ନୂଆଦିଲ୍ଲୀ, ୩୦/୦୪ : ପହଲ୍ଗାମ ହମ୍ଲା ପରେ ଭାରତ ଏବଂ ପାକିସ୍ତାନ ମଧ୍ୟରେ ବିବାଦ ବଢ଼ିବାରେ ଲାଗିଛି। ଭାରତ ସରକାର ବର୍ତ୍ତମାନ ଏଭଳି ବ୍ୟବସ୍ଥା କରିବାରେ ଲାଗିଛନ୍ତି, ଯେପରି ଦେଶରୁ ଛୁଞ୍ଚିଟିଏ ବି ପାକିସ୍ତାନରେ ପହଞ୍ଚିପାରିବ ନାହିଁ । ତୃତୀୟ ରାଷ୍ଟ୍ରଗୁଡ଼ିକରୁ ପାକିସ୍ତାନକୁ ପଠାଯାଉଥିବା ଭାରତୀୟ ସାମଗ୍ରୀର ତଥ୍ୟ ସଂଗ୍ରହ କରୁଛନ୍ତି କେନ୍ଦ୍ର ସରକାର । କେତେ ମାତ୍ରାରେ ଭାରତୀୟ ସାମଗ୍ରୀ ପାକିସ୍ତାନକୁ ଅନ୍ୟ ଦେଶଗୁଡ଼ିକ ଦେଇ ପଠାଯାଉଛି ସେ ନେଇ ତଥ୍ୟ ଖୋଜୁଛନ୍ତି ସରକାର।
ସୂତ୍ର ଅନୁସାରେ, ପାକିସ୍ତାନ ପକ୍ଷରୁ ଭାରତୀୟ ବିମାନଗୁଡ଼ିକ ପାଇଁ ଏହାର ଏୟାର୍ସ୍ପେସ୍କୁ ବନ୍ଦ କରାଯିବା ପରେ ସରକାର ସାମଗ୍ରୀ ରପ୍ତାନିର ଅନ୍ୟ ଉପାୟଗୁଡ଼ିକ ଉପରେ ବିଚାର କରୁଛନ୍ତି । ଫଳ, ଫୁଲ ଏବଂ ପନିପରିବା ଭଳି ସାମଗ୍ରୀ ବିମାନପଥ ମାଧ୍ୟମରେ ମଧ୍ୟପ୍ରାଚ୍ୟ ଦେଶଗୁଡ଼ିକୁ ପଠାଯାଇଥାଏ । ବର୍ତ୍ତମାନ ପାକ୍ ଏହାର ଏୟାର୍ସ୍ପେସ୍ ଭାରତୀୟ ବିମାନ କମ୍ପାନିଗୁଡ଼ିକ ପାଇଁ ବନ୍ଦ କରିଥିବାବେଳେ ଭାରତ ଅନ୍ୟ ବିକଳ୍ପଗୁଡ଼ିକୁ ଦେଖୁଥିବା ଜଣାପଡ଼ିଛି । ସରକାର ସୀମା ଶୁଳ୍କ, ରପ୍ତାନି ପରିଷଦ ଏବଂ ଅନ୍ୟାନ୍ୟ ବିଭାଗଗୁଡ଼ିକରୁ ରପ୍ତାନି ତଥ୍ୟ ସଂଗ୍ରହ କରୁଛନ୍ତି । ଜିଟିଆର୍ଆଇ ଅନୁସାରେ, ଭାରତରୁ ପ୍ରତିବର୍ଷ ୧୦୦୦ କୋଟି ଡଲାରରୁ ଅଧିକ ମୂଲ୍ୟର ସାମଗ୍ରୀ ଦୁବାଇ, ସିଙ୍ଗାପୁର ଏବଂ କଲମ୍ବୋ ଭଳି ବନ୍ଦରଗୁଡ଼ିକ ଜରିଆରେ ପାକିସ୍ତାନ ପହଞ୍ଚୁଛି । ବ୍ୟାପାର ପ୍ରତିବନ୍ଧ ସତ୍ତ୍ଵେ ଏତେ ମାତ୍ରାରେ ସାମଗ୍ରୀ ଭାରତରୁ ଯାଉଛି । ଏହା ଉପରେ କଡ଼ା କାର୍ଯ୍ୟାନୁଷ୍ଠାନ ନିଆଯିବାକୁ କାର୍ଯ୍ୟ ହେଉଛି । ଏହାର ମୁଖ୍ୟ ଉଦ୍ଦେଶ୍ୟ ହେଉଛି, ବାଣିଜ୍ୟ ପଥର ଦୁରୂପଯୋଗ ନ ହେଉ ଏବଂ ରାଷ୍ଟ୍ରୀୟ ସୁରକ୍ଷା ବଜାୟ ରହୁ ।
ପ୍ରକାଶଯୋଗ୍ୟ, ପହଲ୍ଗାମ ଆତଙ୍କବାଦ ହମ୍ଲା ପରେ ଭାରତ ଏବଂ ପାକିସ୍ତାନ ମଧ୍ୟରେ ବ୍ୟାପାର ଏକ୍ଦମ୍ ବନ୍ଦ ହୋଇଯାଇଛି। ଭାରତ ତରଫରୁ ପାକିସ୍ତାନ କୌଣସି ପ୍ରକାର ଆର୍ଥିକ ଲାଭ ଯେପରି ନ ପାଏ, ତାହା ଉପରେ ଧ୍ୟାନ ଦିଆଯାଉଛି । ରପ୍ତାନି ସଂଘ ଫିଓ ସଭାପତି ଏସ୍.ସି. ରାଲହନ୍ କହିଛନ୍ତି ଯେ, ପାକିସ୍ତାନ ସହ ଭାରତର ଦ୍ୱିପାକ୍ଷିକ ବ୍ୟାପାର ଅତି କମ୍ । ଦେଶର ମୋଟ ବାଣିଜ୍ୟରେ ପାକ୍ର ଯୋଗଦାନ ମାତ୍ର ୦.୦୬% । ୨୦୨୪-୨୫ ଏପ୍ରିଲ-ଜାନୁଆରୀରେ ଏହା ୫୦ କୋଟି ଡଲାର ବି ନ ଥିଲା । ବର୍ତ୍ତମାନ ଏହା ଶୂନ ହୋଇଯିବ । ପାକିସ୍ତାନକୁ ଅନେକ ପ୍ରମୁଖ ସାମଗ୍ରୀ ରପ୍ତାନି ବନ୍ଦ ହୋଇଯିବ । ସେଠାରେ ଦରଦାମ ସମସ୍ୟା ଆହୁରି ତେଜିବ । ଏହା ସେମାନଙ୍କ ଅର୍ଥନୀତିକୁ ବର୍ବାଦ କରିଦେବ।
