ନୂଆଦିଲ୍ଲୀ,୨୯/୧୦: କାନାଡାରେ ଭାରତୀୟ ବ୍ୟବସାୟୀ ଦର୍ଶନ ସିଂହଙ୍କୁ ହତ୍ୟା। କାନାଡାର ସର ସହରରେ ପଞ୍ଜାବ ବଂଶୋଦ୍ଭବ ଜଣେ ବିଶିଷ୍ଟ ବ୍ୟବସାୟୀ ଦର୍ଶନ ସିଂହଙ୍କୁ ଗୁଳି କରି ହତ୍ୟା କରାଯାଇଛି। ସେ ତାଙ୍କ ବାସଭବନରୁ ବାହାରିବା ସମୟରେ ତାଙ୍କ ଘର ବାହାରେ ଏହି ଘଟଣା ଘଟିଥିଲା। ଦର୍ଶନ ସିଂହ କପଡ଼ା ପୁନଃଚକ୍ରଣ ବ୍ୟବସାୟରେ ଜଡିତ ଥିଲେ ଏବଂ ତାଙ୍କ କାରଖାନାରେ ଶହ ଶହ ଶ୍ରମିକଙ୍କୁ ନିଯୁକ୍ତି ଦେଇଥିଲେ।
କାନାଡା ପୁଲିସ ଏହି ମାମଲାର ତଦନ୍ତ ଆରମ୍ଭ କରିଛି ଏବଂ ଦାଦାବଟି ଆଦାୟ ଦିଗକୁ ମଧ୍ୟ ଅନୁସନ୍ଧାନ କରୁଛି। ପ୍ରାଥମିକ ସୂଚନା ଅନୁଯାୟୀ, ଦର୍ଶନ ସିଂହଙ୍କୁ ଅନେକ ଦିନି ଧରି ଧମକ ମିଳୁଥିଲା, କିନ୍ତୁ ସେ ଏହାକୁ ଗମ୍ଭୀରତାର ସହ ନେଇ ନଥିଲେ।ଦର୍ଶନ ସିଂହ, ମୂଳତଃ ପଞ୍ଜାବର ଲୁଧିଆନା ଜିଲ୍ଲା ନିକଟସ୍ଥ ଦୋରାହା ଅଞ୍ଚଳର, କିଛି ବର୍ଷ ପୂର୍ବରୁ ସେ କାନାଡା ଚାଲିଯାଇଥିଲେ। ସେ ତାଙ୍କର କଠିନ ପରିଶ୍ରମ ଏବଂ ବ୍ୟବସାୟିକ ବୁଦ୍ଧି ମାଧ୍ୟମରେ ସେଠାରେ ଖ୍ୟାତି ଅର୍ଜନ କରିଥିଲେ। ଭାରତୀୟ-ଆମେରିକୀୟ ସମ୍ପ୍ରଦାୟରେ ତାଙ୍କୁ ବହୁତ ସମ୍ମାନ କରାଯାଉଥିଲା ଏବଂ ସେ ସମାଜ ସେବା ଏବଂ ଦାନଶୀଳ କାର୍ଯ୍ୟରେ ସକ୍ରିୟ ଭାବରେ ଜଡିତ ଥିଲେ।ତଥାପି, କାନାଡା ପୁଲିସ ବର୍ତ୍ତମାନ ହତ୍ୟାକାଣ୍ଡରେ କୌଣସି ଗ୍ୟାଙ୍ଗଷ୍ଟର କିମ୍ବା ଦାଦାବଟି ଆଦାୟକାରୀ ଦଳର ସମ୍ପୃକ୍ତିକୁ ଖାରଜ କରିଛି। ପୁଲିସ କହିଛି ଯେ, ତାଙ୍କ ପରିବାର ଲୋକେ ଏ ସମ୍ପର୍କରେ କୌଣସି ସନ୍ଦେହ ପ୍ରକାଶ କରିନାହାଁନ୍ତି। ତଦନ୍ତକାରୀ ସଂସ୍ଥା ସନ୍ଦେହ କରୁଛି ଯେ, ହତ୍ୟାକାଣ୍ଡ ପୁରୁଣା ଶତ୍ରୁତା କିମ୍ବା ବ୍ୟକ୍ତିଗତ ବିବାଦ ଯୋଗୁଁ ହୋଇଥାଇପାରେ।
ସେପଟେ ଲରେନ୍ସ ବିଷ୍ନୋଇ ଗ୍ୟାଙ୍ଗ ସହିତ ଜଡିତ ଅପରାଧୀ ଗୋଲ୍ଡି ଢିଲୋନ୍ ଏକ ସୋସିଆଲ ମିଡିଆ ପୋଷ୍ଟରେ ବ୍ୟବସାୟୀ ଦର୍ଶନ ସିଂହ ସାହାସିଙ୍କ ହତ୍ୟା ପାଇଁ ନିଜକୁ ଦାୟୀ ବୋଲି କହିଛି। ପୋଷ୍ଟରେ, ଗ୍ୟାଙ୍ଗ ଦାବି କରିଛି ଯେ, ସେମାନେ ଦର୍ଶନ ସିଂହଙ୍କ ବଡ଼ ବ୍ୟବସାୟ ବଦଳରେ ତାଙ୍କଠାରୁ ଟଙ୍କା ଦାବି କରିଥିଲେ, କିନ୍ତୁ ଯେତେବେଳେ ଦର୍ଶନ ସିଂହ ଟଙ୍କା ଦେବାକୁ ମନା କରିଦେଲେ ଏବଂ ସେମାନଙ୍କ ନମ୍ବରକୁ ବ୍ଲକ୍ କରିଦେଲେ, ସେତେବେଳେ ଗ୍ୟାଙ୍ଗ ଏହି ପଦକ୍ଷେପ ନେଇଥିବା ଗ୍ରହଣ କରିଛି।
