ନୂଆଦିଲ୍ଲୀ,୦୬/୦୬: କ୍ରିକେଟ ଫ୍ୟାନ୍ସଙ୍କୁ ଝଟକା ଲାଗିବା ପରି ଖବର ସାମ୍ନାକୁ ଆସିଛି । କ୍ରିକେଟକୁ ଅଲବିଦା କହିଲେ ଆଉ ଜଣେ ଭେଟେରାନ । କ୍ରିକେଟର ସବୁ ଫର୍ମାଟକୁ ଅଲବିଦା କହିଛନ୍ତି ପୀୟୂଷ ଚାୱଲା । ଭାରତ ପାଇଁ ଟି-ଟ୍ୱେଣ୍ଟି ଓ ଦିନିକିଆ ବିଶ୍ୱକପ ବିଜେତା ୩୬ ବର୍ଷୀୟ ସ୍ପିନର ପୀୟୂଷ କ୍ରିକେଟର ସବୁ ଫର୍ମାଟରୁ ସନ୍ନ୍ୟାସ ଘୋଷଣା କରିଛନ୍ତି । ସୋସିଆଲ ମିଡିଆରେ ଅବସର ନେଇ ଘୋଷଣା କରିଛନ୍ତି । ୨୦୦୭ ଟି-ଟ୍ୱେଣ୍ଟି ଓ ୨୦୧୧ ଦିନିକିଆ ବିଶ୍ୱ କପ୍ ବିଜେତା ଦଳରେ ଥିଲେ ପିୟୂଷ ।
ଇନଷ୍ଟାଗ୍ରାମ ପୋଷ୍ଟରେ ଅବସର ଘୋଷଣା କରି ପୀୟୂଷ କହିଛନ୍ତି, ''ମୈଦାନରେ ଦୁଇ ଦଶନ୍ଧିରୁ ଅଧିକ ସମୟ ଦେବା ପରେ, ଏବେ ଏହି ସୁନ୍ଦର ଖେଳକୁ ଅଲବିଦା କହିବାର ସମୟ ଆସିଛି । ଅନ୍ତର୍ଜାତୀୟ ସ୍ତରରେ ଭାରତର ପ୍ରତିନିଧି କରି ୨୦୦୭ ଟି-୨୦ ବିଶ୍ୱ କପ ଓ ୨୦୧୧ ଦିନିକିଆ ବିଶ୍ୱକପରେ ଦଳର ଅଂଶ ହେବା ଯାଏ, ଏହି ଅବିଶ୍ୱସନୀୟ ଯାତ୍ରାର ସବୁ ସମୟ କୌଣସି ଆର୍ଶୀବାଦଠୁ କମ୍ ନୁହେଁ । ଏହି ମୂହୁର୍ତ୍ତ ସର୍ବଦା ମୋ ହୃଦୟରେ ରହିବ ।
କ୍ରିକେଟ କ୍ୟାରିୟରରେ ପିୟୂଷ ୨୫ଟି ଦିନିକିଆ, ୩ଟି ଟେଷ୍ଟ ମ୍ୟାଚ ଖେଳିବା ସହିତ ୭ଟି ଟି-ଟ୍ୱେଣ୍ଟି ମ୍ୟାଚ ଖେଳିଛନ୍ତି । ସବୁ ଫର୍ମାଟରେ ସେ ୪୩ଟି ୱିକେଟ ଅକ୍ତିଆର କରିଛନ୍ତି । ଇଣ୍ଡିଆନ୍ ପ୍ରିମିୟର ଲିଗରେ ସେ ଚେନ୍ନାଇ ସୁପର କିଙ୍ଗସ, ପଞ୍ଜାବ କିଙ୍ଗସ୍, କୋଲକାତା ନାଇଟ ରାଇଡର୍ସ ଓ ମୁମ୍ବାଇ ଇଣ୍ଡିଆନ୍ସ ପାଇଁ ଖେଳିଛନ୍ତି । ୨୦୧୪ରେ ଚାମ୍ପିଅନ କେକେଆର ଦଳରେ ଥିଲେ ।''
ଜଣଙ୍କ ପରେ ଜଣେ ଭାରତୀୟ କ୍ରିକେଟରଙ୍କ ସନ୍ନ୍ୟାସ ଘୋଷଣା ଫ୍ୟାନ୍ସଙ୍କୁ ନିରାଶ କରୁଛି । ପ୍ରଥମେ ଟି-ଟ୍ୱେଣ୍ଟିରୁ ଅବସର ପରେ ଗତ ମାସରେ ଟେଷ୍ଟ କ୍ରିକେଟରୁ ଅବସର ଘୋଷଣା କରିଥିଲେ ରୋହିତ ଶର୍ମା ଓ ବିରାଟ କୋହଲି । ଏହା ପରେ ପୁଣି ପୀୟୂଷ ଚାୱଲା କ୍ରିକେଟରୁ ସନ୍ନ୍ୟାସ ନେଇଛନ୍ତି । ଯାହା ତାଙ୍କ ଫ୍ୟାନ୍ସଙ୍କୁ ନିରାଶ କରିଛି । ୨୦୨୫ ଆଇପିଏଲରେ ଅନସୋଲ୍ଡ ଥିଲେ ପୀୟୁଷ । ତାଙ୍କର ବେସ୍ ପ୍ରାଇସ୍ ୫୦ ଲକ୍ଷ ଟଙ୍କା ଥିଲା ।
