ପାଟନା,୨୫/୦୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ବିହାର ଗସ୍ତ କରିଥିଲେ । ଭାଗଲପୁରରେ ଏକ ରାଲିକୁ ସମ୍ବୋଧନ କରିବା ସହ ଚାଷୀଙ୍କୁ ପିଏମ୍ କିଷାନ ସମ୍ମାନ ଯୋଜନାର ୧୯ତମ କିସ୍ତି ପ୍ରଦାନ କରିଥିଲେ । ସମାରୋହକୁ ସମ୍ବୋଧନ କରିବା ସହ ଆରଜେଡି, ଲାଲୁ ଯାଦବ ଓ କଂଗ୍ରେସ ଉପରେ ବର୍ଷିଥିଲେ ପିଏମ୍ ମୋଦି । ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନୀତିଶ କୁମାରଙ୍କୁ 'ଲାଡଲା' ସିଏମ ବୋଲି କହି ଦେଇଥିଲେ । ଯାହାକୁ ନେଇ ବିରୋଧୀ ସମାଲୋଚନା କରିଛନ୍ତି ।
ସମାରୋହକୁ ସମ୍ବୋଧନ କରି ପ୍ରଧାନମନ୍ତ୍ରୀ କହିଥିଲେ, ''ବିହାରର ଲୋକପ୍ରିୟ ଏବଂ ବିହାର ବିକାଶ ପାଇଁ ସମର୍ପିତ ଆମର 'ଲାଡଲା' ମୁଖ୍ୟମନ୍ତ୍ରୀ ନୀତିଶ କୁମାର ଜୀ । ମହାକୁମ୍ଭ ସମୟରେ ଏହି ଧରିତ୍ରୀକୁ ଆସିବା ମୋ ପାଇଁ ସୌଭାଗ୍ୟ । ବିହାରର ଏହି ମାଟି ଆସ୍ଥା ଅଛି ବିରାସତ ବିକଶିତ ଭାରତର ସାମର୍ଥ୍ୟ ବି ଅଛି । ମୁଁ ଲାଲକିଲ୍ଲାରୁ କହିଥିଲି ବିକଶିତ ଭାରତର ୪ଟି ସ୍ତମ୍ଭ ଅଛି । ସେଗୁଡିକ ହେଉଛି ଗରିବ, ଆମ ଅନ୍ନଦାତା କିଶାନ, ଯୁବଗୋଷ୍ଠୀ ଓ ଆମର ଦେଶର ନାରୀ ଶକ୍ତି । ଏନଡିଏ ସରକାର କେନ୍ଦ୍ରରେ ହେଉ କି ଅନ୍ୟ ରାଜ୍ୟରେ କିଷାନ କଲ୍ୟାଣ ଆମର ପ୍ରାଥମିକତା ।''
ରାଲିକୁ ସମ୍ବୋଧନ କରିବା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଖାନାର ଏକ ମାଳ ପିନ୍ଧାଇ ସମ୍ବର୍ଦ୍ଧିତ କରାଯାଇଥିଲା । ମାଖାନକୁ ଏକ ସୁପରଫୁଡ କହିବା ସହ ଦେଶର ସହରଗୁଡିକରେ ମଖାନା ଜଳଖିଆରେ ଏକ ଗୁରୁତ୍ବପୂର୍ଣ୍ଣ ଅଂଶ ପାଲଟିଛି । ୩୬୫ ଦିନ ମଧ୍ୟରୁ ମୁଁ ୩୦୦ ଦିନ ମଖାନା ଖାଇଥାଏ ବୋଲି କହିଥିଲେ ମୋଦି । ବଜେଟରେ ବିହାରରେ ମଖାନା ବୋର୍ଡ ଗଠନ ଓ ବିପଣନ ବୃଦ୍ଧି କରିବା ଉଦ୍ଦେଶ୍ୟରେ ବିହାରରେ ଏକ ମଖାନା ବୋର୍ଡ ଗଠନ କରିବାକୁ ପ୍ରସ୍ତାବ ଦେଇଥିଲେ । ବିହାର ହେଉଛି ଭାରତର ସବୁଠୁ ବଡ ମଖାନା ଉତ୍ପାଦକାରୀ ରାଜ୍ୟ ।
