ପାଟଣାଗଡ, ୩୧/୫(ଆପ୍ର): ପାଟଣାଗଡ଼ ଥାନା ବ୍ଳକ ଛକରେ ଗତକାଲି ବିଳମ୍ବିତ ରାତିରେ ଦୁଇ ଜଣ ଅଭିଯୁକ୍ତ ପୁଲିସ ଉପରକୁ ଖଣ୍ଡା ଓ ଫାର୍ସା ବୁଲାଇ ଆକ୍ରମଣ କରିଥିବା ଅଭିଯୋଗରେ ପୁଲିସ ଆଜି ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଦ୍ୱୟ ହେଲେ ପାଟଣାଗଡ଼ ଥାନା ବ୍ରାହ୍ମପୁରାର ମନୋଜ କୁମାର ସାହୁ ଓ ଉକ୍ତ ଥାନା ଅନ୍ତର୍ଗତ ବାଲିପଟା ଗାଁର ଉମାକାନ୍ତ ମାଝୀ। ଏଥି ସହ ପୁଲିସ ସେମାନେ ବ୍ୟବହାର କରିଥିବା ଖଣ୍ଡା, ଫାର୍ସା, ବାଇକ୍ ଏବଂ ମୋବାଇଲ ଫୋନ ଜବତ କରିଛି। ଅଭିଯୁକ୍ତ ଦ୍ୱୟଙ୍କ ଖଣ୍ଡା ଓ ଫାର୍ସାର ଶିକାର ହୋଇ କନେଷ୍ଟବଳ ଏ ଦେବାଶିଷ ଏବଂ ହୋମଗାର୍ଡ ନିରଞ୍ଜନ ସାହୁ ଗୁରୁତର ହୋଇ ପାଟଣାଗଡ଼ ଡ଼ାକ୍ତରଖାନାରେ ଚିକତ୍ସିତ ହେଉଛନ୍ତି।
ପ୍ରକାଶ ଯେ, ଅଭିଯୁକ୍ତ ଦ୍ୱୟ ଶୁକ୍ରବାର ବିଳମ୍ବିତ ରାତ୍ରିରେ ଏକ ନିର୍ଦ୍ଦିଷ୍ଟ ସ୍ଥାନରୁ ଭୋଜିଭାତ ଖାଇ ବ୍ଳକ ଛକରେ ନିଶାଗ୍ରସ୍ତ ଅବସ୍ଥା ଏକ ବାଇକ୍ ଯୋଗେ ବୁଲୁଥିଲେ। ସେହି ସ୍ଥାନରେ ରାତ୍ରିକାଳିନ ଡ୍ୟୁଟିରେ ଥିବା କନେଷ୍ଟବଳ ଦେବାଶିଷ ଓ ହୋମଗାର୍ଡ ସାହୁ ସେମାନଙ୍କୁ ଅଟକାଇ ଏତେ ରାତିରେ କାହିଁକି ବୁଲାବୁଲି କରୁଛ ବୋଲି ପଚରାଉଚରା କରିଥିଲେ। ନିଶାଗ୍ରସ୍ତ ଅବସ୍ଥାରେ ଯୁବକ ଦ୍ଵୟ ରାଗିଯାଇ ବାଇକ୍ ଭିତରେ ରଖିଥିବା ଖଣ୍ଡା ଓ ଫାର୍ସା ବାହାର କରି କନେଷ୍ଟବଳ ଓ ହୋମେଗର୍ଡଙ୍କ ଉପରକୁ ଅତର୍କିତ ଭାବରେ ଆକ୍ରମଣ କରିଥିଲେ। ନିଜକୁ ବଞ୍ଚାଇବାକୁ ଯାଇ କନେଷ୍ଟବଳଙ୍କ ଡାହାଣ ହାତ ଓ ଗୋଡରେ ଖଣ୍ଡା ଚୋଟ ପଡିଥିବା ବେଳେ ହୋମଗାର୍ଡଙ୍କ ଉଭୟ ହାତରେ ଫାର୍ସା ଚୋଟ ବାଜିଥିଲା।
ଏହାପରେ ଉଭୟେ ଥାନାକୁ ଖବର ଦେଇଥିଲେ । ଖବର ପାଇ ପୁଲିସ୍ ର ଅନ୍ୟ କର୍ମଚାରୀମାନେ ଆସି ଅଭିଯୁକ୍ତ ଦ୍ୱୟକୁ କାବୁ କରିବା ସହ ସେମାନେ ବ୍ୟବହାର କରିଥିବା ଖଣ୍ଡା, ଫାର୍ସା, ବାଇକ ସହ ମୋବାଇଲ ଫୋନ ଜବତ କରି ଥାନାକୁ ନେଇ ଅଟକ ରଖି ପଚରାଉଚରା କରିଥିଲେ। ପରେ ସେମାଙ୍କ ନାମରେ ବିଏନଏସ ଓ ଆର୍ମସ ଭଳି ଦଫା ଲଗାଇ ଆଜି ମଧ୍ୟାହ୍ନ ସମୟରେ ଅଭିଯୁକ୍ତଦ୍ୱୟକୁ କୋର୍ଟ ଚାଲାଣ କରାଯାଇଥିଲା। କୋଟରେ ଜାମିନ୍ ନାମଞ୍ଜୁର ହେବାରୁ ସେମାନଙ୍କୁ ବିଚାରବିଭାଗୀୟ ହାଜତକୁ ପଠାଇ ଦେଇଥିବା ଏସଆଇ ବିଶ୍ୱରଞ୍ଜନ ମହାନ୍ତିଙ୍କ ଠାରୁ ଜଣାପଡ଼ିଛି। ଅପରପକ୍ଷରେ କନେଷ୍ଟବଲ୍ ଏବଂ ହୋମଗାର୍ଡଙ୍କ ଅବସ୍ଥା ସ୍ଥିରଥିବା ଡାକ୍ତରଖାନା ସୂତ୍ରରୁ ଜଣାପଡ଼ିଥିବା ବେଳେ ପୁଲିସ୍ ଏ ଦିଗରେ ଅଧିକ ତଦନ୍ତ ଜାରିରଖିଛି।
