ନୂଆଦିଲ୍ଲୀ: ଗୁରୁବାର ସନ୍ଧ୍ୟାରେ ମଧ୍ୟ ମୁମ୍ବାଇ ସ୍ଥିତ ଏକ ସ୍ମଶାନରେ ଜଣାଶୁଣା ଉଦ୍ୟୋଗପତି ରତନ ଟାଟାଙ୍କ ଅନ୍ତିମ ସଂସ୍କାର ସମ୍ପର୍ଣ୍ଣ ହୋଇଛି । ପୂରା ରାଜକୀୟ ସମ୍ମାନ ସହିତ ରତନ ଟାଟାଙ୍କ ଶେଷ ରୀତିନୀତି କରାଯାଇଛି । ମୁମ୍ବାଇ ପୋଲିସ ତାଙ୍କୁ ଗାର୍ଡ ଅଫ୍ ଅନର ଏବଂ ଶ୍ରଦ୍ଧାଞ୍ଜଳି ଅର୍ପଣ କରିଥିଲା। ଏହି ସମୟରେ ରତନ ଟାଟାଙ୍କ ସାବତ ଭାଇ ନୋଏଲ୍ ଟାଟାଙ୍କ ସମେତ ତାଙ୍କ ପରିବାରର ଅନ୍ୟ ସଦସ୍ୟ ତଥା ଟାଟା ଗ୍ରୁପ୍‌ର ଲୋକମାନେ ୱର୍ଲିର ଏହି ସ୍ମଶାନରେ ଉପସ୍ଥିତ ଥିଲେ । ଏଥିସହ କେନ୍ଦ୍ର ଗୃହମନ୍ତ୍ରୀ ଅମିତ ଶାହା, କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲ, ମହାରାଷ୍ଟ୍ରର ସିଏମ ଏକନାଥ ସିନ୍ଦେ, ଡେପୁଟି ସିଏମ ଦେବେନ୍ଦ୍ର ଫଡନାଭିସ, କଂଗ୍ରେସ ନେତା ସୁଶୀଲ କୁମାର ସିନ୍ଦେଙ୍କ ସମେତ ବହୁ ଲୋକ ସେଠାରେ ଉପସ୍ଥିତ ଥିଲେ । ପାର୍ସୀ ପରମ୍ପରା ଅନୁଯାୟୀ ରତନ ଟାଟାଙ୍କର ଶେଷ ରୀତିନୀତି କରାଯାଇଛି । ଜଣେ ଧାର୍ମିକ ନେତା କହିଛନ୍ତି ଯେ, ରତନ ଟାଟାଙ୍କ ଅନ୍ତିମ ସଂସ୍କାର ପରେ ଦକ୍ଷିଣ ମୁମ୍ବାଇର କୋଲାବାସ୍ଥିତ ତାଙ୍କ ବଙ୍ଗଳା ଠାରେ ତିନି ଦିନ ପର୍ଯ୍ୟନ୍ତ ରୀତିନୀତି କରାଯିବ । 

ସୂଚନାଥାଉକି, ରତନ ଟାଟାଙ୍କ ମୃତ୍ୟୁରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋସିଆଲ ମିଡିଆ ସାଇଟ୍ X ରେ ଏକ ଭାବପ୍ରବଣ ପୋଷ୍ଟ ଲେଖିଛନ୍ତି । ସେ ଏହି ପୋଷ୍ଟରେ ଲେଖିଛନ୍ତି, 'ଶ୍ରୀ ରତନ ଟାଟା ଜୀ ଜଣେ ଦୂରଦୃଷ୍ଟି ସମ୍ପନ୍ନ ବିଜନେସ୍ ଲିଡର, ଦୟାଳୁ ଆତ୍ମା ଏବଂ ଜଣେ ଅସାଧାରଣ ମଣିଷ ଥିଲେ । ସେ ଭାରତର ଅନ୍ୟତମ ପୁରାତନ ତଥା ପ୍ରତିଷ୍ଠିତ ବ୍ୟବସାୟ କ୍ଷେତ୍ରକୁ ସ୍ଥିର ନେତୃତ୍ୱ ପ୍ରଦାନ କରିଥିଲେ। ତାଙ୍କର ନମ୍ରତା, ଦୟା ଏବଂ ଆମ ସମାଜର ଉନ୍ନତି ପାଇଁ ଅଦମ୍ୟ ପ୍ରତିବଦ୍ଧତା ହେତୁ ସେ ଅନେକଙ୍କ ମଧ୍ୟରେ ନିଜର ପରିଚୟ ସୃଷ୍ଟି କରିଥିଲେ। 

ପିଏମ ମୋଦୀ ଅନ୍ୟ ଏକ ପୋଷ୍ଟରେ ଲେଖିଛନ୍ତି, 'ଶ୍ରୀ ରତନ ଟାଟା ଜୀଙ୍କର ସବୁଠାରୁ ଅନନ୍ୟ ଦିଗ ହେଉଛି ବଡ଼ ସ୍ୱପ୍ନ ଦେଖିବା ଏବଂ ଅନ୍ୟମାନଙ୍କୁ କିଛି ଦେବା ପାଇଁ ତାଙ୍କର ଆଗ୍ରହ । ଶିକ୍ଷା, ସ୍ୱାସ୍ଥ୍ୟ ସେବା, ପରିମଳ, ପଶୁ କଲ୍ୟାଣ ଭଳି ପ୍ରସଙ୍ଗରେ ସେ ଆଗରେ ଥିଲେ। ମୋର ଶ୍ରୀ ରତନ ଟାଟା ଜୀ ସହିତ ବହୁତ ସଭା ମନେ ଅଛି । ଯେତେବେଳେ ମୁଁ ଗୁଜୁରାଟର ମୁଖ୍ୟମନ୍ତ୍ରୀ ଥିଲି, ମୁଁ ତାଙ୍କୁ ବାରମ୍ବାର ଭେଟିଥିଲି । ଆମେ ବିଭିନ୍ନ ପ୍ରସଙ୍ଗରେ ମତ ବିନିମୟ କରୁଥିଲୁ । ମୁଁ ତାଙ୍କ ଭାବନାକୁ ବହୁତ ଉପଯୋଗୀ ମନେ କଲି । ଦିଲ୍ଲୀ ଆସିବା ପରେ ମଧ୍ୟ ଏହି ବୈଠକ ଗୁଡ଼ିକ ଜାରି ରହିଥିଲା । ତାଙ୍କ ଦେହାନ୍ତରେ ମୁଁ ଗଭୀର ଦୁଖିତ। ଏହି ଦୁଖରେ ତାଙ୍କ ପରିବାର, ବନ୍ଧୁ ଏବଂ ପ୍ରଶଂସକ ମାନଙ୍କୁ ମୋର ସମବେଦନା । ଓମ୍ ଶାନ୍ତି। '

ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ କହିଛନ୍ତି ଯେ ରତନ ଟାଟା ସରଳତା ଏବଂ ନମ୍ରତାର ପରିଚୟ ଥିଲେ । ଯେତେବେଳେ ବି ମୁଁ ରାଷ୍ଟ୍ରିୟ ଭବନରେ ଭୋଜି ସମୟରେ ତାଙ୍କୁ ନିମନ୍ତ୍ରଣ କରୁଥିଲି, ଏତେ ପ୍ରସିଦ୍ଧ ଶିଳ୍ପପତି ହୋଇଥିଲେ ମଧ୍ୟ ମୁଁ ତାଙ୍କର ନମ୍ରତା ଦେଖିଛି । ସେ କେବେ ବି ଆମ ଦେଶର ବଡ ଶିଳ୍ପପତି ମାନଙ୍କ ପରି ଦେଖାଯାଉ ନଥିଲେ । ସେ ଜଣେ ଦେଶପ୍ରେମୀ ଏବଂ ଜଣେ ସରଳ ମଣିଷ ପରି ଦେଖାଯାଉଥିଲେ । ମୁଁ ଦେଖିଛି ତାଙ୍କ ଚିନ୍ତାଧାରା କେତେ ଭଲ ଥିଲା । ଅଧିକାଂଶ ଶିଳ୍ପପତି ଅର୍ଥ ପାଇଁ ଶିଳ୍ପ ସ୍ଥାପନ କରନ୍ତି । କିନ୍ତୁ ସେ ସମସ୍ତଙ୍କୁ କହୁଥିଲେ ଯେ ଯଦି ଆପଣ ଏକ ଶିଳ୍ପ ପ୍ରତିଷ୍ଠା କରିବାକୁ ଚାହୁଁଛନ୍ତି ତେବେ ଏହା ସର୍ବଦା ଜାତୀୟ ସ୍ୱାର୍ଥରେ ରହିବା ଉଚିତ୍ ।