ନୂଆଦିଲ୍ଲୀ: ନିକଟରେ ତାମିଲ ଫିଲ୍ମ ଷ୍ଟାର ଥାଲାପତି ବିଜୟ ରାଜନୀତିରେ ପ୍ରବେଶ କରିଛନ୍ତି । ବିଜୟ ଏକ ବଡ ରାଲିର ଆୟୋଜନ କରି 'ତମିଜାଗା ବେତ୍ରି କଷଗମ' (ଟିବିକେ) ପାର୍ଟି ଆରମ୍ଭ କରିଛନ୍ତି । ୨୭ ଅକ୍ଟୋବରରେ ବିଲୁପୁରମ୍ ଜିଲ୍ଲାରେ ଆୟୋଜିତ ଅଭିନେତା ବିଜୟଙ୍କ ରାଲିରେ ଏକ ବିରାଟ ଜନସମାଗମ ହୋଇଥିଲା। ସୁପରଷ୍ଟାର ରଜନୀକାନ୍ତ ଏହି ସଫଳ ରାଜନୈତିକ ସମ୍ମିଳନୀ ପାଇଁ ଥଲାପତି ବିଜୟଙ୍କୁ ଅଭିନନ୍ଦନ ଜଣାଇଛନ୍ତି ।
ସୁପରଷ୍ଟାର ରଜନୀକାନ୍ତ ଗୁରୁବାର ଦିନ ତାଙ୍କ ଘର ବାହାରେ ପ୍ରଶଂସକ ମାନଙ୍କୁ ଦିୱାଲୀ ଶୁଭେଚ୍ଛା ଜଣାଇଛନ୍ତି । ଏହି ସମୟରେ ଗଣମାଧ୍ୟମ ତାଙ୍କୁ ଥଲାପତି ବିଜୟଙ୍କ ରାଜନୈତିକ ପ୍ରବେଶ ବିଷୟରେ ପ୍ରଶ୍ନ ପଚାରିଥିଲା। ଏହା ଉପରେ ରଜନୀକାନ୍ତ କହିଛନ୍ତି ଯେ, ସେ ଏହି ସମ୍ମିଳନୀକୁ ବହୁତ ସଫଳତାର ସହ ଆୟୋଜନ କରିଥିଲେ । ମୁଁ ସେମାନଙ୍କୁ ଶୁଭେଚ୍ଛା ଜଣାଉଛି । ତେବେ ରଜନୀକାନ୍ତ ରାଲିରେ ବିଜୟଙ୍କ କୌଣସି ମନ୍ତବ୍ୟ ଉପରେ ମନ୍ତବ୍ୟ ଦେବାକୁ ବାରଣ କରିଛନ୍ତି।
ଟିବିକେ ପାର୍ଟି ପ୍ରତିଷ୍ଠାତା ବିଜୟ ରାଲିରେ ଡିଏମକେ ଏବଂ ଏହାର ପ୍ରଥମ ପରିବାରକୁ ସମାଲୋଚନା କରିଥିଲେ । ବିଜୟ କହିଛନ୍ତି ଯେ ରାଜ୍ୟର ଶାସକ ଦଳର ନେତାମାନେ 'ଲୋକ ବିରୋଧୀ ସରକାରକୁ ଦ୍ରାବିଡ଼ ମଡେଲ ସରକାର' ବୋଲି କହୁଛନ୍ତି । ସୂଚନାଥାଉକି,ଯେ ତାମିଲନାଡୁ ସିଏମ ଏବଂ ଡିଏମକେ ପାର୍ଟି ସଭାପତି ଏମ.କେ ଷ୍ଟାଲିନଙ୍କ ବିବୃତ୍ତି ସହିତ ଦ୍ରାବିଡ଼ ମଡେଲ ସରକାର ସଂଯୁକ୍ତ । ଏହି ରାଲିରେ ବିଜୟ ଆହୁରି କହିଛନ୍ତି ଯେ, ତାଙ୍କ ଦଳ ଧର୍ମନିରପେକ୍ଷ ସାମାଜିକ ନ୍ୟାୟର ଆଦର୍ଶ ଉପରେ ଆଧାରିତ ଏବଂ ଇଭିଆର ପେରିୟାର ଏବଂ କେ କାମରାଜଙ୍କ ଭଳି ନେତାମାନେ ଦଳର ମାର୍ଗଦର୍ଶକ ଅଟନ୍ତି।
