ଦଶମନ୍ତପୁର,୧୧/୧୧: ଶୌଚାଳୟ କି ପାନୀୟଜଳ ସୁବିଧା ନାହିଁ । ଏଥିଯୋଗୁ ବହୁ ଅସୁବିଧା ଭୋଗୁଛନ୍ତି ପର୍ଯ୍ୟଟକ । ପର୍ଯ୍ୟଟକମାନେ ଜଳକ୍ରୀଡ଼ାରେ ମସଗୁଲ୍ ଥିବା ବେଳେ ସେମାନଙ୍କ ବହୁ ସାମଗ୍ରୀ ଚୋରି ହୋଇଯାଉଛି । ପ୍ରଶାସନର ଅଣଦେଖା ଏବଂ ରାଜନେତାଙ୍କ ଆନ୍ତରିକତା ଅଭାବରୁ ଅବ୍ୟବସ୍ଥାରେ ରହିଛି କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ୍ ମୁଜାଙ୍ଗ ପଞ୍ଚାୟତର ପୁଞ୍ଜିସିଲ୍ ଜଳପ୍ରପାତ । ଏହି କାରଣରୁ ଏଠାକୁ ଆସିବା ଲାଗି ମୁହଁ ମୋଡୁଛନ୍ତି ପର୍ଯ୍ୟଟକ ।
ମୁଜାଙ୍ଗ ପଞ୍ଚାୟତ ପୁଞ୍ଜିସିଲ୍ ଗାଁ ନିକଟରେ ରହିଛି ଏହି ସୌନ୍ଦର୍ଯ୍ୟ ଭରା ପର୍ଯ୍ୟଟନସ୍ଥଳୀ । ବିରାଟ ପଥର ଉପରଦେଇ ପାଣି ପ୍ରବାହିତ ହେଉଛି । ଏଠାରେ ପର୍ଯ୍ୟଟକମାନେ ଜଳକ୍ରୀଡ଼ା କରିବା ସାଙ୍ଗକୁ ପ୍ରକୃତିର ମନୋରମ ଦୃଶ୍ୟକୁ ମନଭରି ଉପଭୋଗ କରିବା ଲାଗି ପର୍ଯ୍ୟାପ୍ତ ଭିତ୍ତିଭୂମି ରହିଛି । ବର୍ତ୍ତମାନ ଜିଲ୍ଲାରେ ଶୀତ ଆରମ୍ଭ ହୋଇଥିବାରୁ ଅବିଭକ୍ତ କୋରାପୁଟ ଜିଲ୍ଲା ସମେତ ପଡ଼ୋଶୀ ରାଜ୍ୟର ଶତାଧିକ ପର୍ଯ୍ୟଟକ ଏଠାକୁ ଆସୁଛନ୍ତି । ଜିଲ୍ଲା ଖଣିଜ ପାଣ୍ଠିରୁ ଲକ୍ଷାଧିକ ଟଙ୍କା ବ୍ୟୟରେ ଏଠାରେ ଗୋଷ୍ଠୀ ଶୌଚାଳୟ ଏବଂ ବିଶ୍ରାମଗୃହ ନିର୍ମାଣ କରାଯାଇଛି । ଅଥଚ ଶୌଚାଳୟ ବ୍ୟବହାର ପାଇଁ ପାଣି ସୁବିଧା ନାହିଁ । ଗୃହଗୁଡିକର ରକ୍ଷଣାବେକ୍ଷଣ କରାଯାଉନଥିବାରୁ ସେଠାରେ ତାଲା ଝୁଲି ରହୁଛି । ବର୍ତ୍ତମାନ କୋଠାଗୁଡିକ ଭୂତକୋଠୀରେ ପରିଣତ ହୋଇଛି । ଏଠାରେ ଦୁଇଟି ପିଣ୍ଡି କରାଯାଇଛି । ସେଥିରେ ଖଲିପତ୍ର, ଅନ୍ୟାନ୍ୟ ଆବର୍ଜନା ଓ ମଦବୋତଲ କାଚ ଭର୍ତ୍ତି ହୋଇଛି । ପାରିପାର୍ଶ୍ବିକ ଅଞ୍ଚଳରେ ଭୋଜିଭାତର ଆସର ଜମୁଛି । ଲୋକେ ଏଣେତେଣେ ମଳତ୍ୟାଗ କରୁଛନ୍ତି । ଏଥିଯୋଗୁ ଜଳପ୍ରପାତ ନିକଟରେ ଅସ୍ୱାସ୍ଥ୍ୟକର ପରିବେଶ ସୃଷ୍ଟି ହେଉଛି । ଏଠାରେ ଗୋଟିଏ ନଳକୂଅ ଥିଲେବି ସେଥିରୁ ବାହାରୁଥିବା ପାଣି ପିଇବା ଉପଯୋଗୀ ନୁହେଁ । ରୋଷେଇ କଲେ ଭାତ କଳା ହୋଇଯାଉଛି । ଲୋକେ ଗାଁକୁ ଯାଇ ପାଣି ଆଣୁଛନ୍ତି । ଏହି କାରଣରୁ ପର୍ଯ୍ୟଟକମାନେ ଏଠାକୁ ଆସିବାକୁ ମୁଁହ ମୋଡୁଥିବା ଗାଁର ବିନ୍ଦା ବଡ଼ନାୟକ, ଗରିଆ ବଡ଼ନାୟକ, ଦରା ବଡ଼ନାୟକ, ଲୋଚନ ବଡ଼ନାୟକ, ଭୀମ ବଡ଼ନାୟକ ପ୍ରମୁଖ ଅଭିଯୋଗ କରିଛନ୍ତି ।
ଗ୍ରାମବାସୀ କହିଛନ୍ତି, ଏହି ପର୍ଯ୍ୟଟନସ୍ଥଳୀର ବିକାଶ କରିବା ଲାଗି ସେମାନଙ୍କୁ ନେଇ ଏକ କମିଟି ଗଢାଯାଉ । କମିଟିକୁ ପ୍ରଶାସନ ପକ୍ଷରୁ ଦାୟିତ୍ୱ ଦିଆଗଲେ ଘରଗୁଡ଼ିକ ସଫାସୁତୁରା ରହିବ । ପର୍ଯ୍ୟଟନମାନେ ସୁବିଧା ଓ ନିର୍ଭୟରେ ମଜା ନେଇପାରିବେ । ଏଠାରେ ପର୍ଯ୍ୟଟକମାନେ ଜଳକ୍ରୀଡ଼ାରେ ମସ୍ଗୁଲ ଥିବା ବେଳେ ଦିନ ଦ୍ୱିପହରରେ ଚୋରି ହେଉଛି । ଏଥିଯୋଗୁ ସେମାନେ ନିଜକୁ ଅସୁରକ୍ଷିତ ମଣୁଛନ୍ତି ।
ଜଗିବା ଲୋକ ନଥିବାରୁ ଦୁବୃର୍ତ୍ତମାନେ ପର୍ଯ୍ୟଟକଙ୍କ ମୋବାଇଲ ଫୋନ୍ ଏବଂ ଅନ୍ୟାନ୍ୟ ଜିନିଷପତ୍ର ଚୋରି କରି ନେଉଛନ୍ତି । ଏଠାରେ ବିଦ୍ୟୁତ୍ଖୁଣ୍ଟ ଏବଂ ତାର ଅଛି । ଆଲୁଅ ସୁବିଧା ନାହିଁ । ପ୍ରଶାସନର ଆନ୍ତରିକତା ଅଭାବରୁ ପୁଞ୍ଜିସିଲ୍ ବିକାଶଠାରୁ ବହୁ ଦୁରରେ ଥିବା ଗାଁ ଲୋକେ କ୍ଷୋଭର କହିଛନ୍ତି । ଜିଲ୍ଲା ପ୍ରଶାସନ ଓ ପର୍ଯ୍ୟଟନ ବିଭାଗ ତୁରନ୍ତ ଏ ଦିଗରେ ଦୃଷ୍ଟି ଦେଇ ପାନୀୟଜଳ ସୁବିଧା କରିବା ସହ ସୁରକ୍ଷା ପାଇଁ ଗାଁ ଲୋକଙ୍କୁ ଦାୟିତ୍ୱ ଦେବାକୁ ସେମାନେ ଦାବି କରିଛନ୍ତି । ଏହା ହେଲେ ଏଠାରେ ଅଧିକ ପର୍ଯ୍ୟଟକ ଆସିପାରିବେ । ଏ ସମ୍ପର୍କରେ ଆମେ ବିଡିଓ ମିଲନ କୁମାର ଝାଙ୍କରଙ୍କୁ ପଚାରିବାରୁ କହିଛନ୍ତି, ପର୍ଯ୍ୟଟନସ୍ଥଳୀକୁ ସ୍ଥିତି ଅନୁଧ୍ୟାନ କରିବେ । ତା’ପରେ କ'ଣ କଲେ ସୁବିଧା ହେବ, ଗାଁ ଲୋକଙ୍କୁ ନେଇ ଆଲୋଚନା ପରେ ଆବଶ୍ୟକ ପଦକ୍ଷେପ ନେବେ।
