ନ୍ୟୁୟର୍କ, ୩୦/୦୬: ୟୁଏସ୍ଏରେ ଚାଲିଥିବା ଫିଫା କ୍ଲବ୍ ବିଶ୍ୱକପ୍ରେ ଚେଲସୀ ଓ ବ୍ରାଜିଲ ଫୁଟବଲ୍ କ୍ଲବ୍ ପାମେରାସ୍ ବିଜୟ ଜାରି ରଖି କ୍ୱାର୍ଟର ଫାଇନାଲ୍ରେ ପ୍ରବେଶ କରିଛନ୍ତି । ପ୍ରି-ପ୍ରି-କ୍ୱାର୍ଟରରେ ଚେଲସୀ ୪-୧ ଗୋଲ୍ରେ ବେନଫିକାକୁ ଏବଂ ପାମେରାସ୍ ୧-୦ରେ ବୋଟାଫୋଗୋକୁ ହରାଇଥିଲା ।
ପ୍ରଥମ ପ୍ରି-କ୍ୱାର୍ଟର ମୁକାବିଲାରେ ପାମେରାସ୍ ଓ ବୋଟାଫୋଗୋ ସାମ୍ନାସାମ୍ନି ହୋଇଥିଲେ । ଉଭୟ ଦଳ ମଧ୍ୟରେ କଡ଼ା ସଂଘର୍ଷ ଦେଖିବାକୁ ମିଳିଥିଲା । ନିର୍ଦ୍ଧାରିତ ସମୟର ଖେଳ ଗୋଲଶୂନ୍ୟ ରହିଥିଲା । ଏହାପରେ ଇନ୍ଜ୍ୟୁରୀ ଟାଇମ୍ରେ ମଧ୍ୟ ଗୋଲ୍ ହୋଇନଥିଲା । ମାତ୍ର ଅତିରିକ୍ତ ସମୟରେ ପୌଲିହ୍ନୋଙ୍କ (୧୦୦ ମିନିଟ୍) ଗୋଲ୍ ବଳରେ ପାମେରାସ୍ ରୋମାଞ୍ଚକର ବିଜୟ ହାସଲ କରିଥିଲା । ବୋଟାଫୋଗୋର ସ୍ୱପ୍ନ ଧୂଳିସାତ୍ ହୋଇଯାଇଥିଲା । ୧୧୬ମିନିଟ୍ରେ ଦଳର ଗୁସ୍ତାଭୋ ଗୋମେଜ ରେଡ୍ କାର୍ଡ ପାଇଥିଲେ ।
ଅନ୍ୟ ଏକ ପ୍ରି-କ୍ୱାର୍ଟରରେ ଚେଲସୀ ୪-୧ରେ ବେନଫିକାକୁ ହରାଇଥିଲା । ପ୍ରଥମାର୍ଦ୍ଧ ଖେଳ ଆକ୍ରମଣ ଓ ପ୍ରତିଆକ୍ରମଣ ମଧ୍ୟରେ ଗୋଲଶୂନ୍ୟ ରହିଥିଲା । ଦ୍ୱିତୀୟାର୍ଦ୍ଧରେ ଚେଲସୀ ଖାତା ଖୋଲିଥିଲା । ୬୪ମିନିଟ୍ରେ ରିସ୍ ଜେମ୍ସ ଏହି ଗୋଲ୍ଟି ସ୍କୋର କରିଥିଲେ । ଏହାପରେ ବେନଫିକା କଡ଼ା ଜବାବ ଦେଇଥିଲେ ହେଁ ନିର୍ଦ୍ଧାରିତ ସମୟ ସୁଦ୍ଧା ଗୋଲ୍ ପରିଶୋଧ କରିପାରିନଥିଲା । ମାତ୍ର ଇନ୍ଜ୍ୟୁରୀ ଟାଇମ୍ରେ ଆଞ୍ଜେଲ ଡି ମାରିଆ (୯୦+୫ମିନିଟ୍) ଗୋଟିଏ ଗୋଲ୍ କରିବା ଫଳରେ ମ୍ୟାଚ୍ ୧-୧ରେ ଅମୀମାଂସିତ ରହିଥିଲା । ଏହାପରେ ଅତିରିକ୍ତ ସମୟର ଖେଳ ହୋଇଥିଲା । ଚେଲସୀ ଘନଘନ ଆକ୍ରମଣ କରି ୩ଟି ଗୋଲ୍ କରିବା ସହ ବିଜୟ ହାସଲ କରିଥିଲା । ଦଳ ପକ୍ଷରୁ ୧୦୮ମିନିଟ୍ରେ ଖ୍ରୀଷ୍ଟୋଫର ଏନ୍କୁଙ୍କୁ, ୧୧୪ମିନିଟ୍ରେ ପେଡ୍ରୋ ନେଟୋ ଓ ୧୧୭ ମିନିଟ୍ରେ କିର୍ନାନ ଡ୍ୟୁଜବୁରୀ-ହଲ୍ ଗୋଲ୍ ସ୍କୋର କରିଥିଲେ । ଏହି ମ୍ୟାଚ୍ରେ ୯୨ ମିନିଟ୍ରେ ବେନଫିକାର ଗିଆନଲୁକା ପ୍ରିଷ୍ଟିଆନିଙ୍କୁ ରେଡ୍ କାର୍ଡ ମିଳିଥିଲା ।
