ବୁର୍ଲା, ୨୦/୦୨: ସମ୍ବଲପୁର ବିଶ୍ୱବିଦ୍ୟାଳୟ ଲାଇବ୍ରେରୀ ସାଇନ୍ସ ବିଭାଗ ଶେଷବର୍ଷର ଜଣେ ଛାତ୍ରୀଙ୍କୁ ବୁଧବାର ହତ୍ୟା ଉଦ୍ୟମ ହୋଇଛି । ବିଶ୍ୱବିଦ୍ୟାଳୟରୁ ଓ ଅଟଳ ଛକକୁ ସଂଯୋଗ କରୁଥିବା ଭିଆଇପି ରାସ୍ତାର ମେଟାକାନି ମନ୍ଦିର ନିକଟ ନିଛାଟିଆ ସ୍ଥାନରୁ କ୍ଷତବିକ୍ଷତ ଅବସ୍ଥାରେ ତାଙ୍କୁ ଉଦ୍ଧାର କରାଯାଇଛି । ସଙ୍କଟାପନ୍ନ ଅବସ୍ଥାରେ ତାଙ୍କୁ ବୁର୍ଲା ଭିମ୍ସାରରେ ଭର୍ତ୍ତି କରାଯାଇଛି । ଅଧିକ ଗୁରୁତର ହେବାରୁ ଛାତ୍ରୀଙ୍କୁ ଚିକିତ୍ସା ପାଇଁ ଭୁବନେଶ୍ବରର ଘରୋଇ ହସ୍ପିଟାଲ ସ୍ଥାନାନ୍ତର କରାଯାଇଛି। ଛାତ୍ରୀଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଥିବା ପରିବାର ଲୋକଙ୍କ ସୂଚନା।
ପୁଲିସ୍ ସିସିଟିଭି ଫୁଟେଜ୍ ଆଧାରରେ ତନାଘନା ଆରମ୍ଭ କରିଛି । ଯୁବତୀଙ୍କ ଘର ଉପକୂଳବର୍ତ୍ତୀ ଜିଲ୍ଲାରେ । ତାଙ୍କ ବାପା ବୁର୍ଲା ପାୱାର ହାଉସ୍ରେ ଇଞ୍ଜିନିୟର ଅଛନ୍ତି । ସପରିବାର ବୁର୍ଲାସ୍ଥିତ ଭାରତୀ କ୍ଲବ ନିକଟରେ ରହୁଛନ୍ତି । ଅପରାହ୍ନ ପ୍ରାୟ ୫ଟାରେ ସମ୍ପୃକ୍ତା ଯୁବତୀ ଜଣକ ମେଟାକାନି ମନ୍ଦିରଠାରୁ କେଇ ମିଟର ଦୂରରେ ରକ୍ତାକ୍ତ ଅବସ୍ଥାରେ ପଡ଼ିଥିଲେ । ସ୍ଥାନୀୟ କେତେଜଣ ବ୍ୟକ୍ତି କ୍ଷତାକ୍ତ ଯୁବତୀଙ୍କୁ ଦେଖି ବୁର୍ଲା ଥାନାକୁ ସୂଚନା ଦେବା ପରେ ପୁଲିସ୍ ପହଞ୍ଚିଥିଲା । ତାଙ୍କୁ ଉଦ୍ଧାର କରି ବୁର୍ଲା ମେଡିକାଲରେ ଭର୍ତ୍ତି କରିଥିଲା । ଅକ୍ସିଜେନ ସପୋର୍ଟରେ ଥିବାରୁ ଯୁବତୀ ବୟାନ ରେକର୍ଡ ହୋଇପାରିନାହିଁ । ଯୁବତୀ ବ୍ୟବହାର କରୁଥିବା ମୋବାଇଲ୍ ମଧ୍ୟ ମିଳୁନାହିଁ । ସନ୍ଦିଗ୍ଧ ଯୁବକଙ୍କୁ ଧରିବା ଲାଗି ପୁଲିସ୍ ସିସିଟିଭି ଅଣ୍ଡାଳୁଛି ।
