ହାଇଦ୍ରାବାଦ,୨୬/୧୧: ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍ ଚନ୍ଦ୍ରବାବୁ ନାଇଡୁ ଓ ତାଙ୍କ ପରିବାର ସଦସ୍ୟଙ୍କ ନାମରେ ସୋସିଆଲ ମିଡିଆରେ ଆପତ୍ତିଜନକ ମନ୍ତବ୍ୟ ଦେବାକୁ ନେଇ ଅଡୁଆରେ ପଡିଛନ୍ତି ଫିଲ୍ମ ନିର୍ମାତା ରାମଗୋପାଳ ବର୍ମା । ତାଙ୍କୁ ଗିରଫ କରିବା ଲାଗି ଆନ୍ଧ୍ରପ୍ରଦେଶର ଏକ ପୁଲିସ ଟିମ୍ ହାଇଦ୍ରାବାଦସ୍ଥିତ ରାମଗୋପାଳଙ୍କ ଘରେ ପହଞ୍ଚିଥିଲେ । ମାତ୍ର ସେ ଘରେ ନଥିବାରୁ ପୁଲିସକୁ ଖାଲି ହାତରେ ଫେରିବାକୁ ପଡିଛି । ପୂର୍ବରୁ ତାଙ୍କୁ ଦୁଇଥର ପୁଲିସ ପଚରାଉଚୁରା କରିବା ଲାଗି ସମନ୍ ଜାରି କରିଥିଲା । କିନ୍ତୁ ସେ ଥାନାକୁ ଆସି ନଥିଲେ । କୁହାଯାଉଛି କି ତାଙ୍କୁ ପୁଲିସ ଗିରଫ କରିବାର ସମ୍ଭାବନା ରହିଛି । ସମ୍ଭାବ୍ୟ ଗିରଫଦାରୀରୁ ବଞ୍ଚିବା ପାଇଁ ସେ ତାମିଲନାଡୁର କୋଏମ୍ବାଟୁର ପଳାଇଛନ୍ତି । ରାମଗୋପାଳ ପୂର୍ବତନ ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀଙ୍କ ୱାଇଏସ୍ଆର କଂଗ୍ରେସ ପାର୍ଟିର ଜଣେ ପ୍ରଶଂସକ । ତେଣୁ ସେ ଚନ୍ଦ୍ରବାବୁ ଓ ତାଙ୍କ ଦଳ ଟିଡିପି ବିରୋଧରେ ସୋସିଆଲ ମିଡିଆରେ ଅନେକ ସମୟରେ ଆପତ୍ତିଜନକ ବୟାନ ପୋଷ୍ଟ କରି ବିବାଦରେ ରହିଆସିଛନ୍ତି । ଟିଡିପି ନେତା ରାମଲିଙ୍ଗମ୍ ଗତ ୧୧ ତାରିଖରେ ରାମଗୋପାଳଙ୍କ ବିରୋଧରେ ଏଫଆଇଆର ଦାୟର କରିଥିଲେ ।
