ନୂଆଦିଲ୍ଲୀ: ବୁଧବାର ରାତିରେ ୟୁକ୍ରେନ ରାଷ୍ଟ୍ରପତି ଭ୍ଲୋଡିମିର ଜେଲେନସ୍କିଙ୍କ ହୋମଟାଉନରେ ଥିବା ଏକ ହୋଟେଲକୁ ଟାର୍ଗେଟ କରିଛି ଋଷିଆ। ଉକ୍ତ ଅଞ୍ଚଳରେ କ୍ଷେପଣାସ୍ତ୍ର ଦ୍ୱାରା ଆକ୍ରମଣ କରାଯାଇଥିବା ବେଳେ ଏହି ଆକ୍ରମଣରେ ଅତି କମରେ ୪ ଜଣଙ୍କର ମୃତ୍ୟୁ ହୋଇଛି ବୋଲି ସୂଚନା ମିଳିଛି। ଋଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ବନ୍ଦ କରିବାକୁ ଉଦ୍ୟମ ଜାରି ରହିଥିବା ମଧ୍ୟରେ ଏହି ଆକ୍ରମଣ କରାଯାଇଛି।
ଏହି ଆକ୍ରମଣ ସମ୍ପର୍କରେ ୟୁକ୍ରେନ ରାଷ୍ଟ୍ରପତି ଜେଲେନସ୍କି କହିଛନ୍ତି ଯେ କେନ୍ଦ୍ରୀୟ ୟୁକ୍ରେନର କ୍ରିଭୀ ରିହରେ ଅବସ୍ଥିତ ହୋଟେଲ ଉପରେ ଋଷ କ୍ଷେପଣାସ୍ତ୍ର ମାଡ କରିଚି। ଏହି ଆକ୍ରମଣର କିଛି ସମୟ ପୂର୍ବରୁ ୟୁକ୍ରେନ, ଆମେରିକା ଏବଂ ବ୍ରିଟିଶ ନାଗରିକଙ୍କ ସମେତ ଏକ ମାନବିକ ସଂଗଠନର ସ୍ୱେଚ୍ଛାସେବୀମାନେ ଏହି ସହର ମଧ୍ୟକୁ ପ୍ରବେଶ କରିଥିଲେ। ତେବେ ଏହି ଦୁର୍ଘଟଣାରେ ଆହତ ହୋଇଥିବା ୩୧ ଜଣ ଆହତଙ୍କ ମଧ୍ୟରେ ଉକ୍ତ ବିଦେଶି ନାଗରିକମାନେ ଅଛନ୍ତି କି ନାହିଁ ସେ ସମ୍ପର୍କରେ ସେ କୌଣସି ସୂଚନା ଦେଇ ନାହାନ୍ତି।
ଏ ସମ୍ପର୍କରେ ୟୁକ୍ରେନ ବାୟୁସେନା କହିଛି ଯେ ଋଷ ରାତାରାତି ୟୁକ୍ରେନ ଉପରେ ୧୧୨ ଶାହିଦ ଏବଂ ଦୁଇଟି ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରିଛି। ଯେଉଁଥିପାଇଁ ଏହି ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଛି। ତେବେ ଏପର୍ଯ୍ୟନ୍ତ ଏହି ଆକ୍ରମଣ ସମ୍ପର୍କରେ ରୁଷ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ ପାଇନାହିଁ।
