ନୂଆଦିଲ୍ଲୀ,୨୩।୨: ଭାରତ ବିରୋଧୀ ଏବଂ ମୌଳବାଦୀ ରାଜନୀତି କରୁଥିବା ପାକିସ୍ତାନକୁ ଏବେ ବଞ୍ଚିବା କଷ୍ଟକର ହୋଇପଡ଼ିଛି। ଦେଶର ଅର୍ଥନୀତି ସମ୍ପୂର୍ଣ୍ଣ ଭାବରେ ଭେଣ୍ଟିଲେଟରରେ ଅଛି, ପାକିସ୍ତାନର ଯୋଜନା ମନ୍ତ୍ରୀ ଆହସାନ ଇକବାଲ ନିଜେ ଏହା ପ୍ରକାଶ କରିଛନ୍ତି। ପାକିସ୍ତାନର ଗରିବି ଗତ ୧୧ବର୍ଷରେ ରେକର୍ଡ ଭାଙ୍ଗିଛି। ସେଭଳି ଧନୀ ଓ ଗରିବଙ୍କ ଭିତରେ ଆୟ ଅସମାନତା ୨୭ ବର୍ଷର ଉଚ୍ଚତମ ସ୍ଥରରେ ପହଁଞ୍ଚିଛି। ଅନ୍ତର୍ଜାତୀୟ ମୁଦ୍ରାକୋଷରୁ ମିଳିଥିବା ଋଣ ଉପରେ ବଞ୍ଚିଥିବା ଦେଶରେ ଏବେ ୭ କୋଟି ଦାରିଦ୍ର୍ୟରେ ସମୟ କାଟୁଛନ୍ତି।
ଏଭଳି ସ୍ଥିତିରେ ଦେଶ ସଂଘର୍ଷ କରୁଥିବା ବେଳେ, କ୍ଷମତାରେ ଥିବା ଲୋକଙ୍କ ବିଳାସପୂର୍ଣ୍ଣ ଜୀବନ ବିଶ୍ୱକୁ ଆଶ୍ଚର୍ଯ୍ୟ କରିଛି। ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ଝିଅ ଏବଂ ପଞ୍ଜାବର ମୁଖ୍ୟମନ୍ତ୍ରୀ ମରିୟମ ନୱାଜ ନିଜ ବ୍ୟବହାର ପାଇଁ ୩୮୦ କୋଟି (ଭାରତୀୟ କରେନ୍ସି) ଟଙ୍କା ମୂଲ୍ୟର ଏକ ବିଳାସପୂର୍ଣ୍ଣ ବିମାନ କିଣିଛନ୍ତି। ୧୯ ସିଟ୍ ବିଶିଷ୍ଟ ଏହି ନୂତନ ଗଲ୍ଫଷ୍ଟ୍ରିମ୍ GVII G500 ବିମାନର ମୂଲ୍ୟ ପ୍ରାୟ ୧୧୭୦ କୋଟି ଟଙ୍କା(ପାକିସ୍ତାନୀ କରେନ୍ସି)।
ପାକିସ୍ତାନର ମୋଟ ଋଣ ବର୍ତ୍ତମାନ ଏହାର ଜିଡିପିର ୭୦% ଅତିକ୍ରମ କରିଛି। ଏପରି ସ୍ଥିତିରେ, ଜଣେ ମୁଖ୍ୟମନ୍ତ୍ରୀଙ୍କ ଦ୍ୱାରା କୋଟି କୋଟି ଟଙ୍କାର ବିମାନ କ୍ରୟ କେବଳ ନୈତିକ ଭାବରେ ଭୁଲ ନୁହେଁ ବରଂ ଏହା ପାକିସ୍ତାନର ପ୍ରଶାସନିକ ବିଫଳତାକୁ ମଧ୍ୟ ପ୍ରତିଫଳିତ କରେ, ଯେଉଁଠାରେ ବିଦେଶୀ ସହାୟତାକୁ ଜନ କଲ୍ୟାଣ ବଦଳରେ ବ୍ୟକ୍ତିଗତ ଆରାମ ପାଇଁ ବ୍ୟବହାର କରାଯାଉଛି। ଇମ୍ରାନ ଖାନଙ୍କ ଦଳ, ପିଟିଆଇ ଏହାକୁ ‘ଜନତାଙ୍କ ଝାଳ ଓ ରକ୍ତର ଆୟକୁ ଲୁଟ୍’ ବୋଲି କହିଛି।
ଉଲ୍ଲେଖନୀୟ ଯେ, ପାକିସ୍ତାନର ଦାରିଦ୍ର୍ୟ ହାର ୨୦୨୪-୨୫ ଆର୍ଥିକ ବର୍ଷରେ ୨୮.୯% କୁ ବୃଦ୍ଧି ପାଇଛି, ଯାହା ମାତ୍ର ପାଞ୍ଚ ବର୍ଷ ପୂର୍ବେ ୨୧.୯% । ବେକାରୀ ମଧ୍ୟ ୭.୧% ରେ ପହଞ୍ଚିଛି, ଯାହା ୨୧ ବର୍ଷର ରେକର୍ଡ ଭାଙ୍ଗିଛି। ଗ୍ରାମାଞ୍ଚଳରେ ପରିସ୍ଥିତି ଆହୁରି ଭୟଙ୍କର, ଯେଉଁଠାରେ ଦାରିଦ୍ର୍ୟ ୩୬.୨% ରେ ପହଞ୍ଚିଛି। ସବୁଠାରୁ ଖରାପ ପରିସ୍ଥିତି ହିଂସା ପ୍ରଭାବିତ ବେଲୁଚିସ୍ତାନରେ, ଯେଉଁଠାରେ ପ୍ରାୟ ୪୭% ଜନସଂଖ୍ୟା ଜୀବିକା ନିର୍ବାହ ପାଇଁ ସଂଘର୍ଷ କରୁଛନ୍ତି। କଠୋର ଆଇଏମଏଫ୍ ସର୍ତ୍ତ ଯୋଗୁଁ, ସରକାରଙ୍କୁ ସବସିଡି ବନ୍ଦ କରିବାକୁ ବାଧ୍ୟ କରାଯାଇଛି, ଯାହା ସାଧାରଣ ଲୋକଙ୍କ ମେରୁଦଣ୍ଡ ଭାଙ୍ଗି ଦେଇଛି।
