କଟକ,୧୬/୧୨: ସ୍କୁଲ୍ ଛାତ୍ରଛାତ୍ରୀଙ୍କ ବସ୍ତାନି ବୋଝ ହାଲୁକା ହେବା ପରିବର୍ତ୍ତେ ଓଜନ ବଢିଚାଲିଛି । ହାଇକୋର୍ଟଙ୍କ ନିର୍ଦ୍ଦେଶ ପରେ ଜାରି ହୋଇଥିବା ‘ବସ୍ତାନି କଟକଣା’କୁ ସ୍କୁଲ୍ କର୍ତ୍ତୃପକ୍ଷ ଏକରକମ ଭୁଲି ଗଲେଣି । ଏଣେ ବ୍ୟାଗ ବୋଝରେ ବଙ୍କା ଯାଉଛି ପିଲାଙ୍କ ପିଠି । ବିଶେଷ କରି କିଛି ଘରୋଇ ସ୍କୁଲ୍ରେ ବସ୍ତାନି ବୋଝ ଅତିରିକ୍ତ ହୋଇଗଲାଣି । ଏହାକୁ ଅଭିଭାବକମାନେ ଚିନ୍ତାରେ ପଡିଥିବା ବେଳେ ପ୍ରଶାସନ କିନ୍ତୁ ନିରବ । ବସ୍ତାନି ଓଜନ ଯାଞ୍ଚ୍ ପ୍ରତି ଜିଲ୍ଲାରେ ସ୍ୱତନ୍ତ୍ର ସ୍କ୍ୱାଡ୍ ରହିଥିବା ବେଳେ କଟକରେ ଏହି ସ୍କ୍ୱାଡ୍ ଏକରକମ ନିଷ୍କ୍ରିୟ ହୋଇରହିଛି । ଗତ ତିନିବର୍ଷ ଭିତରେ ଥରଟିଏ ବି ବସ୍ତାନି ଓଜନ ଯାଞ୍ଚ୍ କରାଯାଇନାହିଁ ।
ସ୍କୁଲ୍ ପିଲାଙ୍କ ବସ୍ତାନି ବୋଝ ଯେପରି ଅଧିକ ନହେବ ସେନେଇ ହାଇକୋର୍ଟଙ୍କ କଡ଼ା ନିର୍ଦ୍ଦେଶ ରହିଛି । ମାମଲା ଶୁଣାଣି ବେଳେ ସମସ୍ତ ସ୍କୁଲ୍ କର୍ତ୍ତୃପକ୍ଷ ଏନେଇ ସତର୍କ ହୋଇଯାଇଥିଲେ । କିନ୍ତୁ ଦିନ ବିତିବା ପରେ ଏବେ ପୁଣି ସେହି ପୁରୁଣା ଢାଞ୍ଚାରେ ପିଲାମାନଙ୍କ ଉପରେ ବହି ବୋଝ ନଦି ଦିଆଯାଉଛି । କଟକରେ ଏହି କଟକଣାକୁ ଏକରକମ ବେଖାତିର୍ କରାଯାଉଛି । ବିଶେଷ କରି ଘରୋଇ ସ୍କୁଲ୍ ଏଦିଗରେ ବ୍ୟାପକ ଅବହେଳା ପ୍ରଦର୍ଶନ କରୁଛନ୍ତି । ଅନ୍ୟପକ୍ଷରେ ଏ ଦିଗରେ କଠୋର ହୋଇ କାର୍ଯ୍ୟାନୁଷ୍ଠାନ ନେବା ପାଇଁ ସ୍କୁଲ୍ ଓ ଗଣଶିକ୍ଷା ବିଭାଗ ପକ୍ଷରୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଥିବା ସତ୍ତେ୍ୱ ପ୍ରଶାସନିକ ସ୍ତରରେ ଏ ନେଇ ତତ୍ପରତା ଆଦୌ ନାହିଁ କହିଲେ ଚଳେ ।
ନିୟମାନୁସାରେ, ଛାତ୍ରଛାତ୍ରୀଙ୍କ ଓଜନର ୧୦ ପ୍ରତିଶତ ଭିତରେ ବସ୍ତାନି ଓଜନ ରହିବା ଜରୁରୀ । ଜିଲ୍ଲା ଶିକ୍ଷା ଅଧିକାରୀ(ଡିଇଓ) କିମ୍ବା ଜିଲ୍ଲା ପ୍ରକଳ୍ପ ସଂଯୋଜକ (ଡିପିସି)ଙ୍କ ନେତୃତ୍ୱରେ ଏକ ସ୍କ୍ୱାଡ୍ ଗଠନ କରାଯାଇ ବିଭିନ୍ନ ଘରୋଇ ସ୍କୁଲ୍ରେ ଚଢଉ କରିବାକୁ ନିର୍ଦ୍ଦେଶ ଦିଆଯାଇଥିଲା । ଏହି ସ୍କ୍ୱାଡ୍ରେ ବିଇଓ, ପୁଲିସ୍ ଅଧିକାରୀ, ଅନ୍ୟ ବିଭାଗର ଅଧିକାରୀ ଏବଂ ଏନ୍ଜିଓଙ୍କୁ ସାମିଲ୍ କରାଯିବ । ଏହି ସ୍କ୍ୱାଡ୍ ବିଭିନ୍ନ ସ୍କୁଲ୍ ଯାଇ ସ୍କୁଲ୍ ପିଲାଙ୍କ ବସ୍ତାନି ବୋଝ ହାଲୁକା ହେଉଛି କି ନାହିଁ ସେ ନେଇ ଯାଞ୍ଚ୍ କରିବେ । ବିଶେଷ କରି ଘରୋଇ ସ୍କୁଲ୍ ଉପରେ ଅଧିକ ଗୁରୁତ୍ୱ ଦିଆଯିବ । ସ୍କୁଲ୍କୁ ସୂଚନା ଦେଇ କିମ୍ବା ସୂଚନା ନ ଦେଇ ଅଚାନକ ଭାବେ ସେଠାରେ ପହଞ୍ଚି ସ୍ଥିତି ପରଖିପାରିବାର ସ୍କ୍ୱାଡ୍ ପାଖରେ କ୍ଷମତା ରହିବ । ନିୟମ ଉଲ୍ଲଂଘନ କରିଥିବା ସ୍କୁଲ୍ ବିରୋଧରେ କି ପଦକ୍ଷେପ ଗ୍ରହଣ କଲେ ସେ ସମ୍ପର୍କରେ ସ୍କୁଲ୍ ଓ ଗଣଶିକ୍ଷା ବିଭାଗକୁ ରିପୋର୍ଟ ପଠାଇବେ ବୋଲି ନିର୍ଦ୍ଦେଶ ଦିଆଯାଇଥିଲା । କିନ୍ତୁ ଏହାର କୌଣସି କାର୍ଯ୍ୟକାରିତା ଦେଖିବାକୁ ମିଳୁନାହିଁ । ଗତ ତିନିବର୍ଷ ଭିତରେ ଥରଟିଏ ବି ଯାଞ୍ଚ୍ ହୋଇନଥିବା ଅଭିଯୋଗ ହୋଇଛି ।
ସୂଚନାଯୋଗ୍ୟ, କିଛି ଘରୋଇ ବିଦ୍ୟାଳୟରେ ପଢୁଥିବା ପିଲାଙ୍କ ବସ୍ତାନି ଏବେ ବୋଝରେ ପରିଣତ ହୋଇଛି । ଏହି ବୋଝ ହ୍ରାସ କରିବା ଲାଗି କେନ୍ଦ୍ର ସରକାର ବିଜ୍ଞପ୍ତି ଜାରି କରି ଏହାକୁ କାର୍ଯ୍ୟକାରୀ କରିବାକୁ ସବୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ । କିନ୍ତୁ ଓଡିଶା ସରକାର ଏହାକୁ କାର୍ଯ୍ୟକାରୀ ନକରିବାରୁ ହାଇକୋର୍ଟରେ ଏକ ମାମଲା ରୁଜୁ ହୋଇଥିଲା । ହାଇକୋର୍ଟରେ ମାମଲା ରୁଜୁ ହେବା ପରେ ରାଜ୍ୟ ସରକାର ଏହି ନୀତି କାର୍ଯ୍ୟକାରୀ କରିବା ଲାଗି ଏକ ଗାଇଡ୍ଲାଇନ୍ ପ୍ରସ୍ତୁତ କରିଥିଲେ ।
୨୦୧୯ ମାର୍ଚ୍ଚ ୮ ତାରିଖରେ ଏହି ଗାଇଡ୍ଲାଇନ୍ ରାଜ୍ୟରେ ଲାଗୁ ହୋଇଥିଲା । ଏହି ଗାଇଡ୍ଲାଇନ୍ ଅନୁସାରେ ପ୍ରତ୍ୟେକ ବିଦ୍ୟାଳୟ ସେମାନଙ୍କ ପିଲାଙ୍କୁ ବସ୍ତାନିର ବୋଝ ସ୍ଥିର କରିବାକୁ ନିର୍ଦ୍ଦେଶ ହୋଇଥିଲା । ଏନେଇ ଜିଲ୍ଲା ଶିକ୍ଷା ଅଧିକାରୀ ଡକ୍ଟର ସନ୍ତୋଷ ରାଉତଙ୍କୁ ପଚାରିବାରେ ସେ କହିଛନ୍ତି, ପିଲାମାନଙ୍କ ବ୍ୟାଗ ଅଧିକ ଓଜନ ରହୁଥିବା ନେଇ କିଛି ଅଭିଯୋଗ ଆସିନାହିଁ । କିନ୍ତୁ ଆଗକୁ ଏ ଦିଗରେ ଦୃଷ୍ଟି ଦେବୁ ବୋଲି ଡକ୍ଟର ରାଉତ କହିଛନ୍ତି ।
