ଲଣ୍ଡନ,୧୩/୦୬: ଅଷ୍ଟ୍ରେଲିଆ କ୍ରିକେଟ୍ ଦଳର ଅଧିନାୟକ ପ୍ୟାଟ୍ କମିନ୍ସ ୩୦୦ ଟେଷ୍ଟ ୱିକେଟ୍ କ୍ଲବ୍ରେ ସାମିଲ ହୋଇଛନ୍ତି । ସେ ବିଶ୍ୱର ୪୦ତମ ତଥା ଅଷ୍ଟ୍ରେଲିଆର ଅଷ୍ଟମ ବୋଲର ଭାବେ ଏହି ସଫଳତା ଅର୍ଜନ କରିଛନ୍ତି । ଦକ୍ଷିଣ ଆଫ୍ରିକା ବିପକ୍ଷ ବିଶ୍ୱ ଟେଷ୍ଟ ଚାମ୍ପିଅନସିପ୍ ଫାଇନାଲ୍ ମୁକାବିଲାରେ କମିନ୍ସ ପ୍ରଥମ ଇନିଂସରେ ଘାତକ ବୋଲିଂ କରି ଏହି ତାଲିକାରେ ସାମିଲ ହୋଇଥିଲେ । ସେ ୧୮.୧ ଓଭର ବୋଲିଂ କରି ୨୮ ରନ୍ରେ ୬ଟି ୱିକେଟ୍ ନେଇଥିଲେ । ଏହା ତାଙ୍କ ଟେଷ୍ଟ କ୍ୟାରିୟର୍ର ୧୪ତମ ୫ ୱିକେଟ୍ ସଫଳତା ରହିଥିଲା ।
ବିଶ୍ୱ କ୍ରିକେଟ୍ରେ ୩୦ତମ ଓ ଅଷ୍ଟ୍ରେଲିଆର ଷଷ୍ଠ ପେସ୍ ବୋଲର ଭାବେ କମିନ୍ସ ଟେଷ୍ଟ କ୍ରିକେଟ୍ରେ ୩୦୦ ୱିକେଟ୍ ପୂରଣ କରିଛନ୍ତି । ୩୦୦ ଟେଷ୍ଟ ୱିକେଟ୍ ଅକ୍ତିଆର କରିବାରେ ସେ ପଞ୍ଚମ ଦ୍ରୁତତମ ସାବ୍ୟସ୍ତ ହୋଇଛନ୍ତି । ମୋଟ୍ ୧୩,୭୨୫ଟି ବଲ୍ ପକାଇ ସେ ୩୦୦ ୱିକେଟ୍ ପୂରଣ କରିଛନ୍ତି । ଦ୍ରୁତତମ ଭାବେ ୩୦୦ ୱିକେଟ୍ ନେବାରେ ରେକର୍ଡ କରିଛନ୍ତି କାଗିସୋ ରାବାଡା । ସେ ୧୧୮୧୭ଟି ବଲ୍ ପକାଇ ୩୦୦ ୱିକେଟ୍ ପୂରଣ କରିଥିଲେ ।
ସେହିପରି ୧୨୬୦୨ଟି ବଲ୍ ପକାଇ ପାକିସ୍ତାନର ୱାକର ୟୁନିସ୍, ୧୨୬୦୫ଟି ବଲ୍ ପକାଇ ଦକ୍ଷିଣ ଆଫ୍ରିକାର ଡେଲ ଷ୍ଟେନ ଓ ୧୩୬୭୨ଟି ବଲ୍ ପକାଇ ଆଲାନ ଡୋନାଲ୍ଡ ୩୦୦ ୱିକେଟ୍ ପୂରଣ କରିଥିଲେ । ମ୍ୟାଚ୍ ଅନୁଯାୟୀ କମିନ୍ସ ଦଶମ ଦ୍ରୁତତମ ଭାବେ ୩୦୦ ୱିକେଟ୍ ନେଇଛନ୍ତି । ସେ ୬୮ଟି ଟେଷ୍ଟ ଖେଳି ଏହି ମାଇଲଖୁଣ୍ଟ ଅତିକ୍ରମ କରିଥିଲେ । ପୂର୍ବତନ ଅଷ୍ଟ୍ରେଲିଆ ପେସ୍ ବୋଲର ଡେନିସ୍ ଲିଲି ୩୦୦ ୱିକେଟ୍ ନେବାରେ ଦ୍ରୁତତମ । ସେ ୫୬ଟି ଟେଷ୍ଟ ଖେଳି ଏହି ସଫଳତା ଅର୍ଜନ କରିଥିଲେ । ବିଶ୍ୱ ଟେଷ୍ଟ ଚାମ୍ପିଅନସିପ୍ରେ କମିନ୍ସ ଇତି ମଧ୍ୟରେ ୨୦୬ଟି ୱିକେଟ୍ ନେଇ ସାରିଛନ୍ତି । ନାଥାନ ଲାୟନ୍ସ ୨୧୦ ୱକେଟ୍ ସହ ଏକମାତ୍ର ବୋଲର ଭାବେ କମିନ୍ସଙ୍କଠୁ ଆଗରେ ରହିଛନ୍ତି । ଅନ୍ୟ କୌଣସି ବୋଲର ବିଶ୍ୱ ଟେଷ୍ଟ ଚାମ୍ପିଅନସିପରେ ଏପର୍ଯ୍ୟନ୍ତ ୨୦୦ ୱିକେଟ୍ ପୂରଣ କରିନାହାନ୍ତି ।
