ନୂଆଦିଲ୍ଲୀ: ସୋମବାର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ଆଲୋଚନା ପରେ କନିଷ୍ଠ ଡାକ୍ତର ଆମରଣ ଅନଶନରୁ ଓହରିଛନ୍ତି । କୋଲକାତା ଆରଜି କର ମେଡିକାଲ କଲେଜ ମାମଲାରେ ଜୁନିୟର ଡାକ୍ତର ୧୬ ଦିନ ପରେ ଆମରଣ ଅନଶନ ଶେଷ କରିଛନ୍ତି । ଆଜି ରାତିରେ ନବାନ୍ନରେ ଦୀର୍ଘ ସମୟ ଧରି ମୁଖ୍ୟମନ୍ତ୍ରୀଙ୍କ ସହିତ ଆଲୋଚନା କରିବା ପରେ ଏହି ନିଷ୍ପତ୍ତି ନେଇଛନ୍ତି କନିଷ୍ଠ ଡାକ୍ତର । ଉଲ୍ଲେଖଯୋଗ୍ୟ ଯେ, ଅକ୍ଟୋବର ୫ରୁ କନିଷ୍ଠ ଡାକ୍ତର ଧର୍ମତଲ୍ଲାରେ ଆମଣର ଅନଶନରେ ବସିଥିଲେ । ୧୦ ଦଫା ଦାବି ନେଇ ଡାକ୍ତରମାନେ ଆମରଣ ଅନଶନରେ ବସିଥିଲେ ।
ସୋମବାର ସନ୍ଧ୍ୟାରେ ରାଜ୍ୟ ସଚିବାଳୟରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ କନିଷ୍ଠ ଡାକ୍ତରଙ୍କ ମଧ୍ୟରେ ପ୍ରାୟ ଦୁଇ ଘଣ୍ଟା ବୈଠକ ହୋଇଥିଲା । ଏଥିରେ କନିଷ୍ଠ ଡାକ୍ତରଙ୍କ ବିଭିନ୍ନ ଦାବି ଉପରେ ଚର୍ଚ୍ଚା ହୋଇଥିଲା । ଏହି ଦାବି ଭିତରେ ରାଜ୍ୟର ହସ୍ପିଟାଲରେ ଧମକ କଥା ମଧ୍ୟ ସାମିଲ ରହିଛି । ଆମରଣ ଅନଶନର ୧୭ତମ ଦିନରେ ନବନ୍ନା (ସଚିବାଳୟ)ରେ ଆୟୋଜିତ ବୈଠକର ପ୍ରଥମ ଥର ଲାଇଭ୍ ଷ୍ଟ୍ରିମିଂ କରାଯାଇଥିଲା ।
ବୈଠକରେ ମୁଖ୍ୟମନ୍ତ୍ରୀ ମମତା ବାନାର୍ଜୀ କନିଷ୍ଠ ଡାକ୍ତରଙ୍କୁ ଅନଶନରୁ ଓହରିବା ପାଇଁ ଅପିଲ୍ କରିଥିଲେ । ମମତା କହିଥିଲେ ଯେ, ଅଧିକାଂଶ ଦାବିର ସମାଧାନ କରାଯାଇଛି, ତେବେ ରାଜ୍ୟର ସ୍ୱାସ୍ଥ୍ୟ ସଚିବଙ୍କୁ ହଟାଯିବା ଦାବିକୁ ଗ୍ରହଣ କରାଯାଇ ନାହିଁ । ସ୍ୱାସ୍ଥ୍ୟ ସଚିବଙ୍କୁ ହଟାଯିବା ଦାବି ଉପରେ ମୁଖ୍ୟମନ୍ତ୍ରୀ କହିଥିଲେ ଯେ, ବିନା କୌଣସି ପ୍ରମାଣରେ ତାଙ୍କୁ ଅଭିଯୁକ୍ତ କହିବା ଭୁଲ ହେବ । ଏହା ଉପରେ ଡାକ୍ତର ଜବାବ ଦେଇ କହିଥିଲେ, ଆଇନ ଅନୁସାରେ କୌଣସି ବ୍ୟକ୍ତିକୁ ସେପର୍ଯ୍ୟନ୍ତ ଅଭିଯୁକ୍ତ କୁହାଯାଇପାରିବ, ଯେପର୍ଯ୍ୟନ୍ତ ସେ ଦୋଷୀ ସାବ୍ୟସ୍ତ ହୋଇନାହାନ୍ତି ।
