ଖଜୁରୀପଡା,୧୪/୧୧: ଖଜୁରୀପଡା ଥାନା ଆର ନୂଆଗାଁ ପଞ୍ଚାୟତ ଅନ୍ତର୍ଗତ କଳିଙ୍ଗ ଆଦର୍ଶ ଆବାସିକ ବିଦ୍ୟାଳୟରେ ବୁଧବାର ଜଣେ ଦଶମ ଶ୍ରେଣୀ ଛାତ୍ର ଆତ୍ମହତ୍ୟା କରିବା ଘଟଣାର ପ୍ରତିବାଦ ହୋଇଛି । ଗୁରୁବାର କୁଇ ସମାଜ ଯୁବ ପରିଷଦ ପକ୍ଷରୁ ରାସ୍ତାରୋକ କରାଯାଇଛି । ସମାଜ କର୍ମକର୍ତ୍ତା ଖଜୁରୀପଡା-ଲାଇନପଡା ରାସ୍ତା ଅବରୋଧ କରିବା ଫଳରେ ଏହି ରାସ୍ତା ଦେଇ ଯାତାୟତ ସମ୍ପୂର୍ଣ୍ଣ ବ୍ୟାହତ ହୋଇଛି । ଏହି ଘଟଣାରେ ମୃତକଙ୍କ ପରିବାରକୁ ୨୦ ଲକ୍ଷ ଟଙ୍କାର କ୍ଷତିପୂରଣ ସହିତ ପରିବାରର ଜଣକୁ ଚାକିରୀ ଦେବା ପାଇଁ ଦାବି କରିଛନ୍ତି ଆନ୍ଦୋଳନକାରୀ । ଏଥି ସହିତ ଏହି ଘଟଣାର ସିବିଆଇ ତଦନ୍ତ ଏବଂ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରାଯାଇଛି।
ସୂଚନାଯୋଗ୍ୟ, ବୁଧବାର କଳିଙ୍ଗ ଆଦର୍ଶ ଆବାସିକ ବିଦ୍ୟାଳୟର ଦଶମ ଶ୍ରେଣୀରେ ପଢ଼ୁଥିବା ଆନନ୍ଦେଶ୍ବର ମଲ୍ଲିକଙ୍କ ଝୁଲନ୍ତା ମୃତଦେହ ଶୌଚାଳୟ ଭିତରୁ ଉଦ୍ଧାର ହୋଇଥିଲା । ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଥିବା ବେଳେ ମୃତକଙ୍କ ଭାଇ ଖଜୁରୀପଡା ଥାନାରେ ଏତଲା ଦେଇ ଆନନ୍ଦେଶ୍ବରଙ୍କୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି ।
