ପାରଳାଖେମୁଣ୍ଡି,୧୭/୫ : ଗଜପତି ଜିଲ୍ଲା ତଥା ରାଜ୍ୟର ଚାଞ୍ଚଲ୍ୟକର ସୃଷ୍ଟି କରିଥିବା ରାଜଲକ୍ଷ୍ମୀ ହତ୍ୟାକାଣ୍ଡ ଘଟଣାର ପର୍ଦ୍ଦାଫାଶ ହେବା ପରେ ଦିନକୁ ଦିନ ନୂଆ ନୂଆ ତଥ୍ୟ ସାମନାକୁ ଆସୁଛି । ପାଳିତା ନାବାଳିକା ଝିଅ ତାର ନିଜ ପ୍ରେମିକ ଓ ପ୍ରେମିକର ସାଙ୍ଗ ସହିତ ତିନି ଜଣ ମିଶି ରାଜଲକ୍ଷ୍ମୀଙ୍କୁ ହତ୍ୟା କରିବା ପରେ ଗୋଟିଏ ଆମ୍ବୁଲାନ୍ସ ଡାକି ଘରୁ ବିଳମ୍ବିତ ରାତିରେ ସ୍ଥାନୀୟ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ । ତା ପୂର୍ବରୁ ସେହି ପୁରୁଷ ବନ୍ଧୁ ଦୁଇ ଜଣ ମେଡିକାଲ ଭିତରକୁ ଯାଇ ପୂରା ଘେରା ମାରି ସେଠାରେ କିଏ ଡାକ୍ତର ଅଛନ୍ତି ଓ କିଏ କିଏ ଷ୍ଟାପ୍ ସବୁ ଅଛନ୍ତି ସେ ସବୁ ତନଖି କରିଥିବା ବିଶେଷ ସୁତ୍ରରୁ ଜଣାପଡ଼ିଛି । ସେଠାକୁ ନେଇ କିପରି ନାଟକ କରି ଅତିଶୀଘ୍ର ମୃତଦେହକୁ ପୁଣି ଭୂବନେଶ୍ୱର ନିଆଯିବ ସେ ସବୁ ଉତ୍ତମ ଭାବେ ଉପାୟ କରିଥିବା ଜଣାପଡ଼ିଛି । ସେହି ରାତିରେ ସେଠାରେ ଥିବା କିଛି ପ୍ରତ୍ୟେକ୍ଷଦର୍ଶୀ ନିଜ ନାମ ଗୁପ୍ତ ରଖି ପ୍ରକାଶ କରିଛନ୍ତି ।
ଯେପରି ହତ୍ଯା କରାଯାଇଥିଲା ତାହା ଭଲ ଭାବରେ ନିରେଖି ସୁକ୍ଷ୍ମରୁ ସୁକ୍ଷ୍ମ ବିଷୟକୁ ଯାଞ୍ଚ ନ କଲେ କେହି ବି ଜାଣିବା ସମ୍ଭବ ନ ଥିଲା ଏବଂ ଏହାର ଲାଭ ତିନି ହତ୍ୟାକାରୀ ଉଠାଇଥିଲେ । ତେବେ କଥା ହେଉଛି ମୃତ ରାଜଲକ୍ଷ୍ମୀ ନିଜର ସବୁକିଛି ତ୍ଯାଗ କରିଦେଇଥିଲେ ଏହି ନାବାଳିକା ପାଇଁ । ସେ ପୋଷ୍ୟ ଗ୍ରହଣ କରିବା ପରେ ପତି ସଞ୍ଜୟଙ୍କ ସହ ମିଶି ବିଭିନ୍ନ ବ୍ଯବସାୟ କରି ଝିଅର ଲାଳନପାଳନ କରିଥିଲେ । କେବଳ ଭଲ ସ୍କୁଲରେ ପଢ଼ାଇବା ଲକ୍ଷ୍ୟରେ ପାରଳାଖେମୁଣ୍ଡି ଆସିଥିଲେ । ଭୁବନେଶ୍ୱର କେନ୍ଦ୍ରୀୟ ବିଦ୍ୟାଳୟରେ ସିଟ୍ ନ ମିଳିବାରୁ ଏବଂ ପାରଳାଖେମୁଣ୍ଡି ସ୍କୁଲରେ ସିଟ୍ ମିଳିବାରୁ ପ୍ରଥମ ଶ୍ରେଣୀରେ ଭର୍ତ୍ତି କରିବା ସହିତ ଦୀର୍ଘ ୭ ବର୍ଷ ହେଲା ପାରଳାଖେମୁଣ୍ଡିରେ ରହି ଆସୁଥିଲେ । ଇତି ମଧ୍ଯରେ ପତିଙ୍କ ମୃତ୍ୟୁ ହୋଇ ଚଳିବା କଷ୍ଟକର ହେଉଥିଲେ ମଧ୍ୟ ଝିଅକୁ କୌଣସିଥିରେ ଉଣା କରୁ ନଥିଲେ ବୋଲି ରାଜଲକ୍ଷ୍ମୀଙ୍କ ଧରମ ଭାଇ ରବିନ୍ଦ୍ର ମହାନ୍ତି କହିଛନ୍ତି ।
ଆଗରୁ କୌଣସି ପୂର୍ବ ପୁରୁଷ ସମ୍ପତ୍ତି ନ ଥିବାବେଳେ ନା ଶାଶୁ ଘର ନା ବାପ ଘର କେହି ବି ଥିଲା ବାଲା ନୁହଁନ୍ତି । କଷ୍ଟ ପଡ଼ି ଗୁଜରାଣ ମେଣ୍ଟାଇବା ପରିସ୍ଥିତି ବୋଲି ରବିନ୍ଦ୍ର କହିଛନ୍ତି । ଏଠାରେ ଝିଅ, ରାଜଲକ୍ଷ୍ମୀ ଓ ରବିନ୍ଦ୍ର ମିଶି ଭଡ଼ା ଘରେ ରହୁଥିଲେ । ତେବେ ରବିନ୍ଦ୍ର ସ୍ଥାନୀୟ ଗୋଟିଏ ହୋଟେଲରେ କାମ କରୁଥିବାରୁ ସେ ସକାଳ ୬ଟାରୁ ଘରୁ ବାହାରି ରାତ୍ରି ୯ଟା କିମ୍ବା ୧୦ଟାରେ ଫେରନ୍ତି । ବେଳେବେଳେ ରାତି ମଧ୍ଯ ହୋଟେଲରେ ରହି ଯାଉଥିବାରୁ କିମ୍ବା ନିଜ ଘର ଭୁବନେଶ୍ୱର ଯାଉଥିବାବେଳେ ପ୍ରାୟ ସମୟ ଘରେ ରୁହନ୍ତି ନାହିଁ । ସଞ୍ଜୟଙ୍କ ମୃତ୍ୟୁ ପରେ ଚଳିବା ବଡ଼ ଅସୁବିଧା ହେବାରୁ ସେ ଭଉଣୀଙ୍କୁ କପଡ଼ା ଆଣି ବିକ୍ରି କରିବା ପାଇଁ କହିଥିଲେ । ପରେ ଏହା ସହିତ କିଛି କସମେଟିକ ଓ ଅନ୍ୟାନ୍ୟ ଜିନିଷ ମଧ୍ଯ ରାଜଲକ୍ଷ୍ମୀ ବ୍ରହ୍ମପୁର କଟକ ଆଦି ଜାଗାରୁ ଆଣି ବିକ୍ରୟ କରି ଚଳୁଥିବା ବେଳେ ଝିଅର ତିଳେ ହେଲେ ଅସୁବିଧା କରୁନଥିଲେ ବୋଲି ରବିନ୍ଦ୍ର କହିଛନ୍ତି ।
ମା ଏବଂ ରବିନ୍ଦ୍ରଙ୍କ ଘରେ ଅନୁପସ୍ଥିତି ଝିଅକୁ ଅବାଟରେ ଯିବା ପାଇଁ ସୁଯୋଗ ଦେଲା । ଏହି କିଛି ମାସ ହେଲା ସେହି ଦୁଇ ପିଲା ଘରକୁ ଆସିବା ଏବଂ ଝିଅ ସହିତ ଅଧିକ ମିଶିବାକୁ କଡା ବିରୋଧ କରୁଥିଲେ ରାଜଲକ୍ଷ୍ମୀ । ଏହି ବିରୋଧ ଯେ ଏକାଥରେ ଜୀବନ ନେଇଯିବ ଏକଥା କେବେବି କଳ୍ପନା କରି ନଥିଲେ ଉଭୟ ରବିନ୍ଦ୍ର ଓ ରାଜଲକ୍ଷ୍ମୀ । ଏତେ ଛୋଟ ବୟସରୁ ଏତେ କ୍ରୁରତା ଏଡ଼େ ବଡ଼ ଘୃଣ୍ଯ କାମ କରିପାରନ୍ତି ଭାବି ଭାବି କାନ୍ଦୁଛନ୍ତି ରବିନ୍ଦ୍ର । ଘଟଣା ଦିନ ବିଳମ୍ବିତ ରାତିରେ ମେଡିକାଲ ରେ ମୃତ୍ୟୁ ହୋଇଯାଇଥିବା ଖବର ଶୁଣି ଦୌଡ଼ି ଯାଇଥିଲେ ସେ । ହତବାକ ହୋଇଯାଇଥିଲେ ପୁଣି ଭୂବନେଶ୍ୱର ଗଲେ ଶବ ସତ୍କାର ବି ହେଲା । ତଥାପି କିଛିବି ବାରିପାରିଲେ ନାହିଁ ମୁଁ ବୋଲି ବଡ଼ ବିକଳ ହୋଇ କହିଛନ୍ତି ରବିନ୍ଦ୍ର। ସେ ଏତେ ସ୍ନେହ ମମତା ଦେଉଥିଲା, ଜନ୍ମିତ ସନ୍ତାନ ଠାରୁ ଅଧିକ ଆଦର କରୁଥିଲା ତାର ମାତୃତ୍ବ ମମତାକୁ ଏଡେ ଧୋଖା କି ବୋଲି ସମସ୍ତଙ୍କୁ ପ୍ରଶ୍ନ କରୁଛନ୍ତି । ସତରେ କେଡ଼େ ବିଚିତ୍ର ଏ ସମାଜ, ଯାହାକୁ ଜୀବନ ଦେଲା ସେ ବଡ଼ ହୋଇ ଜୀବନ ନେଲା ।
