ଇସ୍ତାନବୁଲ: ରୁଷିଆ ଓ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ, ଉଭୟ ଦେଶ ନିକଟରେ ଏକ ଯୁଦ୍ଧବନ୍ଦୀ ବିନିମୟ କାର୍ଯ୍ୟକ୍ରମ ଆରମ୍ଭ କରିଛନ୍ତି। ରୁଷିଆର ପ୍ରତିରକ୍ଷା ମନ୍ତ୍ରଣାଳୟ ସୋମବାର ଏନେଇ ଘୋଷଣା କରି କହିଛି ଯେ, ଏହି ବିନିମୟ ଜୁନ୍ ୨ ତାରିଖରେ ଇସ୍ତାନବୁଲରେ ହୋଇଥିବା ସିଧାସଳଖ ଆଲୋଚନାର ଫଳାଫଳ। ଏହି ଆଲୋଚନାରେ ଉଭୟ ପକ୍ଷ ନିଷ୍ପତ୍ତି ନେଇଥିଲେ ଯେ ଅତିକମରେ ୧୨୦୦ ଯୁଦ୍ଧବନ୍ଦୀଙ୍କୁ ଅଦଳବଦଳ କରାଯିବ। ଖାସ କରି ଯେଉଁମାନଙ୍କୁ ୨୫ ବର୍ଷରୁ କମ ବୟସ ହୋଇଥିବା କିମ୍ୱା ସେମାନେ ଗୁରୁତର ଭାବେ ଆହତ ହୋଇଥିବେ। ଏହା ସହିତ ଯୁଦ୍ଧରେ ନିହତ ହୋଇଥିବା ହଜାର ହଜାର ସୈନିକଙ୍କ ଶବ ମଧ୍ୟ ସେମାନଙ୍କ ନିଜ ଦେଶକୁ ଫେରାଇ ନିଆଯିବ ବୋଲି ଆଲୋଚନା ହଇଥିଲା।
ଏହି ବିନିମୟକୁ ଉଭୟ ଦେଶ ଏପର୍ଯ୍ୟନ୍ତର ସବୁଠାରୁ ବଡ଼ ବିନିମୟ ବୋଲି ଅଭିହିତ କରିଛନ୍ତି, ଯାହା ଧିରେଧିରେ ପର୍ଯ୍ୟାୟକ୍ରମେ ସମ୍ପନ୍ନ ହେବ। ରୁଷିଆ ଏନେଇ କହିଛି ଯେ, ୟୁକ୍ରେନ ପୂର୍ଣ୍ଣ ରୂପେ ଚୁକ୍ତି ପାଳନ ନକରୁଥିଲେ ମଧ୍ୟ ରୁଷିଆ ଏହି ବିନିମୟ ଏବଂ ଶବ ଫେରାଇବା ପ୍ରକ୍ରିୟାକୁ ସମ୍ମାନ ଦେବ। ୟୁକ୍ରେନର ବୈଦେଶିକ ମନ୍ତ୍ରଣାଳୟ ଏହାକୁ ଏକ ମାନବୀୟ ପଦକ୍ଷେପ ଭାବେ ଗ୍ରହଣ କରିଛି, କିନ୍ତୁ ସେମାନେ ମଧ୍ୟ ରୁଷିଆ ଉପରେ ପାଲଟା ଅଭିଯୋଗ ଆଣିଛନ୍ତି। ରୁଷିଆ ଉଭୟ ଦେସ ମଧ୍ୟରେ ହୋଇଥିବା ଚୁକ୍ତିର କିଛି ଶର୍ତକୁ ମାନୁନାହିଁ ବୋଲି ୟୁକ୍ରେନ ଅଭିଯୋଗ ଉଠାଇଛି।
ଚତୁର୍ଥ ବର୍ଷରେ ପହଞ୍ଚିଥିବା ଏହି ଯୁଦ୍ଧରେ ଉଭୟ ପକ୍ଷର ବିରଳ ସହମତି କ୍ରମେ ଏହି ବିନିମୟ ଏକ ଉଦାହରଣ ସୃଷ୍ଟି କରିଛି। ତେବେ, ଯୁଦ୍ଧବିରତି ଏବଂ ଶାନ୍ତି ଆଲୋଚନା ସମ୍ପର୍କରେ ଆଲୋଚନା ଏପର୍ଯ୍ୟନ୍ତ ସଫଳ ହୋଇପାରିନାହିଁ। ଏହି ବିନିମୟ ପ୍ରକ୍ରିୟା ଅନେକ ପରିବାରଙ୍କ ପାଇଁ ଆଶାର କିରଣ ଆଣିଛି। ଯେଉଁମାନେ ସେମାନଙ୍କ ପ୍ରିୟଜନଙ୍କୁ ଘରକୁ ଫେରାଇଆଣିବା ପାଇଁ ଅପେକ୍ଷା କରି ରହିଛନ୍ତି।
