ନୂଆଜିଲ୍ଲୀ: ଇଜିପ୍ଟରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି । ଇଜିପ୍ଟର ଉତ୍ତର-ପୂର୍ବ ଅଞ୍ଚଳରେ ଏକ ବିଶ୍ୱବିଦ୍ୟାଳୟର ଛାତ୍ର ମାନଙ୍କୁ ନେଇ ଯାଉଥିବା ଏକ ବସ୍ ଦୁର୍ଘଟଣାଗ୍ରସ୍ତ ହୋଇଛି। ଏହି ଦୁର୍ଘଟଣାରେ ୧୨ ଜଣ ଛାତ୍ରଙ୍କର ମୃତ୍ୟୁ ହୋଇଛି। ଏହା ବ୍ୟତୀତ ୩୩ ଜଣ ଗୁରୁତର ଆହତ ହୋଇଛନ୍ତି। ଇଜିପ୍ଟ ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ, ଏହି ଘଟଣା ଏନ ସୋଖନା ରାଜପଥରେ ଘଟିଛି।
ସ୍ବେଜ୍ ସ୍ଥିତ ଗଲାଲା ବିଶ୍ବବିଦ୍ୟାଳୟର ଛାତ୍ର ମାନେ ଏହି ବସରେ ଯାତ୍ରା କରୁଥିଲେ, ଯାହା କି ଏନ ସୋଖନା ରାଜପଥ ଦେଇ ଯାତ୍ରା କରୁଥିଲା । ଏହି ବସ୍ ଦୁର୍ଘଟଣାର ସମ୍ମୁଖୀନ ହୋଇଥିଲା। ସ୍ୱାସ୍ଥ୍ୟ ମନ୍ତ୍ରଣାଳୟ ଦୁର୍ଘଟଣାର କାରଣ ପ୍ରକାଶ କରିନାହିଁ। ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ସୃଷ୍ଟି ହୋଇଥିଲା। ଦୁର୍ଘଟଣା ସମ୍ପର୍କରେ ତୁରନ୍ତ ପୋଲିସ ବିଭାଗକୁ ସୂଚନା ଦିଆଯାଇଥିଲା।
ସରକାରୀ ବିବୃତ୍ତିରେ କୁହାଯାଇଛି ଯେ ଘଟଣାସ୍ଥଳରେ ୨୮ ଟି ଆମ୍ବୁଲାନ୍ସ ପହଞ୍ଚି ଉଦ୍ଧାରକାର୍ଯ୍ୟ ଆରମ୍ଭ କରିଥିଲା । ଆହତ ମାନଙ୍କୁ ସୁଏଜ ମେଡିକାଲ କମ୍ପ୍ଲେକ୍ସକୁ ନିଆଯାଇଥିଲା। ସେଠାରେ ସେମାନେ ଚିକିତ୍ସିତ ହେଉଛନ୍ତି ।
