ନୂଆଦିଲ୍ଲୀ:  ବିମାନ ଦୁର୍ଘଟଣା ପରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ଏକ ଉଚ୍ଚସ୍ତରୀୟ ଦଳ ଅହମ୍ମଦାବାଦରେ ପହଞ୍ଚିଛି। ଏହି ଦଳ ଦୁଇ ଦିନ ପାଇଁ ଗୁଜରାଟରେ ରହିବ। ଏହାର ନେତୃତ୍ବ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ପିକେ ମିଶ୍ର ନେଇଛନ୍ତି। ଏହି ଦଳ ରିଲିଫ୍, ଉଦ୍ଧାର ଏବଂ ତଦନ୍ତ ଉପରେ ନଜର ରଖିବ। ମୁଖ୍ୟମନ୍ତ୍ରୀ, ଡିଜିପି ଏବଂ ଏସିଏସ୍ (ଗୃହ)ଙ୍କ ସହିତ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହେବ। ବିପର୍ଯ୍ୟୟ ପରେ ସମନ୍ବୟ ଏବଂ ସହାୟତା ଉପରେ ଧ୍ୟାନ ଦେବ ଏହି ଟିମ୍‌। 

 କେନ୍ଦ୍ର ସରକାର ଏହି ଘଟଣାକୁ ବହୁ ଗମ୍ଭୀରତାର ସହ ନେଉଛନ୍ତି। ଏହି ଦୁର୍ଘଟଣାର ତଦନ୍ତ ପାଇଁ ସରକାର ଏକ ଉଚ୍ଚସ୍ତରୀୟ କମିଟି ଗଠନ କରିଛନ୍ତି। ଏହି ଦଳ ଏହି ଦୁର୍ଘଟଣାର ତଦନ୍ତ କରିବ ଏବଂ ଦୁର୍ଘଟଣାର କାରଣ ଖୋଜିବ। ଏହି କମିଟି ଦୁର୍ଘଟଣା ସ୍ଥଳ ପରିଦର୍ଶନ କରିବ ଏବଂ କ୍ରୁ ସଦସ୍ୟ, ବିମାନ ଟ୍ରାଫିକ୍ ନିୟନ୍ତ୍ରକ ଏବଂ ଉଦ୍ଧାରକାରୀ ଦଳ ସମେତ ଏଥିରେ ଜଡିତ ଲୋକଙ୍କ ସହିତ କଥା ହେବ। ଅହମ୍ମଦାବାଦ ବିମାନ ଦୁର୍ଘଟଣା ପରେ, ପ୍ରଧାନମନ୍ତ୍ରୀ ମୋଦୀ ଜୁନ୍ ୧୩ ସକାଳେ ଦୁର୍ଘଟଣାସ୍ଥଳ ପରିଦର୍ଶନ କରିଥିଲେ। ସେ ଦୁର୍ଘଟଣାସ୍ଥଳ ପରିଦର୍ଶନ କରି ପରିସ୍ଥିତି ସମୀକ୍ଷା କରିଥିଲେ। ଏହା ପରେ ସେ ହସ୍ପିଟାଲରେ ପହଞ୍ଚି ଆହତମାନଙ୍କୁ ମଧ୍ୟ ଭେଟିଥିଲେ। 

 ଏହି ସମୟରେ କେନ୍ଦ୍ର ମନ୍ତ୍ରୀ ରାମମୋହନ ନାଇଡୁ, ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଏବଂ ଅନେକ ଅଧିକାରୀ ଉପସ୍ଥିତ ଥିଲେ। ଏହି ଦୁର୍ଘଟଣାରେ ୨୭୫ ଜଣଙ୍କର ମୃତ୍ୟୁ ହୋଇଥିଲା। ଦୁର୍ଘଟଣା ପରେ ପ୍ରଧାନମନ୍ତ୍ରୀ ମୋଦୀ ଗଭୀର ଶୋକ ପ୍ରକାଶ କରିଥିଲେ। ସେ କହିଥିଲେ ଯେ, ଅହମ୍ମଦାବାଦରେ ଘଟିଥିବା ଦୁର୍ଘଟଣା ଆମକୁ ମର୍ମାହତ ଏବଂ ଦୁଃଖିତ କରିଛି। ଏହା ଏକ ହୃଦୟ ବିଦାରକ ଘଟଣା। ଏହି ଘଟଣାକୁ ଶବ୍ଦରେ ବର୍ଣ୍ଣନା କରାଯାଇପାରିବ ନାହିଁ। ଏହି ଦୁଃଖଦ ମୁହୂର୍ତ୍ତରେ, ଏଥିରେ ପ୍ରଭାବିତ ସମସ୍ତ ଲୋକଙ୍କ ସହିତ ମୋର ସମବେଦନା। ମୁଁ ପ୍ରଭାବିତ ଲୋକଙ୍କୁ ସାହାଯ୍ୟ କରିବା ପାଇଁ କାମ କରୁଥିବା ମନ୍ତ୍ରୀ ଏବଂ ଅଧିକାରୀଙ୍କ ସହିତ ଯୋଗାଯୋଗରେ ଅଛି। 

 ଏୟାର ଇଣ୍ଡିଆର ବୋଇଂ ୭୮୭ ଡ୍ରିମଲାଇନର ବିମାନ (AI-171) ଅହମ୍ମଦାବାଦରୁ ଲଣ୍ଡନ ଅଭିମୁଖେ ଉଡ଼ାଣ ଭରୁଥିବା ବେଳେ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ବିମାନରେ ୨୪୨ ଜଣ ଯାତ୍ରା କରୁଥିଲେ, ଯେଉଁଥିରେ ୨୩୦ ଜଣ ଯାତ୍ରୀ ଏବଂ ୧୨ ଜଣ କ୍ରୁ ସଦସ୍ୟ ଥିଲେ। ବିମାନରେ ଅନେକ ବିଦେଶୀ ନାଗରିକ ମଧ୍ୟ ଥିଲେ। ଜଣଙ୍କ ବ୍ୟତୀତ ବିମାନରେ ଥିବା ସମସ୍ତ ଯାତ୍ରୀଙ୍କ ମୃତ୍ୟୁ ହୋଇଥିଲା।