ନୂଆଦିଲ୍ଲୀ: ବିରୋଧୀ ଦଳଗୁଡ଼ିକ ସୋମବାର ନିର୍ବାଚନ କମିଶନଙ୍କ ସାମ୍ବାଦିକ ସମ୍ମିଳନୀକୁ ସମାଲୋଚନା କରି ଏକ ମିଳିତ ବିବୃତ୍ତି ଜାରି କରିଛନ୍ତି । କଂଗ୍ରେସ, ସମାଜବାଦୀ ପାର୍ଟି, ଟିଏମସି, ଶିବସେନା (ୟୁବିଟି), ଡିଏମକେ, ଏନସିପି (ଏସସିପି), ଆରଜେଡି, ଆପ, ଜେଏମଏମ, ସିପିଆଇ, ସିପିଆଇ(ଏମ), ସିପିଆଇ(ଏମଏଲ) ସମେତ ଅନ୍ୟ ଦଳଗୁଡ଼ିକ ଦାବି କରିଛନ୍ତି ଯେ, କମିଶନ ଏହାର ସାମ୍ବିଧାନିକ କର୍ତ୍ତବ୍ୟ ପାଳନ କରିବାରେ ସମ୍ପୂର୍ଣ୍ଣ ବିଫଳ ହୋଇଛି। ବିବୃତ୍ତିରେ କୁହାଯାଇଛି ଯେ, ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର ରବିବାର ସାମ୍ବାଦିକ ସମ୍ମିଳନୀରେ କଠିନ ପ୍ରଶ୍ନର ଉତ୍ତର ଦେବାକୁ ମନା କରିଦେଇଛନ୍ତି ।
ବିରୋଧୀ ଦଳଗୁଡ଼ିକ ଅଭିଯୋଗ କରିଛନ୍ତି ଯେ, ମହାଦେବପୁରାରେ ଭୋଟର ଜାଲିଆତି ଅଭିଯୋଗର ତଦନ୍ତ କିମ୍ବା କୌଣସି କାର୍ଯ୍ୟାନୁଷ୍ଠାନ କମିଶନ ନେଇ ନାହାନ୍ତି । କମିଶନ ଶାସକ ଦଳକୁ ଚ୍ୟାଲେଞ୍ଜ କରୁଥିବା ଲୋକଙ୍କୁ ଭୟଭୀତ କରିବାକୁ ଚେଷ୍ଟା କରୁଛନ୍ତି । ଯାହା ଏକ ଗମ୍ଭୀର ଚିନ୍ତାର ବିଷୟ। ବିରୋଧୀ ଦଳ ଦାବି କରିଛନ୍ତି ଯେ, ନିର୍ବାଚନ କମିଶନ ଏକ ନିରପେକ୍ଷ ଏବଂ ମୁକ୍ତ ନିର୍ବାଚନ ବ୍ୟବସ୍ଥା ସୁନିଶ୍ଚିତ କରିବାରେ ଅସମର୍ଥ ।
ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ସଂସଦ ପରିସରରେ ଦାବି କରିଛନ୍ତି ଯେ, ସେ ଉତ୍ତର ପ୍ରଦେଶରେ ୨୦୨୨ ବିଧାନସଭା ନିର୍ବାଚନରେ ଭୋଟର ତାଲିକାରୁ ନାମ ବାଦ ଦେବା ଏବଂ ଅନିୟମିତତା ବିରୋଧରେ ନିର୍ବାଚନ କମିଶନଙ୍କ ନିକଟରେ ୧୮,୦୦୦ ଶପଥପତ୍ର ଦାଖଲ କରିଥିଲେ । ଯଦି ଏହି ଶପଥପତ୍ର ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାନଯାଏ, ତେବେ କମିଶନଙ୍କ ଉପରେ କିଏ ବିଶ୍ୱାସ କରିବ ବୋଲି ସେ ପ୍ରଶ୍ନ କରିଛନ୍ତି । ଉପନିର୍ବାଚନରେ ଏହା ଏକ ଛୋଟ ଚୋରି ନଥିଲା; ଏହା ଏକ ବଡ଼ ଡକାୟତି ଥିଲା ବୋଲି ମଧ୍ୟ ସେ ଅଭିଯୋଗ କରିଛନ୍ତି ।
ଅଖିଳେଶ ଯାଦବଙ୍କ ଅନୁଯାୟୀ, ଆମାପୁର, ବକ୍ସି କା ତାଲାବ, ଜୌନପୁର ସଦର ଏବଂ କୁର୍ସି ଭଳି ନିର୍ବାଚନମଣ୍ଡଳୀରେ ଭୋଟର ତାଲିକାରେ ଅନିୟମିତତା ହୋଇଥିଲା । କିଛି ସମ୍ପ୍ରଦାୟଙ୍କୁ ଟାର୍ଗେଟ କରି ଏହି ଅନିୟମିତତା କରାଯାଇଥିଲା । ମୌର୍ଯ୍ୟ, ପାଲ, ଭାଗେଲ ଏବଂ ରାଠୋର ଭଳି ସମ୍ପ୍ରଦାୟର ଲୋକମାନଙ୍କ ନାମ ଭୋଟର ତାଲିକାକୁ କାଟି ଦିଆଯାଇଥିଲା । ଫଳରେ ଏସପିର ରାଜନୈତିକି ପ୍ରଭାବ କମଜୋର ହୋଇଥିଲା । ଏଥିପାଇଁ ଆମେ କିଛି ଆସନରେ କମ୍ ବ୍ୟବଧାନରେ ହାରିଗଲୁ ।
