ନବରଙ୍ଗପୁର,୨୬।୫(ଆପ୍ର): ସ୍ବାମୀଙ୍କ ଦୀର୍ଘାୟୁ କାମନା କରି ପାରମ୍ପରିକ ରୀତିନୀତିରେରେ ଆଜି ଘରେଘରେ ମହିଳାମାନେ ସାବିତ୍ରୀ ବ୍ରତ ପାଳନ କରିଛନ୍ତି। କିମ୍ବଦନ୍ତୀ କହେ, ସତୀସାବିତ୍ରୀ ନିଜ ସଭିତ୍ଵ ଓ ତପସ୍ୟା ବଳରେ ଯମରାଜଙ୍କ ପାଖରୁ ନିଜ ସ୍ୱାମୀଙ୍କୁ ଫେରାଇ ଆଣିବାରେ ସକ୍ଷମ ହୋଇଥିଲେ। ସେବେଠାରୁ ପ୍ରତିବର୍ଷ ସାବିତ୍ରୀ ବ୍ରତଙ୍କୁ ମହିଳାମାନେ ପାଳନ କରିଆସୁଛନ୍ତି।
ଆଜି ମହିଳାମାନେ ବଡି ଭୋରରୁ ଉଠି ସ୍ନାନ ସାରିବା ପରେ ନୂତନ ବସ୍ତ୍ର ପରିଧାନ କରିଥିଲେ। ଶିଳ ଓ ଶିଳପୁଆକୁ ହଳଦୀ ବୋଳି ରଖିଥିଲେ। ମୁକ୍ତା ମଞ୍ଜି, ଚିଲିପତ୍ର, ଆମ୍ବ ଡାଳ ଇତ୍ୟାଦିରେ ଏହାକୁ ସଜାଇଥିଲେ। ଶିଳକୁ ସାବିତ୍ରୀ ଓ ପୁଆକୁ ସତ୍ୟବାନ ଭାବେ ଠାକୁରଙ୍କ ପାଖରେ ରଖାଯାଇଥିଲା। ଖଜୁରୀ, ଆମ୍ବ, ପଣସ, ସପୁରୀ,ସେଓ, କଦଳୀ, ନଡିଆ, ଅଙ୍ଗୁର, କେନ୍ଦୁ, କୁସୁମଦେ ମକୋଳି ଓ ଜାମୁ କୋଳି ଆଦି ଭୋଗ ଲଗାଇ ଶ୍ରଦ୍ଧାର ସହ ପୂଜାର୍ଚ୍ଚନା କରିଥିଲେ। ଏହା ସହ ସୂର୍ଯ୍ୟ ଦେବତାଙ୍କ ନିକଟରେ ବାଢି ଦେଇଥିଲେ ଭକ୍ତିର ଅର୍ଘ୍ୟ।
ନିଷ୍ଠାର ସହ ମହିଳାମାନେ ଆଜି ଉପବାସରେ ରହି ଏହି ବ୍ରତ ପାଳନ କରିଛନ୍ତି। ଏହି ଅବସରରେ ସହରରେ ବିଭିନ୍ନ ମନ୍ଦିରରେ ଆଜି ମହିଳାଙ୍କ ପ୍ରବଳ ଭିଡ ଜମିଥିଲା। ହାତରେ ଫଳମୂଳ ନୂଆ ଶାଢୀ ଓ ଚୁଡି ଆଦି ଜିନିଷ ରଖି ମହିଳାମାନେ ଦେବଦେବୀଙ୍କ ନିକଟରେ ପୂଜାର୍ଚ୍ଚନା କରି ସ୍ବାମୀଙ୍କ ମଙ୍ଗଳ କାମନା କରି ଦୀପ ଜାଳିଥିଲେ।
