ନୂଆଦିଲ୍ଲୀ,୨୪।୪: ପହଲଗାମ୍ରେ ଆତଙ୍କବାଦୀ ଆକ୍ରମଣ ଘଟଣା ସାରା ଦେଶକୁ ସ୍ତବ୍ଧ କରିଛି। ଏହା ପରେ ଭାରତ ଏବେ ଆତଙ୍କୀଙ୍କୁ କଡ଼ା ଜବାବ ଦେବା ପାଇଁ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ପାକିସ୍ତାନ ବିରୁଦ୍ଧରେ କଠୋର ନିଷ୍ପତ୍ତି ନେଇଛି ଭାରତ। ସିନ୍ଧୁ ଜଳ ଚୁକ୍ତିନାମା ସମେତ ଅନ୍ୟାନ୍ୟ ନିଷ୍ପତ୍ତି ନେଇ ପାକିସ୍ତାନର ଚିନ୍ତା ବଢ଼ିଯାଇଛି। ପାକିସ୍ତାନ ଭାବୁଛି ଯେ ଭାରତ ଆକ୍ରମଣ କରିପାରେ। ସେଥିପାଇଁ ପାକିସ୍ତାନ କ୍ଷେପଣାସ୍ତ୍ର ପରୀକ୍ଷଣ ଆରମ୍ଭ କରିଛି।
ଭାରତର ପ୍ରତିଶୋଧ ଭୟରେ ଚିନ୍ତିତ ହୋଇପଡିଛି ପାକିସ୍ତାନ । ସେଥିପାଇଁ ମିସାଇଲ ଟେଷ୍ଟ କରିବାର କରିଛି ଘୋଷଣା। ଏହି ପରୀକ୍ଷଣ ଉପରେ ଭାରତୀୟ ଏଜେନ୍ସି ମଧ୍ୟ କଡ଼ା ନଜର ରଖିଛି। ଏହା ଏଭଳି ସମୟରେ ହେଉଛି ଯେତେବେଳେ ମଙ୍ଗଳବାର ଜମ୍ମୁ ଓ କଶ୍ମୀରର ପହଲଗାମ୍ରେ ଆତଙ୍କବାଦୀମାନେ ୨୬ ଲୋକଙ୍କୁ ହତ୍ୟା କରିଦେଇଛନ୍ତି। ଆଶଙ୍କା କରାଯାଉଛି ଯେ, ଏହି ଆକ୍ରମଣରେ ପାକିସ୍ତାନୀ ଆତଙ୍କବାଦୀ ସାମିଲ ହୋଇପାରନ୍ତି।
ସମାଚାର ଏଜେନ୍ସି ଏଏନ୍ଆଇର ସୂଚନା ଅନୁସାରେ, ପାକିସ୍ତାନ ୨୪-୨୫ ଏପ୍ରିଲରେ କରାଚୀରେ ଭୂପୃଷ୍ଠରୁ ଆକାଶମାର୍ଗକୁ ମିସାଇଲ ପରୀକ୍ଷଣ କରିବା ନେଇ ନୋଟିଫିକେସନ୍ ଜାରି କରିଛି। ଭାରତୀୟ ଏଜେନ୍ସି ମଧ୍ୟ ପୁରା ଘଟଣା ଉପରେ କଡା ନଜର ରଖିଛି।
