ନୂଆଦିଲ୍ଲୀ,୨/୬ : ପଶ୍ଚିମବଙ୍ଗରେ ଟିଏମସିର ବିଭାଜନକୁ ନେଇ ଟିଏମସିର ବହିଷ୍କୃତ ନେତା ରିଜୁ ଦତ୍ତା ଏକ ବଡ଼ ଦାବି କରିଛନ୍ତି । ସେ କହିଛନ୍ତି ଯେ, ୫୦ଜଣ ଟିଏମସି ବିଧାୟକ ଏକ ବୈଠକ କରିଥିଲେ ଏବଂ ନିର୍ବାଚନ ଚିହ୍ନ ଦଖଲ କରିବାକୁ ଚାହୁଁଛନ୍ତି ।
ରିଜୁ ଦତ୍ତା କହିଛନ୍ତି ଯେ, ଦୁଇ ଜଣ ଟିଏମସି ବିଧାୟକ ରୀତବ୍ରତା ବାନାର୍ଜୀ ଏବଂ ସନ୍ଦିପନ ସାହା ବିଧାନସଭା ବାଚସ୍ପତିଙ୍କୁ ଏକ ଚିଠି ଲେଖି ଦାବି କରିଛନ୍ତି ଯେ ସେମାନଙ୍କର ଦସ୍ତଖତ ଜାଲ୍ ହୋଇଛି । ଏହା ଶୁଣି ତୃଣମୂଳ କଂଗ୍ରେସ ଦୁଇ ବିଧାୟକଙ୍କୁ ବହିଷ୍କାର କରିଛି । ସେ ଦାବି କରିଛନ୍ତି, "ମୁଁ ବହୁ ବର୍ଷ ଧରି ତୃଣମୂଳ କଂଗ୍ରେସରେ କାମ କରିଛି, ତେଣୁ ମୋତେ ସୂଚନା ଦିଆଯାଇଥିଲା ଏବଂ କୁନାଲ ଘୋଷ ମଧ୍ୟ ପ୍ରେସକୁ ରିପୋର୍ଟ କରିଛନ୍ତି ଯେ ରୀତବ୍ରତା ବାନାର୍ଜୀଙ୍କ ନେତୃତ୍ୱରେ ପ୍ରାୟ ୫୦ଜଣ ଟିଏମସି ବିଧାୟକ ଏକ ହୋଟେଲରେ ଭେଟିଥିଲେ । ସେମାନେ ଫୋନ୍ରେ ମଧ୍ୟ କଥା ହୋଇଥିଲେ ଏବଂ ସନ୍ଧ୍ୟାରେ ଏମଏଲଏ ହଷ୍ଟେଲରେ ଅନେକ ବିଧାୟକଙ୍କ ସହ ବୈଠକ କରିଥିଲେ। ଆଜି ଅପରାହ୍ନ ପ୍ରାୟ ୨ଟାରେ ସେମାନେ ଏକତ୍ରିତ ହୋଇ ବାଚସ୍ପତିଙ୍କ ସହ ସାକ୍ଷାତ କରିବେ ଏବଂ ତିନୋଟି ମୁଖ୍ୟ ପ୍ରସଙ୍ଗ ଉଠାଇବେ।"
ଟିଏମସିର ବହିସ୍କୃତ ମୁଖପାତ୍ର କହିଛନ୍ତି, "ପ୍ରଥମେ, ଆମର ଦୁଇ-ତୃତୀୟାଂଶ ବହୁମତ ଅଛି । ପ୍ରାୟ ୫୦ଜଣ ବିଧାୟକ ଆମ ସହ ଅଛନ୍ତି । ଆମେ ପ୍ରକୃତ ତୃଣମୂଳ କଂଗ୍ରେସ ଅଟୁ । ଦ୍ୱିତୀୟତଃ, ଯେହେତୁ ଆମେ ପ୍ରକୃତ ତୃଣମୂଳ କଂଗ୍ରେସ ଏଥିଲାଗି ବିରୋଧୀ ଦଳ ନେତା ରୀତବ୍ରତା ବାନାର୍ଜୀ ହେବେ ଶୋଭନଦେବ ଚଟ୍ଟେପାଧ୍ୟାୟ ନୁହେଁ । ତୃତୀୟତଃ, ଆମର ଦୁଇ-ତୃତୀୟାଂଶ ବହୁମତ ଅଛି, ତେଣୁ ଏହି ଚିହ୍ନ ଆମର ହେବା ଉଚିତ । ରିଜୁ ଦତ୍ତା କହିଛନ୍ତି, "ମୁଁ ଦୁଇଟି ଗୁରୁତ୍ୱପୂର୍ଣ୍ଣ କଥା କହିବାକୁ ଚାହୁଁଛି । ପ୍ରଥମତଃ ଅଭିଷେକ ବାନାର୍ଜୀ ଦାୟିତ୍ୱ ନେବା ଉଚିତ । ଅଭିଷେକ ବାନାର୍ଜୀ ଯେଉଁ ଲୋକମାନଙ୍କୁ ହାତ ଧରି ଏହି ଦଳକୁ ଆଣିଥିଲେ ସେମାନେ ଦଳ ସହିତ ବିଶ୍ୱାସଘାତକତା କରିଛନ୍ତି। ତୃଣମୂଳ କଂଗ୍ରେସ ନେତା ମମତା ବାନାର୍ଜୀଙ୍କୁ ମଧ୍ୟ ଦାୟିତ୍ୱ ନେବାକୁ ପଡିବ । ମୁଁ ୮ଏବଂ ୯ତାରିଖରେ ଯାହା କହିଥିଲି, ସେମାନେ ଆଜି ସମାନ କଥା କହୁଛନ୍ତି । ସେମାନେ ଆଇ-ପାକ୍ ଉପରେ ନାରାଜ ଅଛନ୍ତି । ସେମାନେ ଅଭିଷେକ ବାନାର୍ଜୀଙ୍କ ଉପରେ ରାଗିଛନ୍ତି।"
ସୋମବାର ମମତା ବାନାର୍ଜୀ ଦୁଇ ବିଧାୟକ ରୀତବ୍ରତା ବାନାର୍ଜୀ ଏବଂ ସନ୍ଦୀପନଙ୍କୁ ବହିଷ୍କାର କରିବାରୁ ବଙ୍ଗଳାରେ ଟିଏମସି ଭିତରେ ବିଭାଜନ ହେବାର ଖବର ଜୋର ଧରିଛି । ଗତକାଲି ୬ ଜଣ ବିଧାୟକ ଏକ ହୋଟେଲରେ ଭେଟିଥିଲେ, ଯେଉଁଠାରେ ଦୁଇ ଜଣ ବିଦ୍ରୋହୀ ବିଧାୟକ ମଧ୍ୟ ଉପସ୍ଥିତ ଥିଲେ। ବିଦ୍ରୋହୀ ବିଧାୟକମାନେ ରୀତବ୍ରତା ବାନାର୍ଜୀଙ୍କୁ ବିଧାନସଭାରେ ବିରୋଧୀ ଦଳ ନେତା କରିବାକୁ ଚାହୁଁଛନ୍ତି, ଯେତେବେଳେ ମମତା ବାନାର୍ଜୀ ତାଙ୍କର ଘନିଷ୍ଠ ସହଯୋଗୀ ଶୋଭନଦେବ ଚଟ୍ଟୋପାଧ୍ୟାୟଙ୍କୁ ଏଲଓପି ଭାବରେ ନିଯୁକ୍ତ କରିଛନ୍ତି।
