ଭୁବନେଶ୍ୱର,୦୭/୦୩: ଯାହାକୁ ଦେଖ ଖୁଁ ଖାଁ । କାଶିକାଶି ତଣ୍ଟି ପଡ଼ିଗଲାଣି । ଛାତି ଦରଜ । ନାକରୁ ପାଣି ଗଳୁଛି । ବର୍ତ୍ତମାନ ଗରମ ଅନୁଭୂତ ହେଉଥିବା ବେଳେ ହଠାତ୍ ଥଣ୍ଡା ମାଡ଼ିବସୁଛି । ଘରେ ଘରେ ଥଣ୍ଡା ରୋଗୀ । ଦିନେ କି ଦୁଇଦିନ ନୁହେଁ ମାସମାସ ଧରି କାଶ ଲାଗିରହୁଛି । କିଏ ମେଡିସନ୍ ଦୋକାନରେ ଲାଇନ୍ ଲଗାଇ ଔଷଧ କିଣୁଛି ତ କିଏ ତୁଳସୀ ଓ ମହୁ ଖାଉଛି । ହଠାତ୍ ଏମିତି ଥଣ୍ଡା ଧରିବା ଓ ଲାଗିରହିବା କାରଣ କ’ଣ ତାହା ବୁଝାପଡ଼ୁନି । ଯାହାକୁ ନେଇ ଚିନ୍ତାରେ ଲୋକେ ।
ସାଧାରଣତଃ ୨ରୁ ୩ ଦିନରେ ଥଣ୍ଡା ଛାଡ଼ିଯାଏ । କିନ୍ତୁ ଏବେ ଥଣ୍ଡା ଧରିଲେ ସହଜରେ ପିଛା ଛାଡ଼ୁନି । ସେଥିପାଇଁ ରୋଗୀ ହସ୍ପିଟାଲକୁ ଧାଉଁଛନ୍ତି । ସ୍ୱାସ୍ଥ୍ୟ ବିଭାଗ ମଧ୍ୟ ଏନେଇ କୌଣସି ସୂଚନା ଦେଉନି । କାଳେ କରୋନା ଫେରିଆସିଲା କି, ତାକୁ ମଧ୍ୟ ନେଇ ଆଶଙ୍କା ଲାଗିରହୁଛି । ଏ ସଂକ୍ରାନ୍ତରେ ସମ୍ ହସ୍ପିଟାଲର ବରିଷ୍ଠ ଚିକିତ୍ସକ ଡା. ଶ୍ରୀକାନ୍ତ ଧର କହିଛନ୍ତି, ଏବେ ଋତୁ ପରିବର୍ତ୍ତନର ସମୟ । ଋତୁ ପରିବର୍ତ୍ତନ ହେଲେ ପରିବେଶରେ ପରିବର୍ତ୍ତନ ଓ ଆର୍ଦ୍ରତାରେ ମଧ୍ୟ କିଛିଟା ଅଦଳବଦଳ ହୁଏ । କିଛିଦିନ ତଳେ ବର୍ଷା ହୋଇଥିଲା । ପୁଣି ଖରା ହେଲା । ରାସ୍ତାରେ ଗଲା ବେଳେ ଧୂଳି ଉଡୁଛି । ତେଣୁ ଆଲର୍ଜି ସହ ଥଣ୍ଡା ହେବା ପାଇଁ ଏହା ଏକ ବଡ଼ କାରଣ ।
ସେହିପରି ଏବେ ଭାଇରାଲ ଇନଫେକ୍ସନ ହେଉଛି । ଅନେକ ଲୋକ ମହାକୁମ୍ଭକୁ ଯାଇ ଫେରୁଛନ୍ତି । ଏଥିସହ ଯେଉଁମାନେ ବାରମ୍ବାର ଯାତାୟାତ କରୁଛନ୍ତି ସେମାନଙ୍କୁ ଏହି ରୋଗ ହେଉଛି । ଏହି ରୋଗ ହେଲେ ରେସ୍ପିରାଟୋରୀ ଓ ଅପର୍ ରେସ୍ପିରାଟୋରୀ ଇନଫେକ୍ସନ (ଶ୍ୱାସନଳୀ ସଂକ୍ରମଣ) ହେଉଛି । ଯଦି ବି ଏଥିରୁ ସୁସ୍ଥ ହେଉଛେ ତଥାପି କରୋନା ଫେରିବା ଭଳି ଏହି ରୋଗ ପୁଣିଥରେ ଆକ୍ରାନ୍ତ କରୁଛି । ଫଳରେ କାଶ, ଥଣ୍ଡା କମୁନି । ଏହାକୁ କୁହାଯାଏ ପୋଷ୍ଟ ଭାଇରାଲ ସିଣ୍ଡ୍ରୋମ । ଏଥିରେ ଦୀର୍ଘଦିନ ଧରି କାଶ ଲାଗିରହୁଛି । ଏଥିସହ ଗଳା ଯନ୍ତ୍ରଣା ଓ କଫ ଜମିରହୁଛି । ଯେଉଁ ଲୋକମାନେ ହସ୍ପିଟାଲକୁ ଆସି ଯାଞ୍ଚ କରୁଛନ୍ତି, ଆମେ ଦେଖୁଛୁ ଯେ ଚାଇନା ଭାଇରସ ଭଳି ଲକ୍ଷଣ ରହୁଛି । ତେଣୁ ଗରମ ଦିନରେ ଲୋକେ ଥଣ୍ଡାରେ ଆକ୍ରାନ୍ତ ହେଉଛନ୍ତି ।
ଡାକ୍ତର ପରାମର୍ଶ ନିଅ
ଯଦି ଥଣ୍ଡା, କାଶ ଛାଡ଼ୁନି ଲୋକେ ପ୍ରଥମେ ଡାକ୍ତରଙ୍କ ପରାମର୍ଶ ନିଅନ୍ତୁ । ସେମାନଙ୍କ ଶରୀରରେ ଆଲର୍ଜିକ କମ୍ପୋନେଣ୍ଟ ରହିଛି କି ନାହିଁ ତାହା ପରୀକ୍ଷା ହେବ । ପୋଷ୍ଟ ଇନଫେକଟିଭ୍ ଟେଷ୍ଟ ମଧ୍ୟ ହେବ । ଆଜମା, ଆଲର୍ଜି ଥିଲେ ସେମାନଙ୍କର ଛାତି ପରୀକ୍ଷା ହେବ । ତେବେ କାଶ ନକମିଲେ ଲୋକେ ବହୁତ ଆଣ୍ଟିବାୟୋଟିକ୍ ଖାଆନ୍ତି । ତାହା ଭୁଲ । ଅଧିକ ଆଣ୍ଟିବାୟୋଟିକ ନଖାଇ ଘରେ ଯୋଗ କର, ବ୍ୟାୟାମ କର । ଲୁଣପାଣି କୁଳି କର । ଥଣ୍ଡାଜାତୀୟ ଖାଦ୍ୟ ଆଇସକ୍ରିମ, ଥଣ୍ଡାପାନୀୟ ଠାରୁ ଦୂରେଇ ରୁହ । ଯଦି ଆଲର୍ଜି ରହୁଛି, ତେବେ ଆଣ୍ଟି ଆଲର୍ଜିକ ଖାଆନ୍ତୁ । ଯଦି ୧୦ଦିନରୁ ଅଧିକ ଧରି ଥଣ୍ଡା, କାଶ ରହୁଛି ଆମେ ଏକ୍ସରେ କରି ପରୀକ୍ଷା କରୁଛୁ ବୋଲି ଡାକ୍ତର କହନ୍ତି ।
