ନୂଆଦିଲ୍ଲୀ: ରୁଷ ୟୁକ୍ରେନର ଓଡେସା ସହର ସମେତ ୫ଟି ଅଞ୍ଚଳରେ ଏକ ବଡ଼ ଡ୍ରୋନ୍ ଆକ୍ରମଣ କରିଛି। ଗୁରୁବାର ଭୋର ସମୟରେ ଏହି ଆକ୍ରମଣ କରାଯାଇଥିଲା। ରୁଷର ଏହି ଡ୍ରୋନ୍ ଆକ୍ରମଣରେ ୨ ଜଣଙ୍କର ମୃତ୍ୟୁ ହୋଇଛି ଏବଂ ୧୫ ଜଣ ଆହତ ହୋଇଛନ୍ତି । ୟୁକ୍ରେନର ଜରୁରୀକାଳୀନ ସେବା କହିଛି ଯେ କୃଷ୍ଣସାଗର ଉପକୂଳରେ ଥିବା ୟୁକ୍ରେନୀୟ ବନ୍ଦର ସହରକୁ ରୁଷ ଜାଣିଶୁଣି ଟାର୍ଗେଟ କରିଛି। ରୁଷ ସେନା ପ୍ରାୟ ୧୭୦ଟି ଡ୍ରୋନ୍ ସାହାଯ୍ୟରେ ଏକକାଳୀନ ଆକ୍ରମଣ କରିଥିଲା ବୋଲି ୟୁକ୍ରେନ କହିଛି ।
ଓଡେସାର ଗଭର୍ଣ୍ଣର ଓଲେ କିପର କହିଛନ୍ତି ଯେ, ଡ୍ରୋନ୍ ସାହାଯ୍ୟରେ ୟୁକ୍ରେନରେ ଆପାର୍ଟମେଣ୍ଟ କୋଠା, ଘରୋଇ ଘର,ଏକ ସୁପରମାର୍କେଟ୍ ଏବଂ ଏକ ସ୍କୁଲରେ ଘାତକ ବୋମା ବିସ୍ଫୋରଣ ହୋଇଛି। ଏହି ସମୟରେ୨ ଜଣଙ୍କର ମୃତ୍ୟୁ ହୋଇଛି। ସୋସିଆଲ ମିଡିଆ ପ୍ଲାଟଫର୍ମ ଟେଲିଗ୍ରାମରେ କିପରଙ୍କ ଦ୍ୱାରା ସେୟାର କରାଯାଇଥିବା ଭିଡିଓରେ ଆକ୍ରମଣରେ ଏକ ବହୁତଳ କୋଠାର କ୍ଷତି, ଏକ ଭୁଶୁଡ଼ି ପଡ଼ିଥିବା ଦୋକାନ ଏବଂ ନିଆଁ ଲିଭା ପାଇଁ ସଂଘର୍ଷ କରୁଥିବା ଅଗ୍ନିଶମ କର୍ମଚାରୀ ମାନେ ଦେଖାଯାଇଛି। ମେୟର ଇହୋର ତେରେଖୋଭଙ୍କ ଅନୁଯାୟୀ, ୟୁକ୍ରେନର ଦ୍ୱିତୀୟ ବୃହତ୍ତମ ସହର ଖାରକିଭର ମଧ୍ୟଭାଗରେ ଥିବା ଏକ ପେଟ୍ରୋଲ ପମ୍ପକୁ ଡ୍ରୋନ୍ ଆକ୍ରମଣ ଦ୍ୱାରା ଟାର୍ଗେଟ କରାଯାଇଥିଲା, ଯାହା ଫଳରେ ଏଥିରେ ନିଆଁ ଲାଗିଯାଇଥିଲା।
ୟୁକ୍ରେନର ବାୟୁସେନା କହିଛି ଯେ ଗୁରୁବାର ରାତିରେ ହୋଇଥିବା ଆକ୍ରମଣରେ ରୁଷ ପାଞ୍ଚଟି ୟୁକ୍ରେନୀୟ ଅଞ୍ଚଳରେ ୧୭୦ଟି ବିସ୍ଫୋରକ ଡ୍ରୋନ୍ ଏବଂ ଅସ୍ତ୍ରଶସ୍ତ୍ର ବ୍ୟବହାର କରିଥିଲା। ସେଥିମଧ୍ୟରୁ ୭୪ଟି ଡ୍ରୋନକୁ ବିଫଳ କରି ଦିଆଯାଇଥିଲା। ରାତାରାତି ଆକ୍ରମଣ ସମୟରେ ଡ୍ରୋନ ବ୍ୟତୀତ, ରୁଷ ପାଞ୍ଚଟି ବାଲିଷ୍ଟିକ୍ କ୍ଷେପଣାସ୍ତ୍ର ମାଡ଼ କରିଥିଲା ବୋଲି ବାୟୁସେନା କହିଛି।
