ମହାବିରୋଡ଼,୦୨/୧୨: ପ୍ରାକୃତିକ ସୌନ୍ଦର୍ଯ୍ୟର ଗନ୍ତାଘର ଢେଙ୍କାନାଳ ଜିଲ୍ଲା କଙ୍କଡ଼ାହାଡ଼ ବ୍ଲକ୍ ଫୁଲଝର ଗାଁ ହଦହଦି । ସବୁଜ ବନାନୀ ପରିବେଶରେ କୁଳୁକୁଳୁ ନାଦରେ ବୋହି ଯାଉଥିବା ପାହାଡ଼ି ଝରଣା ସାଜିଛି ଆକର୍ଷଣର କେନ୍ଦ୍ରବିନ୍ଦୁ । ମନୋରମ ପରିବେଶରେ ବଣଭୋଜି କରିବାକୁ ଲୋକଙ୍କ ଭିଡ଼ ଜମିଲାଣି । ଲୋକେ ସପରିବାରେ ଏଠାରେ ବଣଭୋଜି କରିବା ସହ ପ୍ରାକୃତିକ ସୌନ୍ଦର୍ଯ୍ୟର ଭରପୁର ମଜା ଉଠାଉଛନ୍ତି । ଝରଣା ପାଣିରେ ସ୍ନାନ କରି ଉଲ୍ଲସିତ ହେଉଛନ୍ତି । ନିକଟରେ ଥିବା ବନଦୁର୍ଗାଙ୍କ ପୀଠରେ ପୂଜାର୍ଚ୍ଚନା କରି ଏହି ଝରଣାରେ ସ୍ନାନ କଲେ ଚର୍ମରୋଗରୁ ମୁକ୍ତି ମିଳିଥାଏ ବୋଲି ସ୍ଥାନୀୟ ଲୋକଙ୍କ ବିଶ୍ୱାସ ରହିଛି । ନଭେମ୍ବରରୁ ଫେବୃଆରୀ ମାସ ପର୍ଯ୍ୟନ୍ତ ଏଠାରେ ବଣଭୋଜି ପାଇଁ ଭିଡ଼ ଲାଗିଥାଏ । ବର୍ଷର ଅନ୍ୟ ସମୟରେ ମଧ୍ୟ ଭୋଜିଭାତର ଆସର ଜମିଥାଏ । ଲୋକେ ସପରିବାରେ ଏହି ମନୋରମ ସ୍ଥାନକୁ ବୁଲି ଆସିଥାନ୍ତି । ଏହା ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ରବିନ୍ଦୁ ସାଜିଥିବା ବେଳେ ପ୍ରଚାରପ୍ରସାର ଅଭାବରୁ ଦୃଷ୍ଟି ଆଢ଼ୁଆଳରେ ରହି ଯାଇଛି । କଙ୍କଡ଼ାହାଡ଼ ବ୍ଲକ୍ ସଦର ମହକୁମାଠାରୁ ୧୨ କିମି ଦୂରରେ ଏହି ସ୍ଥାନ ରହିଥିବା ବେଳେ ଆଜି ପର୍ଯ୍ୟନ୍ତ ଭଲ ରାସ୍ତା ନିର୍ମାଣ ହୋଇପାରିନି ।
ଆବୁଡ଼ାଖାବୁଡ଼ା ମାଟିମୋରମ ରାସ୍ତାରେ ଲୋକ ଯାତାୟାତ କରିଥାନ୍ତି । ଏହି ପର୍ଯ୍ୟଟନ ସ୍ଥାନର ଉନ୍ନତିକରଣ କରିବା ସହ ଏହାକୁ ପର୍ଯ୍ୟଟନ ସ୍ଥଳ ମାନ୍ୟତା ଦେବାକୁ ଅଞ୍ଚଳବାସୀ ଦାବି କରିଛନ୍ତି । ବଣଭୋଜି ପିଣ୍ଡି, ରାସ୍ତା ନିର୍ମାଣ, ଆଲୋକୀକରଣ ବ୍ୟବସ୍ଥା, ଶୌଚାଳୟ ନିର୍ମାଣ ସହ ପାନୀୟ ଜଳ ଯୋଗାଣ ବ୍ୟବସ୍ଥା କରିବାକୁ ଦାବି ହୋଇଛି । ପର୍ଯ୍ୟଟନ ସ୍ଥଳର ମାନ୍ୟତା ପାଇବା ସହ ପ୍ରଚାରପ୍ରସାର ହେଲେ ପର୍ଯ୍ୟଟକ ସଂଖ୍ୟା ବଢ଼ିବା ସହ ସ୍ଥାନୀୟ ଲୋକଙ୍କ ରୋଜଗାର ମିଳିପାରନ୍ତା ବୋଲି ମତ ପ୍ରକାଶ ପାଇଛି । ଜିଲ୍ଲା ପ୍ରଶାସନ ଏ ଦିଗରେ ଦୃଷ୍ଟି ଦେବାକୁ ଅଞ୍ଚଳବାସୀ ନିବେଦନ କରିଛନ୍ତି।
