ନୂଆଦିଲ୍ଲୀ, ୨୯/୧୧: ଆସନ୍ତା ୩୦ ତାରିଖରୁ ଭାରତ ଓ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଏକାଦଶ ମଧ୍ୟରେ ଏକ ଦିବାରାତ୍ର ଅଭ୍ୟାସ ମ୍ୟାଚ୍ ଆରମ୍ଭ ହେବ । ଏହାପୂର୍ବରୁ ଭାରତୀୟ ଦଳ କାନବେରାରେ ପହଞ୍ଚି ସାରିଛି । ରୋହିତ ଶର୍ମାଙ୍କ ନେତୃତ୍ୱରେ ଭାରତୀୟ ଦଳ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆଣ୍ଟୋନୀ ଆଲବାନସେଙ୍କୁ ଭେଟିଥିଲା । ପରେ ରୋହିତ ଅଷ୍ଟ୍ରେଲିଆ ସଂସଦରେ ନିଜର ଅଭିଭାଷଣ ରଖିଥିଲେ ।
ସେ କହିଥିଲେ, ‘ଯଦି ଆମେ ପଛକୁ ଦେଖିବା ଭାରତ ଓ ଅଷ୍ଟ୍ରେଲିଆ ମଧ୍ୟରେ କ୍ରୀଡ଼ା ଓ ବାଣିଜ୍ୟ କ୍ଷେତ୍ରରେ ଦୀର୍ଘ ବର୍ଷ ଧରି ସୁସଂପର୍କ ରହି ଆସିଛି । ଆମେ ଏଠାକୁ ଆସି ଖେଳିବାକୁ ଭଲ ପାଉ ଏବଂ ଏଠାକାର ବିଭିନ୍ନ ସଂସ୍କୃତିକୁ ଉପଭୋଗ କରୁ । ସବୁବେଳେ ଅଷ୍ଟ୍ରେଲିଆ ଆସି କ୍ରିକେଟ୍ ଖେଳିବା ଆମ ପାଇଁ ଆହ୍ୱାନପୂର୍ଣ୍ଣ ରହିଥାଏ ।’
ବର୍ଡର-ଗାଭାସ୍କର ଟ୍ରଫିର ପ୍ରଥମ ଟେଷ୍ଟରେ ଭାରତ ଚମତ୍କାର ପ୍ରଦର୍ଶନ କରି ଅଷ୍ଟ୍ରେଲିଆ ମାଟିରେ ୨୯୫ ରନ୍ର ବିଶାଳ ବିଜୟ ହାସଲ କରିଥିଲା । ଅଭ୍ୟାସ ମ୍ୟାଚ୍ ଶେଷ ହେବା ପରେ ଡିସେମ୍ବର ୬ ତାରିଖରୁ ଆଡିଲେଡରେ ଦ୍ୱିତୀୟ ଟେଷ୍ଟ ଖେଳାଯିବ । ଏଥର ସିରିଜରେ ମୋଟ୍ ୫ଟି ମ୍ୟାଚ୍ ରହିଛି ।
