ନୂଆଦିଲ୍ଲୀ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଡିସେମ୍ବରରେ ଭାରତ ଗସ୍ତରେ ଆସିବେ। କ୍ରେମଲିନର ବରିଷ୍ଠ ଅଧିକାରୀ ୟୁରି ଉଶାକୋଭ ଏହା ସ୍ପଷ୍ଟ କରିଛନ୍ତି । ସେ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ପୁଟିନ ସୋମବାର ଚୀନରେ ଅନୁଷ୍ଠିତ ହେବାକୁ ଥିବା ସାଂଘାଇ ସହଯୋଗ ସଂଗଠନ (SCO) ଶିଖର ସମ୍ମିଳନୀରେ ସାକ୍ଷାତ କରିବେ । ସେଠାରେ ତାଙ୍କ ଡିସେମ୍ବର ଗସ୍ତର ପ୍ରସ୍ତୁତି ବିଷୟରେ ଆଲୋଚନା କରାଯିବ । ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ପୂର୍ବରୁ ସୂଚିତ କରିଥିଲେ ଯେ, ପୁଟିନ ଖୁବଶୀଘ୍ର ଭାରତ ଗସ୍ତ କରିବେ । ସେତେବେଳେ ତାରିଖ ସ୍ଥିର ହୋଇନଥିଲା । ଡୋଭାଲ କହିଥିଲେ ଯେ, ଭାରତ-ରୁଷ ମଧ୍ୟରେ ଏକ ବିଶେଷ ଏବଂ ଦୀର୍ଘସ୍ଥାୟୀ ସମ୍ପର୍କ ରହିଛି, ଯାହାକୁ ଉଭୟ ଦେଶ ସମ୍ମାନ ଦିଅନ୍ତି।
ଏହି ଘୋଷଣା ଏପରି ସମୟରେ ହୋଇଛି ଯେତେବେଳେ ଆମେରିକା ଭାରତ ଉପରେ ଅତିରିକ୍ତ ୨୫ ପ୍ରତିଶତ ଶୁଳ୍କ ଲାଗୁ କରିଛି। ରୁଷରୁ ଭାରତ ତୈଳ ଆମଦାନୀ କରୁଥିବାରୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ପଦକ୍ଷେପ ନେଇଛନ୍ତି । ସେ ଅଭିଯୋଗ କରିଛନ୍ତି ଯେ, ଭାରତ ରିହାତିରେ ରୁଷୀୟ ତେଲ କିଣି ଏବଂ ଏହାର ଏକ ଅଂଶ ଖୋଲା ବଜାରରେ ଅଧିକ ମୂଲ୍ୟରେ ବିକ୍ରୟ କରି ବିପୁଳ ଲାଭ କରୁଛି । ଫେବୃଆରୀ ୨୦୨୨ରେ ରୁଷ-ୟୁକ୍ରେନ ଯୁଦ୍ଧ ଆରମ୍ଭ ହେବା ପରେ ପାଶ୍ଚାତ୍ୟ ଦେଶମାନେ ରୁଷର ଆୟକୁ କମ୍ କରିବାକୁ ଚେଷ୍ଟା କରିଥିଲେ। ଯେତେବେଳେ ୟୁରୋପୀୟ ବଜାର ବନ୍ଦ ହୋଇଗଲା, ରୁଷ ତାର ତେଲ ଭାରତ ଏବଂ ଚୀନ୍ ଭଳି ଦେଶକୁ ପଠାଇଲା । ଫଳସ୍ୱରୂପ ରୁଷ କୋଟି କୋଟି ଡଲାର ରୋଜଗାର କଲା ।
ଏହି ମାସର ଆରମ୍ଭରେ ପୁଟିନ ପ୍ରଧାନମନ୍ତ୍ରୀ ମୋଦୀଙ୍କୁ ଫୋନ୍ କରି ଆଲାସ୍କାରେ ଟ୍ରମ୍ପଙ୍କ ସହ ତାଙ୍କର ସାକ୍ଷାତର ବିବରଣୀ ଦେଇଥିଲେ। ଏହି ସମୟରେ ମୋଦୀ ପୁଣି କହିଥିଲେ ଯେ, ଭାରତ ସର୍ବଦା ଯୁଦ୍ଧର ଶାନ୍ତିପୂର୍ଣ୍ଣ ସମାଧାନ ଚାହୁଁଛି । ସେପଟେ ପୁଟିନ ଭାରତ ଆସିବେ ବୋଲି ଦୀର୍ଘଦିନ ଧରି ଚର୍ଚ୍ଚା ଲାଗି ରହିଛି । ପ୍ରଧାନମନ୍ତ୍ରୀ ମୋଦୀ ରୁଷ ରାଷ୍ଟ୍ରପତି ପୁଟିନଙ୍କୁ ଭାରତ ଆସିବା ଲାଗି ଆମନ୍ତ୍ରଣ କରିଥିଲେ ।
ପ୍ରଧାନମନ୍ତ୍ରୀ ମୋଦୀ ଓ ରାଷ୍ଟ୍ରପତି ପୁଟିନ୍ ଅଗଷ୍ଟ ୩ରୁ ସେପ୍ଟେମ୍ବର ୧ ପର୍ଯ୍ୟନ୍ତ ଚୀନରେ ଅନୁଷ୍ଠିତ ହେବାକୁ ଥିବା SCO ସମ୍ମିଳନୀରେ ଯୋଗଦେବେ । ଉଶାକୋଭ କହିଛନ୍ତି ଯେ, ସେପ୍ଟେମ୍ବର ୧ରେ SCO ପ୍ଲସ୍ ବୈଠକ ପରେ ରାଷ୍ଟ୍ରପତି ପୁଟିନ ଭାରତୀୟ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବେ । ଏହା ଚଳିତ ବର୍ଷ ଦୁଇ ରାଷ୍ଟ୍ର ନେତାଙ୍କ ପ୍ରଥମ ସାକ୍ଷାତ ହେବ । ଉଶାକୋଭ କହିଛନ୍ତି, ଦୁଇ ଦେଶ ମଧ୍ୟରେ ଏକ ବିଶେଷ ରଣନୈତିକ ସହଭାଗୀତା ରହିଛି । ୨୦୧୦ ଡିସେମ୍ବରରେ ଏହା ଉପରେ ଏକ ଗୁରୁତ୍ୱପୂର୍ଣ୍ଣ ଘୋଷଣା କରାଯାଇଥିଲା ଏବଂ ଚଳିତ ବର୍ଷ ଏହାର ୧୫ତମ ବର୍ଷପୂର୍ତ୍ତି । ଏହି ବୈଠକ ସମୟରେ ରାଷ୍ଟ୍ରପତି ପୁଟିନଙ୍କ ଡିସେମ୍ବରରେ ଭାରତ ଗସ୍ତ ପାଇଁ ପ୍ରସ୍ତୁତି ଉପରେ ମଧ୍ୟ ଆଲୋଚନା କରାଯିବ ।
