ଭଦ୍ରକ, ୨୮/୧୦: ବାତ୍ୟା ‘ଦାନା’ ପରେ ଭଦ୍ରକ ଜିଲ୍ଲା ସମେତ ଭଦ୍ରକ ସହର ଓ ସହରର ଆଖପାଖ ପଞ୍ଚାୟତ ମାନଙ୍କରେ ମଧ୍ୟ କ୍ଷୟ କ୍ଷତି ହୋଇଥିବା ଦେଖିବାକୁ ମିଳିଛି । ବିଭିନ୍ନ ସ୍ଥାନରେ ଗଛ ପଡି ଘର ଭାଙ୍ଗିବା ସହ ରାସ୍ତାରେ ଗଛ ପଡି ରାସ୍ତା ଅବରୋଧ ହୋଇଛି । ଆଉ କିଛି ସ୍ଥାନରେ ବିଦ୍ୟୁତ ତାର ମଧ୍ୟ ଛିଡି ଥିବାର ଦେଖିବାକୁ ମିଳିଛି ।
‘ଦାନା’ ପରେ ଲଗାଣ ବର୍ଷା ଯୋଗୁଁ ଭଦ୍ରକ ବ୍ଲକ ଅଧିନରେ ଥିବା ଆର ଏନ ବେତରା ଗ୍ରାମ ପଞ୍ଚାୟତ ବର୍ତ୍ତମାନ ଜଳମଗ୍ନ ଅବସ୍ଥାରେ ରହିଛି । ୧୪ ଟି ୱାର୍ଡ କୁ ନେଇ ଗଠିତ ଏହି ଗ୍ରାମପଞ୍ଚାୟତରେ ପାଖା ପାଖି ୮ଟି ୱାର୍ଡ ସମ୍ପୂର୍ଣ ଜଳ ମଗ୍ନ ଥିବାର ଦେଖିବାକୁ ମିଳିଛି । ଉକ୍ତ ପଞ୍ଚାୟତକୁ କପାଳୀ ନଦୀ ଘେରି ରହିଛି । ଫଳରେ ନଈର ପାଣି ଉଛୁଳି ଗ୍ରାମ ମଧ୍ୟକୁ ପ୍ରବେଶ କରୁଛି।
ଗ୍ରାମବାସୀଙ୍କ କହିବା ଅନୁସାରେ, ସେମାନଙ୍କର ଚାଷ ଜମି ସମେତ କିଛି ଆଜବେଷ୍ଟସ ଘର, ଯାତାୟାତ କରୁଥିବା ରାସ୍ତା ଏବଂ କିଛି ଦୋକାନ ପ୍ରଭାବିତ ହୋଇଛି । ଏପରିକି ରାସ୍ତା ଉପରେ ପାଣିର ସୁଅ ଚାଲୁଥିବାରୁ ଗ୍ରାମ ପଞ୍ଚାୟତ ମଧ୍ୟରେ ଗୋଟିଏ ୱାର୍ଡରୁ ଆଉ ଏକ ୱାର୍ଡକୁ ଯାତାୟତ କରିବା ସମ୍ଭବପର ହେଉନାହିଁ । ଏପରି ପରିସ୍ଥିତିରେ ଯଦି କୌଣସି ଡାକ୍ତରଖାନା ଆବଶ୍ୟକତା ଆସେ ତାହେଲେ ଆମ୍ବୁଲାନ୍ସ ବା କୌଣସି ଗାଡି ଗାଁ ଭିତରକୁ ଯାଇ ପାରିବନାହିଁ । ଉକ୍ତ ଗ୍ରାମର ଲୋକମାନେ ଅଣ୍ଟାଏ ଲେଖାଏଁ ପାଣିରେ ପଶି ସାହାରା ପାଇଁ ହାତରେ ବାଡ଼ି ଧରି ଘରୁ ବାହାରୁ ଥିବାର ଦେଖିବାକୁ ମିଳିଛି ।
