ପାଟଣାଗଡ, ୭|୬(ଆପ୍ର ): ପାଟଣାଗଡ଼ରୁ କଣ୍ଟାବାଞ୍ଜିକୁ ଯାଉଥିବା ସହରର ମୁଖ୍ୟ ରାସ୍ତା ମରାମତି ଅଭାବରୁ ଶୋଚନୀୟ ହୋଇପଡିଛି। ଏପରିକି ଏହି ରାସ୍ତା ଦେଇ ବିଭିନ୍ନ ବିଭାଗୀୟ ଅଧିକାରୀ,ଉପ ଜିଲ୍ଲାପାଳ, ଜିଲ୍ଲାପାଳ ମଧ୍ୟ ଯାତାୟାତ କରିଥାନ୍ତି। କିନ୍ତୁ ଏହି ରାସ୍ତା ଉପରେ କୌଣସି ପ୍ରଶାସନିକ ଅଧିକାରୀଙ୍କ ଦୃଷ୍ଟି ପଡୁନଥିବା ଏକ ଅନୁତାପର ବିଷୟ ବୋଲି ସହରବାସୀ ଅଭିଯୋଗ ଆଣିଛନ୍ତି। ମରାମତି ଅଭାବରୁ ଏହି ରାସ୍ତା ଏବେ ଶୋଚନୀୟ ହୋଇପଡିଛି। ନିମ୍ନମାନର କାମ ଯୋଗୁଁ ଏହି ରାସ୍ତାର ଅବସ୍ଥା ବାରମ୍ବାର ଶୋଚନୀୟ ହୋଇପଡୁଥିବା ସହରବାସୀ ଅଭିଯୋଗ କରିଛନ୍ତି।
ବର୍ତ୍ତମାନ ବର୍ଷା ଋତୁ ଚାଲିଥିବା ବେଳେ ଏହି ରାସ୍ତାରୁ ପିଚୁ ଉଠି ଖାଲଖମାରେ ଭର୍ତ୍ତି ହୋଇଥିବାରୁ ବିଭିନ୍ନ ସମୟରେ ଦୁର୍ଘଟଣାମାନ ଘଟୁଛି। ଏପରିକି ରାସ୍ତାର ଅନେକ ସ୍ଥାନରେ ହୋଇଥିବା ଖାଲ ଗୁଡ଼ିକରେ ବର୍ଷା ପାଣି ରହୁଥିବା ଯୋଗୁଁ ସେହି ରାସ୍ତାଦେଇ ଯାଉଥିବା ଯାତ୍ରୀ, ଛାତ୍ରଛାତ୍ରୀ, ପଥିକମାନେ ଜାଣିନପାରି ଦୁର୍ଘଟଣା ଗ୍ରସ୍ତ ହେଉଛନ୍ତି। ଅନ୍ୟ ପଟେ ଉକ୍ତ ରାସ୍ତା ଦେଇ ପ୍ରାୟତଃ ଭାରିଯାନ ଗୁଡ଼ିକ ମଧ୍ୟ ଚଳାଚଳ କରୁଥିବାରୁ ରାସ୍ତା ଆହୁରି ଶୋଚନୀୟ ହୋଇ ମରଣଯନ୍ତା ପାଲଟିଛି।ରାସ୍ତାର ଏକ ପାର୍ଶ୍ୱରେ ଡ୍ରେନେଜ ବ୍ୟବସ୍ଥା ନଥିବାରୁ ବ୍ରହ୍ମପୁର ପଟୁ ଆସୁଥିବା ଡ୍ରେନ ପାଣି ରାସ୍ତା ଉପରେ ବୋହିବାରେ ଲାଗିଛି। ଏପଟେ ଡ୍ରେନ ପାଣି ସାଙ୍ଗକୁ ବର୍ଷା ପାଣି ବିଭିନ୍ନ ଖାଲି ଢିପ ସ୍ଥାନ ଗୁଡିକରେ ଏକତ୍ରିତ ହେବାରୁ ଏଥିରୁ ପୂତ୍ତିମୟ ଗନ୍ଧ ବାହାରୁଛି। ଆଗାମୀ ଦିନରେ ଏହି ଡ୍ରେନ ପାଣି ଯୋଗୁଁ ମଶା ମାଛିଙ୍କ ସଂଖ୍ୟା ବୃଦ୍ଧି ପାଇବାର ଆଶଙ୍କା ଥିବାରୁ ସହରରେ ବିଭିନ୍ନ ରୋଗ ବ୍ୟାପିବାର ସମ୍ଭାବନା ରହିଛି । ଯାହାକୁ ନେଇ ସହରବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ପାଖାପାଖି ବର୍ଷେ ତଳେ ଏହି ରାସ୍ତାରେ ପିଡ୍ବୁଡି ବିଭାଗ କାମ କରିଥିଲେ ମଧ୍ୟ ନିମ୍ନମାନର କାମ ଯୋଗୁଁ ରାସ୍ତାରେ ପିଚୁ ଉଠିଯାଇ ଶୋଚନୀୟ ହୋଇପଡିଛି। ଏଥିପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ସହରବାସୀ ଦାବୀ କରିଛନ୍ତି।
