ନୂଆଦିଲ୍ଲୀ, ୨୧/୦୭: ବିଗତ ଦିନରେ ଦେଶର ବିଭିନ୍ନ ସ୍ଥାନରେ ଭୂକମ୍ପ ଅନୁଭୁତ ହୋଇଛି । ରବିବାର ରାତି ୯.୪୭ ରେ ଗୁଜରାଟର କଚ୍ଛରେ ଭୂମିକମ୍ପ ଝଟକା ଅନୁଭୂତ ହୋଇଛି । ରିକ୍ଟର ସ୍କେଲରେ ଭୂମିକମ୍ପର ତୀବ୍ରତା ୪.୦ ଥିଲା। ଏହାର କେନ୍ଦ୍ରସ୍ଥଳ ଖାଭଡାରୁ ୨୦ କିଲୋମିଟର ପୂର୍ବ ଦକ୍ଷିଣ-ପୂର୍ବରେ ଅବସ୍ଥିତ ଥିଲା। ଏହି ଭୂକମ୍ପରେ ଏପର୍ଯ୍ୟନ୍ତ କୌଣସି ଜୀବନ କିମ୍ବା ସମ୍ପତ୍ତି କ୍ଷତିର ଖବର ନାହିଁ । କିନ୍ତୁ ଏହା ଲୋକଙ୍କୁ ଆତଙ୍କିତ କରିଛି। କଚ୍ଛରେ ଗତ ତିନି ଦିନ ମଧ୍ୟରେ ତୃତୀୟ ଥର ପାଇଁ ଭୂକମ୍ପ ହୋଇଛି। ଲଗାତାର ଭୂମିକମ୍ପ ହେଉଥିବାରୁ ପ୍ରଶାସନ ଲୋକମାନଙ୍କୁ ସତର୍କ ରହିବାକୁ ପରାମର୍ଶ ଦେଇଛି।
ଏହା ପୂର୍ବରୁ ଜମ୍ମୁ ଏବଂ କାଶ୍ମୀରର କିସ୍ତବାଡରେ ମଧ୍ୟ ୨.୭ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିଲା। ଏହା ବ୍ୟତୀତ ଆଲାସ୍କା ଏବଂ ତାଜାକିସ୍ତାନରେ ମଧ୍ୟ ଭୂମିକମ୍ପ ହୋଇଥିଲା। ଏଗୁଡ଼ିକ ମଧ୍ୟରେ ସର୍ବାଧିକ ତୀବ୍ରତା ଥିବା ଭୂମିକମ୍ପ ଆଲାସ୍କାରେ ହୋଇଥିଲା । ଯାହା ରିକ୍ଟର ସ୍କେଲ୍ରେ ୬.୨ ତୀବ୍ରତା ବିଶିଷ୍ଟ ଥିଲା। ନ୍ୟାସନାଲ ସେଣ୍ଟର ଫର୍ ସିସମୋଲୋଜି କହିଛି ଯେ, ଏହି ଭୂମିକମ୍ପ ୨୧ ଜୁଲାଇ ଭୋର ୩ଟା ୫୮ ରେ ରେକର୍ଡ କରାଯାଇଥିଲା। ଏହି ଭୂମିକମ୍ପର ଗଭୀରତା ୪୮ କିଲୋମିଟର ବୋଲି କୁହାଯାଉଛି। ଆପଣଙ୍କୁ କହି ରଖୁଛୁ ଯେ, ପ୍ରାୟ ୪ ଦିନ ପୂର୍ବରୁ ମଧ୍ୟ ଆଲାସ୍କାରେ ଭୂମିକମ୍ପ ଝଟକା ଅନୁଭୂତ ହୋଇଥିଲା, ଯାହାର ତୀବ୍ରତା ର୍କଟର ସ୍କେଲ୍ରେ ୭.୩ ଥିଲା।
ରବିବାର ସକାଳେ ତାଜାକିସ୍ତାନରେ ମଧ୍ୟ ଲୋକମାନେ ଭୂମିକମ୍ପର ଝଟକାରେ ଭୟଭୀତ ହୋଇଯାଇଥିଲେ। ଭୋର ପ୍ରାୟ ୪ଟା ୪୩ ରେ ଭୂମିକମ୍ପ ହୋଇଥିଲା। ରିକ୍ଟର ସ୍କେଲରେ ଏହାର ତୀବ୍ରତା ୪.୬ ଥିଲା। ଏହା ପୂର୍ବରୁ ତାଜକିସ୍ତାନରେ ହୋଇଥିବା ଭୂମିକମ୍ପର ତୀବ୍ରତା ୪.୦ ଥିଲା।
