ରାଉରକେଲା, ୨୦/୦୬ : ଲଗାଣ ବର୍ଷାରେ ବେହାଲ୍ ରାଉରକେଲା ସହର। ଠାକୁର ଘର ଠାରୁ ଆରମ୍ଭ କରି ରୋଷେଇ ଘର, ଶୋଇବା ଘର, ଗାଧୁଆ ଘର ଯୁଆଡ଼େ ଦେଖିବ ସିଆଡ଼େ ପାଣି। ରହିବେ କେଉଁଠି ଖାଇବେ କ'ଣ ? ଏଭଳି ଦୃଶ୍ୟ ଦେଖିବାକୁ ମିଳିଛି ଇସ୍ପାତ ସହରର ବାଲୁଘାଟ ଅଞ୍ଚଳରେ। ଘରେ ଘରେ ପଶିଲା ବ୍ରାହ୍ମଣୀ ନଦୀ ଜଳ। କଲବଲ କରୁଛି ଲଗାଣ ବର୍ଷା ।
ଗୁରୁବାର ଆରଏସପି ପକ୍ଷରୁ ମନ୍ଦିରା ଡ୍ୟାମର ଚାରୋଟି ଗେଟ୍ ଖୋଲାଯିବା ପରେ ବ୍ରାହ୍ମଣୀ ନଦୀର ଜଳସ୍ତର ବୃଦ୍ଧି ପାଇଥିଲା। ବିଳମ୍ବିତ ରାତିରେ ଘରେ ପାଣି ପଶିଯାଇଥିଲା। ଲୋକମାନେ ଅତ୍ୟାବଶ୍ୟକ ସାମଗ୍ରୀ ସହ ସୁରକ୍ଷିତ ଜାଗାକୁ ପଳାଇଥିଲେ। ଆଜି ସକାଳେ ରାଉରକେଲା ମହାନଗର ନିଗମର ସହକାରୀ କମିଶନର ଅଜିତ ପଟ୍ଟନାୟକଙ୍କ ତତ୍ତ୍ଵାବଧାନରେ ପୀଡ଼ିତ ଲୋକଙ୍କୁ ଶୁଖିଲା ଖାଦ୍ୟ ଯୋଗାଇ ଦିଆଯାଇଛି। ମଧ୍ୟାହ୍ନ ଏବଂ ରାତିରେ ପୀଡ଼ିତଙ୍କୁ ଖାଦ୍ୟ ଯୋଗାଇ ଦିଆଯିବ ବୋଲି ଅଜିତ ପଟ୍ଟନାୟକ କହିଛନ୍ତି। ତେବେ ଘରେ ଘରେ ପାଣି ପଶିଥିବାରୁ କାଳେ ଜନ୍ତୁ ପଶିଯିବେ ସେ ଭୟରେ ଲୋକେ ରାତି ଅନିଦ୍ରା ରହୁଛନ୍ତି।
