ପାଟଣାଗଡ, ୨୩|୬( ଆପ୍ର) ; ବଲାଙ୍ଗୀର ଜିଲ୍ଲା ପାଟଣାଗଡ଼ ବ୍ଳକରେ ୮ ମାସ ରୁ ଉର୍ଦ୍ଧ୍ବ ହେବ ବିଭିନ୍ନ ପ୍ରକାର ଉନ୍ନତିମୂଳକ କାମ ଠପ୍ ହୋଇ ଯାଇଛି। ଏହାର ପ୍ରତିବାଦରେ ମଙ୍ଗଳବାର ସମିତି ସଭ୍ୟ, ସଭ୍ୟା ବିଡ଼ିଓ ଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିବେ ।
ପ୍ରକାଶ ଯେ ପାଟଣାଗଡ଼ ବ୍ଳକର ଜନସାଧାରଣଙ୍କ ସାମୁହିକ ଉନ୍ନତି ଓ ସ୍ବାର୍ଥ ପାଇଁ ପ୍ରଶାସନ ଓ ସରକାରଙ୍କ ଉଦାସୀନତା ମନୋଭାବ ଯୋଗୁଁ ବ୍ଳକ ଅଞ୍ଚଳରେ ରାସ୍ତାକାମ, ବନ୍ଦ ଓ କଟା ମାଟିର ଉନ୍ନତିକରଣ, ସ୍କୁଲ, ଅଙ୍ଗନବାଡି ଗୃହ ନିର୍ମାଣ ସମେତ ଅନ୍ୟାନ୍ୟ ବିକାଶ ମୂଲକ କାମ ୮ ମାସ ହେଲା ଠପ୍ ହୋଇ ରହିଛି। ଏହି ସମସ୍ୟାର ସମାଧାନ ପାଇଁ ଗତ ଫେବୃଆରୀ ୨୮ ରେ ଗୋଷ୍ଠୀ ଉନ୍ନୟନ ଅଧିକାରୀ ପାଟଣାଗଡ଼ ଙ୍କୁ ଲିଖିତ ଭାବରେ ଅବଗତ କରାଇଥିଲା। ଗୋଷ୍ଠୀ ଉନ୍ନୟନ ଅଧିକାରୀ ଚାପ ଗ୍ରସ୍ତ ଥିବା ଯୋଗୁଁ ଏଥିରେ କୌଣସି ସୁଫଳ ମିଳି ନଥିଲା। ଯାହାକୁ ନେଇ ଏପ୍ରିଲ୍ ୫ ତାରିଖରେ ଜିଲ୍ଲାପାଳ ଙ୍କ ଯୁଗ୍ମ ଜନଶୁଣାଣୀ ଶିବିର ରେ ପୁର୍ନବାର ସମିତି ସଭ୍ୟ ସଭ୍ୟା ମାନେ ଏହି ସମସ୍ୟାର ଆଶୁ ସମାଧାନ ପାଇଁ ଜିଲ୍ଲାପାଳଙ୍କୁ ଅବଗତ କରାଇଥିଲେ। ୭ ଦିନ ମଧ୍ୟରେ ଏହାର ସମାଧାନ କରାଯିବ ବୋଲି ଜିଲ୍ଲାପାଳ ସେମାନଙ୍କୁ ପ୍ରତିଶ୍ରୁତି ଦେଇଥିଲେ। ଏହା ପରେ ମଧ୍ୟ ଏହି ଏପର୍ଯ୍ୟନ୍ତ ଏହି ସବୁ ସମସ୍ୟା ସମାଧାନ ହୋଇ ପାରିଲା ନାହିଁ। ତେବେ ଜନସାଧାରଣଙ୍କ ସ୍ବାର୍ଥ ଦୃଷ୍ଟି ରୁ ମଙ୍ଗଳବାର ବ୍ଳକର ସମସ୍ତ ସମିତି ସଭ୍ୟ ସଭ୍ୟା ବିଡ଼ିଓ କାର୍ଯ୍ୟଳୟ ସମ୍ମୁଖ ରେ ଧାରଣାରେ ବସିବେ। ଏନେଇ ସେମାନେ ସୋମବାର ଜିଲ୍ଲାପାଳ ବଲାଙ୍ଗୀର, ଉପଜିଲ୍ଲାପାଳ, ବିଡ଼ିଓ ଏବଂ ଥାନା ଅଧିକାରୀ ଙ୍କୁ ଅବଗତ କରାଇଥିବା ଜଣାପଡିଛି। ଏହି ସମସ୍ୟାର ସମାଧାନ ନ ହେବା ପର୍ଯ୍ୟନ୍ତ ଧାରଣା ଜାରୀ ରଖିବ ବୋଲି ବ୍ଳକ ଉପାଧ୍ୟକ୍ଷା ଲକ୍ଷ୍ମୀ ମାଝୀ, ଫଟାମୁଣ୍ଡା ସମିତି ସଭ୍ୟ ଜୟନ୍ତ କୁମ୍ଭାର, ଏବଂ ତମିଆଁ ସମିତି ସଭ୍ୟ ଗୋବିନ୍ଦ ମେହେର ଗଣମାଧ୍ୟମକୁ ସୂଚନା ଦେଇଛନ୍ତି।
