ନୂଆଦିଲ୍ଲୀ ୧୩/୦୭: ବଲିଉଡର ପ୍ରସିଦ୍ଧ ସଂଗୀତ ନିର୍ଦ୍ଦେଶକ ସର୍ଦ୍ଦାର ମଲ୍ଲିକଙ୍କ ପୁଅ ଅନୁ ମଲ୍ଲିକ ଏବଂ ଡବୁ ମଲ୍ଲିକ। ଦୁଇ ଭାଇ ହୋଇଥିଲେ ବି ବର୍ଷ ବର୍ଷ ଧରି ଉଭୟଙ୍କ ମଧ୍ୟରେ ବୃତ୍ତିଗତ ବିବାଦ ଲାଗି ରହିଛି। ନିକଟରେ, ଡବୁ ମଲ୍ଲିକଙ୍କ ପୁଅ ତଥା ସଂଗୀତକାର ଅମାଲ୍ ମଲ୍ଲିକ ଏକ ସାକ୍ଷାତକାରରେ ଅନେକ ଆଶ୍ଚର୍ଯ୍ୟଜନକ ଖୁଲାସା କରିଛନ୍ତି। ସେ କହିଛନ୍ତି ଯେ ଅନୁ ମଲ୍ଲିକ ତାଙ୍କ ବାପାଙ୍କ କ୍ୟାରିୟରକୁ ସବୁଠାରୁ ଅଧିକ କ୍ଷତି ପହଞ୍ଚାଇଥିଲେ, ଯାହା କାରଣରୁ ତାଙ୍କ ବାପା ଡିପ୍ରେସନକୁ ଚାଲିଯାଇଥିଲେ।
ଅମାଲ୍ କହିଛନ୍ତି, ଯେତେବେଳେ ଅନୁ ମଲ୍ଲିକ ଏବଂ ଡବୁ ମଲ୍ଲିକ ଏକାଠି ଥିଲେ, ସେମାନେ ଖୁବ୍ ମଜା କରୁଥିଲେ। କିନ୍ତୁ ଯେତେବେଳେ ବୃତ୍ତିଗତ ସ୍ତରର କଥା ଆସେ, ଅନୁ ତାଙ୍କ ପ୍ରତି ବହୁତ ଈର୍ଷା କରନ୍ତି। ଅନୁ ସବୁବେଳେ ତାଙ୍କ ଭାଇଙ୍କଠାରୁ ଭଲ ହେବା ପାଇଁ ଚାହୁଁଥିଲେ। ସେ ଅନେକ ଥର ଡବୁଙ୍କ ଠାରୁ ଫିଲ୍ମ ଛଡ଼ାଇ ନେଇଥିଲେ। ସେ ପ୍ରଯୋଜକଙ୍କୁ କମ୍ କିମ୍ବା ମାଗଣାରେ କାମ କରିବା କହି ପ୍ରୋଜେକ୍ଟ ନିଜ ନାଁରେ କରି ନେଉଥିଲେ ।
ଅମାଲଙ୍କ ଅନୁସାରେ, ଏପରି ଏକ ଘଟଣା ଘଟିଥିଲା ଯେତେବେଳେ ମହେଶ ଭଟ୍ଟ 'ମର୍ଡର' ଫିଲ୍ମ ପାଇଁ ଡବୁ ମଲ୍ଲିକଙ୍କୁ ସାଇନ୍ କରିବାକୁ ଯାଉଥିଲେ। କିନ୍ତୁ ଅନୁ ମଲିକ ଚୁପଚାପ୍ ସେହି ପ୍ରୋଜେକ୍ଟକୁ ଛଡ଼ାଇ ନେଇଥିଲେ। ଏପରି ଅନେକ ଘଟଣା ଘଟିଥିଲା ଯେତେବେଳେ ଡବୁ ମଲ୍ଲିକଙ୍କ ନିକଟତର ଲୋକମାନେ ତାଙ୍କଠାରୁ କାମ ଛଡ଼ାଇ ନେଉଥିଲେ। ଏହି ବିଶ୍ୱାସଘାତକତା ଯୋଗୁଁ ତାଙ୍କ ବାପା ୩୨ ବର୍ଷରୁ ୪୫ ବର୍ଷ ବୟସ ପର୍ଯ୍ୟନ୍ତ ଡିପ୍ରେସନରେ ଥିଲେ। ଏସବୁ ଅମାଲଙ୍କ ପିଲାଦିନକୁ ମଧ୍ୟ ପ୍ରଭାବିତ କରିଥିଲା ଏବଂ ସେ ନିଷ୍ପତ୍ତି ନେଇଥିଲେ ଯେ ଗୋଟିଏ ଦିନ ସେ ତାଙ୍କ ସଙ୍ଗୀତ ଦ୍ୱାରା ସମସ୍ତଙ୍କୁ ଉତ୍ତର ଦେବେ।
ଅମାଲ୍ ଆହୁରି କହିଛନ୍ତି ଯେ ତାଙ୍କ ବାପା ପ୍ରାୟ ୭୦ଟି ଫିଲ୍ମରେ ସଙ୍ଗୀତ ଦେଇଛନ୍ତି, କିନ୍ତୁ ତାଙ୍କୁ କେହି କେବେ ଡାକି ନାହାଁନ୍ତି। ତାଙ୍କୁ ସର୍ବଦା ଅନୁ ମଲ୍ଲିକଙ୍କ ଭାଇ ଭାବରେ ଜଣା ଯାଉଥିଲା। ଅମାଲ୍ କହିଛନ୍ତି ଯେ ସେ ଚାହାଁନ୍ତି ଯେ ଏବେ ଲୋକମାନେ ତାଙ୍କୁ ଅନୁ ମଲ୍ଲିକଙ୍କ ଭାଇ ନ ଡାକି ତାଙ୍କ ବାପାଙ୍କୁ ଅମାଲ୍ ଏବଂ ଅରମାନ ମଲ୍ଲିକଙ୍କ ବାପା ବୋଲି କୁହାଯାଉ। ଏଥିସହିତ ଅମାଲ୍ ଏବଂ ତାଙ୍କ ଭାଇ ଅରମାନ ପରସ୍ପରକୁ ପ୍ରତିଶ୍ରୁତି ଦେଇଛନ୍ତି ଯେ ସେମାନେ କେବେ ପରସ୍ପର ସହିତ ବୃତ୍ତିଗତ ଶତ୍ରୁତା ରଖିବେ ନାହିଁ।
ଅମାଲ୍ ଏହା ମଧ୍ୟ କହିଛନ୍ତି ଯେ ଅନୁ ମଲ୍ଲିକ କେବଳ ତାଙ୍କ ବାପାଙ୍କ କ୍ୟାରିଅରରେ ନୁହେଁ ବରଂ ତାଙ୍କ ନିଜ କ୍ୟାରିଅରରେ ମଧ୍ୟ ପ୍ରତିବନ୍ଧକ ସୃଷ୍ଟି କରିଛନ୍ତି। ସେ କହିଛନ୍ତି ଯେ ଅନେକ ଥର ଯେତେବେଳେ ସେ ଏକ ନୂଆ ପ୍ରୋଜେକ୍ଟ ଘୋଷଣା କରନ୍ତି, ଅନୁ ମଲ୍ଲିକ ମଧ୍ୟ ଏଥିରେ ଡେଇଁପଡ଼ନ୍ତି। ତଥାପି, ଅମାଲ୍ ସ୍ୱୀକାର କରିଛନ୍ତି ଯେ ଅନୁ ମଲ୍ଲିକ ତାଙ୍କ କାମକୁ ପ୍ରଶଂସା କରନ୍ତି ଏବଂ ତାଙ୍କୁ ସମ୍ମାନ କରନ୍ତି, କିନ୍ତୁ ମନ ଭିତରେ ମୁକାବିଲା କରନ୍ତି।
