ସାହଜପାଲ/ବୌଦ୍ଧ,୨୨/୭ :  ସଦର ବ୍ଲକ ତେଲିବନ୍ଧ ପଂଚାୟତ ଚନ୍ଦ୍ରପୁର ଗ୍ରାମରେ ବର୍ଷା ହେଲେ ଗ୍ରାମ୍ୟ ରାସ୍ତାରେ ବର୍ଷା ପାଣି ଜମି ରହୁଛି l ଗାଁରେ ୭ବର୍ଷ ପୂର୍ବେ କଂକ୍ରିଟ କରଣ କରାଯାଇଥିଲା l କିନ୍ତୁ ଏଲଏଣ୍ଡଟି କମ୍ପାନୀ ପକ୍ଷରୁ ଗାଁରେ ଜଳ ଯୋଗାଣ ଲାଗି ପାଇପ ବିଛା ଗଲା l କଂକ୍ରିଟ ରାସ୍ତା ଭାଙ୍ଗିବା ସହ ଡ୍ରେନ ଭାଙ୍ଗି ପୋତି ଦିଆଗଲା l କିନ୍ତୁ ଏଲଏଣ୍ଡଟି ସଂସ୍ଥା ଡ୍ରେନ କଲା ନାହିଁକି ରାସ୍ତା ମରାମତି କଲା ନାହିଁ l ନିରବ ସାଜିବା ଯୋଗୁଁ ବର୍ଷା ଋତୁ ଚାଲିଥିବା ବେଳେ ବର୍ଷା ପାଣି ଯାଇ ପାରୁନାହିଁ l ଫଳରେ ପାଣି ଗ୍ରାମ୍ୟ ରାସ୍ତାରେ ଲହଡି ମାରୁଛି l ଏପରିକି ଲୋକଙ୍କ ଘରେ ମଧ୍ୟ ବର୍ଷା ପାଣି ପଶି ଯାଉଛି l 

ଗାଁର ସମସ୍ତ ପଡ଼ାରୁ ଆସୁଥିବା ବର୍ଷା ପାଣି କୁଆଡ଼େ ନ ଯାଇ ରାସ୍ତା ଉପରେ ଲହଡ଼ି ମାରୁଛି l ମଇଳା ପାଣି ମାଡି ଲୋକେ ଯିବା ଆସିବା କରୁଛନ୍ତି l ପାଣି ରହିଥିବା ଯୋଗୁଁ ମଶା ମାଛିଙ୍କ ପ୍ରାଦୁର୍ଭାବ ଯୋଗୁଁ ଦୁର୍ଗନ୍ଧ ମୟ ପରିବେଶ ସୃଷ୍ଟି ହେଉଛି l ଏହି ରାସ୍ତା ଦେଇ ଯିବା ଆସିବା କରୁଥିବା ଲୋକେ ବିଭିନ୍ନ ଅସୁବିଧା ସମ୍ମୁଖୀନ ହେଉଛନ୍ତି l ଗାଁର ଗୁଢ଼ୀ ଘର ପାଖରେ ଥିବା ନଳକୂପର ପାଣି କୌଣସି ଆଡେ ଯାଇପାରୁନାହଁ l ଫଳରେ ରାସ୍ତାରେ ନଳକୂପର ମଇଳା ପାଣି ଜମି ରହି ଅପ୍ରୀତିକର ପରିସ୍ଥିତି ଉପୁଜିଛି l ତା’ସହ କେତେକ ସ୍ଥାନରେ ଖାଲୁଆ ଅଂଶ ଥିବାବେଳେ ସେଠାର ମାଟି ଗଣ୍ଡେ ସଂସ୍ଥା ପକ୍ଷରୁ ପକାଯାଇନାହିଁ l ସେଇ ଖାଲୁଆ ସ୍ଥାନରେ ପାଣି ଜମି ବଡ଼ ବଡ଼ ଗର୍ତ୍ତ ସୃଷ୍ଟି ହେଲାଣି l ଏପରିକି ସେଇ ଖlଲରେ ଲୋକେ ପଡ଼ି ଦୁର୍ଘଟଣାର ଶିକାର ହେଲେଣି l ବହୁ ବର୍ଷା ହେବାର ସମ୍ଭାବନା ଥିବାରୁ ଏକ ସପ୍ତାହ ମଧ୍ୟରେ ଡ୍ରେନ୍ ନିର୍ମାଣ କରା ନ ଗଲେ ଲୋକଙ୍କ ବହୁ କ୍ଷତି ହେବାର ସମ୍ଭାବନା ଅଛି l ଏଣୁ ତୁରନ୍ତ ପଦେକ୍ଷପ ଗ୍ରହଣ କରି ଡ୍ରେନ ନିର୍ମାଣ ସହ ଖାଲୁଆ ସ୍ଥାନରେ ମାଟି ପକାଇବାକୁ ସାଧାରଣରେ ଦାବି ହେଉଛି l