଗୁଣ ରହିଥିବା କଥା ଗବେଷଣରୁ ଜଣାପଡିଛି । ତେବେ ଏଗୁଡ଼ିକ ପେନ୍କିଲର୍ ବିକଳ୍ପ ନୁହେଁ ଏବଂ ଗୁରୁତର ଯନ୍ତ୍ରଣାରେ କେବଳ ଏହା ଉପରେ ନିର୍ଭର କରିବା ଉଚିତ୍ ନୁହେଁ ।
ମାନସିକ ଚାପ କମାନ୍ତୁ: ଦୀର୍ଘଦିନର ମାନସିକ ଚାପ ମାଂସପେଶୀକୁ ଟାଣି ଧରି ମୁଣ୍ଡ, ବେକ ଓ କାନ୍ଧ ଯନ୍ତ୍ରଣା ବଢ଼ାଇପାରେ । ନିୟମିତ ଚାଲିବା, ଶ୍ୱାସକ୍ରିୟା ବ୍ୟାୟାମ ଓ ଧ୍ୟାନ କରିବା ଦ୍ୱାରା ଉପକାର ମିଳିପାରେ ।
ମନେ ରଖନ୍ତୁ ବାରମ୍ବାର କିମ୍ବା ତୀବ୍ର ଯନ୍ତ୍ରଣା କୌଣସି ଗୁରୁତର ରୋଗର ସଙ୍କେତ ହୋଇପାରେ । ସେହିପରି ସ୍ଥିତିରେ ପେନ୍କିଲର୍ ଖାଇବା ପରିବର୍ତ୍ତେ ଡାକ୍ତରଙ୍କ ପରାମର୍ଶ ନେଇ ଯନ୍ତ୍ରଣାର ପ୍ରକୃତ କାରଣ ଜାଣିବା ହିଁ ସବୁଠାରୁ ଉତ୍ତମ ଉପାୟ ।
