ନୂଆଦିଲ୍ଲୀ: ସୋମବାର ପାକିସ୍ତାନର ଅଶାନ୍ତ ଉତ୍ତର ପଶ୍ଚିମ ରାଜ୍ୟ ଖୈବର ପଖତୁନଖୱା ଠାରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ଖେଳୁଥିବା ସମୟରେ କିଛି ପିଲା ଖେଳନା ଭାବି ଏକ ବୋମାକୁ ଉଠାଇଥିଲେ । ପରେ ଏହା ବିସ୍ଫୋରଣ ହେଲା । ଏହି ବୋମା ବିସ୍ଫୋରଣରେ ୩ ଜଣ ପିଲାଙ୍କର ମୃତ୍ୟୁ ହୋଇଛି । ମୃତ ପିଲାଙ୍କ ଭିତରେ ଦୁଇ ଭାଇ ମଧ୍ୟ ରହିଛନ୍ତି । ଏହି ଘଟଣା ବନ୍ନୁର ୱାଜିର ଉପଖଣ୍ଡର ଜାନି ଖେଳ ପଡିଆ ଅଞ୍ଚଳରେ ଘଟିଛି । ସ୍ଥାନୀୟ ସୂତ୍ର ଅନୁସାରେ, ପିଲାମାନେ ମାଡ୍ରାସାରୁ ଘରକୁ ଫେରୁଥିବା ବେଳେ ଏକ ମୋର୍ଟାର ସେଲ ବିସ୍ଫୋରଣ ହୋଇଥିଲା ଏବଂ ଦୁଇ ଭାଇଙ୍କ ସମେତ ତିନି ଜଣ ଛାତ୍ରଙ୍କ ମୃତ୍ୟୁ ଘଟିଥିଲା।
ସୂଚନାନୁସାରେ, ମୋର୍ଟାର ସେଲ ଏକ ନିଛାଟିଆ ଅଞ୍ଚଳରେ ପଡ଼ି ରହିଥିଲା। ପିଲାମାନେ ଏହାକୁ ଏକ ଖେଳନା ବୋଲି ଭାବି ଉଠାଇଥିଲେ, ପରେ ଏହା ଏକ ବଡ଼ ଧରଣର ବିସ୍ଫୋରଣ ହୋଇଥିଲା । ଅତୀତରେ ମଧ୍ୟ ଅନେକ ପିଲା ଏହିପରି ପ୍ରାଣ ହରାଇଛନ୍ତି। କେବଳ ଉତ୍ତର-ପଶ୍ଚିମ ପାକିସ୍ତାନରେ ଏଭଳି ଘଟଣା ରିପୋର୍ଟ କରାଯାଉଛି।
ସୂଚନାଥାଉକି ଯେ, ୧୯୮୦ ଦଶକରେ ସୋଭିଏତ୍ ସେନା ଦ୍ବାରା ପଡୋଶୀ ଆଫଗାନିସ୍ତାନରେ ଆକ୍ରମଣକୁ ବିରୋଧ କରୁଥିବା ଲୋକଙ୍କ ବିରୁଦ୍ଧରେ ଅସ୍ତ୍ର ଭାବରେ ବ୍ୟବହାର କରିବା ପାଇଁ ଏହିପରି ମୋର୍ଟାର୍ ସେଲ୍ ପକାଯାଇଥିଲା। ଏହି ମୋର୍ଟାର ସେଲ ଗୁଡିକ 'ଖେଳନା' ପରି ଦେଖାଯାଏ ।
