କୋଲକାତା,୨୦/୦୧: ଆରଜି କର ଦୁଷ୍କର୍ମ ଏବଂ ହତ୍ୟା ମାମଲାରେ ଦୋଷୀ ସାବ୍ୟସ୍ତ ସଞ୍ଜୟ ରାୟକୁ ଆଜୀବନ କାରାଦଣ୍ଡ ଦିଆଯାଇଛି, କିନ୍ତୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ଯେ ସେ କୋର୍ଟର ନିଷ୍ପତ୍ତିରେ ସନ୍ତୁଷ୍ଟ ନୁହଁନ୍ତି। ସେ କହିଛନ୍ତି, “ଆମେ ସମସ୍ତେ ମୃତ୍ୟୁଦଣ୍ଡ ଦାବି କରିଥିଲୁ, କିନ୍ତୁ କୋର୍ଟ ଆଜୀବନ କାରାଦଣ୍ଡ ଦେଲେ, ମୁଁ କୋର୍ଟଙ୍କ ନିଷ୍ପତ୍ତିରେ ସନ୍ତୁଷ୍ଟ ନୁହେଁ।” ମୁଖ୍ୟମନ୍ତ୍ରୀ ମମତା ବାନାର୍ଜୀ ନିଜର ଅସନ୍ତୋଷ ପ୍ରକାଶ କରି କହିଥିଲେ, “ଆମେ ଆରମ୍ଭରୁ ମୃତ୍ୟୁଦଣ୍ଡ ଦାବି କରିଆସୁଛୁ, କିନ୍ତୁ କୋର୍ଟ ଆଜୀବନ କାରାଦଣ୍ଡ ଦେଇଛନ୍ତି। ଯଦି ମାମଲାଟି ସିବିଆଇକୁ ହସ୍ତାନ୍ତର କରାଯାଇ ନଥାନ୍ତା ଏବଂ ଆମ ହାତରେ ଥାଆନ୍ତା, ତେବେ ବହୁତ ପୂର୍ବରୁ ମୃତ୍ୟୁଦଣ୍ଡ ଦିଆଯାଇଥାଆନ୍ତା। ମୁଁ ଏହି ନିଷ୍ପତ୍ତିରେ ସନ୍ତୁଷ୍ଟ ନୁହେଁ।”
ବିଜେପି ମଧ୍ୟ ଅସନ୍ତୁଷ୍ଟ:
କେବଳ ଏତିକି ନୁହେଁ, ଭାରତୀୟ ଜନତା ପାର୍ଟି ନେତା ଏବଂ କେନ୍ଦ୍ରମନ୍ତ୍ରୀ ସୁକାନ୍ତ ମଜୁମଦାର କହିଛନ୍ତି, “ଆମେ ମୃତ୍ୟୁଦଣ୍ଡ ଚାହୁଁଥିଲୁ। ତାହା ଘଟିଲା ନାହିଁ। ପୀଡ଼ିତାଙ୍କ ପରିବାର ଟଙ୍କା ଚାହାଁନ୍ତି ନାହିଁ। ବଙ୍ଗଳାର ଲୋକମାନେ ଭାବୁନାହାଁନ୍ତି ଯେ ଏଥିରେ କେବଳ ଜଣେ ବ୍ୟକ୍ତି ସମ୍ପୃକ୍ତ ଥିଲେ, ଏହାର ତଦନ୍ତ ହେବା ଉଚିତ। କୋର୍ଟ କହିବା ଉଚିତ ଥିଲା ଯେ ସଞ୍ଜୟ ଯେଉଁ ଲୋକଙ୍କ ନାଁ ନେଇଛନ୍ତି ସେମାନଙ୍କୁ ମଧ୍ୟ ତଦନ୍ତ ପରିସରଭୁକ୍ତ କରାଯିବା ଉଚିତ।'
କୋର୍ଟଙ୍କ ନିଷ୍ପତ୍ତି ବିରୁଦ୍ଧରେ ପ୍ରଦର୍ଶନ:
ଏହାରି ଭିତରେ କୋର୍ଟଙ୍କ ନିଷ୍ପତ୍ତି ବିରୋଧରେ ପଶ୍ଚିମବଙ୍ଗ ଜୁନିଅର ଡାକ୍ତର ସଂଘ, ଜଏଣ୍ଟ ଫୋରମ୍ ଅଫ୍ ଡାକ୍ତରସ୍ ଏବଂ ଅଭୟା ପ୍ରତିବାଦକାରୀମାନେ ସିଆଲଦା କୋର୍ଟ ବାହାରେ ଏକ ପ୍ରତିବାଦ କରିଥିଲେ। କୋଲକାତାର ସିଆଲଦା ସେସନ୍ସ କୋର୍ଟ ଶେଷରେ ସୋମବାର (୨୦ ଜାନୁଆରୀ, ୨୦୨୫) ଏହି ମାମଲାରେ ଅଭିଯୁକ୍ତକୁ ଦଣ୍ଡାଦେଶ ଶୁଣାଇଲେ। କୋର୍ଟ ଅଭିଯୁକ୍ତ ସଞ୍ଜୟ ରାୟକୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ତଥାପି, ସଞ୍ଜୟ ରାୟ କହୁଛି ଯେ ସେ କିଛି ଭୁଲ କରିନାହିଁ। କୋର୍ଟରେ, ଅଭିଯୁକ୍ତ ଏକ ଅଜବ ଯୁକ୍ତି ବାଢ଼ିଛି ଏବଂ କହିଛି ଯେ, ସେ କିଛି ଭୁଲ କରିନାହିଁ। ଯେହେତୁ ସେ ରୁଦ୍ରାକ୍ଷ ମାଳା ପିନ୍ଧୁଛି, ଯଦି ତା ଦ୍ବାରା କୌଣସି ଭୁଲ ହୋଇଥାନ୍ତା, ତେବେ ଘଟଣା ସମୟରେ ହିଁ ମାଳା ଭାଙ୍ଗି ଯାଇଥାନ୍ତା।'
